Luwason ni Jehova ang Duta

ANG erport nga nahamtang sa pulo sang Maldives ginasirhan sing pila ka oras kada adlaw. Ngaa? Bangod ginabahaan sang taub ang alagyan, nga nagahimo sang paghugpa nga delikado para sa mga eroplano. Madamong sientipiko ang nahangawa nga ang nibel sang tubig sa kapuluan sang Maldives basi magataas sing dimagkubos 1 ka metro sa masunod nga siglo. Bisan pa nga daw diutay lamang katama ang kataason, mahimo panason sina nga pagtaas ang pito ka pulo nga mga pungsod gikan sa mapa. Sa pagkamatuod, suno sa UN Chronicle, ang 2 ka metro nga pagtaas mahimo nga magalubong sa ulihi sang bug-os nga arkipelago, sang mga 1,200 ka kapuluan!

Ano ang rason sang pagtaas sang nibel sang dagat? Suno sa UN En­vi­ron­ment Pro­gram, ang pagdagta sang “mga gas bangod sang pag-init sang kadaygan sang duta” sa atmospera sang duta nagatuga sang pagsangkad sang dagat sa mas mainit nga mga rehiyon, sang pagkatunaw sang yelo kag mga glacier, kag hanti, sang pagtaas sang mga nibel sang dagat. Ang Panos Institute sa London nagasiling nga ang pagdagta “mahimo mag-umpisa sing mahinay nga tugob-globo nga kalaglagan nga nagabalhin sang mga dulunan mismo sang duta kag dagat.”

Ang pagluntad sang tugob-globo nga pag-init ginabaisan gihapon sang mga sientipiko. Apang, makasalig kita nga ang mga problema sa palibot indi magabalhin sang katuyuan sang Dios. “Ang mapatubason nga duta gintukod nga malig-on,” siling sang Biblia. “Indi gid ini mationg.” (1 Cronica 16:30) Kontrolado ni Jehova ang palibot sang bug-os nga duta, kag magakasadya kita nga sa dili madugay luwason niya ang duta kag ang katawhan gikan sa kalaglagan.​—⁠Salmo 24:​1, 2; 135:6; 2 Pedro 3:⁠13.

[Credit Line sang retrato sa pahina 31]

Ang drowing ginpasad sa retrato sang NASA