Report sang mga Manugbantala sang Ginharian

Pagbantala sa Magamo nga Panahon

GINTAGNA ni apostol Pablo nga “sa katapusan nga mga adlaw magaabot ang makahalanguyos nga mga tion.” (2 Timoteo 3:⁠1) Daw ano ka sibu gid nga nagmatuod yadtong mga pulong! Madugay na naeksperiensiahan sang katawhan sa El Salvador sa Sentral nga Amerika ining masakit nga katunayan. Kapin na sa napulo ka tuig nga nagligad, ginhugakom yadto nga pungsod sang isa ka inaway sibil nga nagdala sing pag-antos kag kamatayon sa madamo nga linibo. Natapos na karon ang inaway, apang nagapabilin gihapon ang pag-antos. Hinali nga nagdugang ang krimen pagkatapos sang inaway. Ang isa ka lokal nga komentarista sa telebisyon nagsiling kasan-o lang: “Ang kasingki kag kinawatay nagakatabo karon sa adlaw-adlaw.”

Naapektuhan man ang mga Saksi ni Jehova sining madamo nga krimen. Ang mga makawat nagsulod sa madamo nga Kingdom Hall kag ginpangawat ang mga kasangkapan para sa sound. Sing pila ka beses ginsalakay sang mga gang sang armado nga mga pamatan-on ang mga Kingdom Hall samtang ginahiwat ang Cristianong mga miting, ginpangawat ang mga kuwarta, mga relo, kag iban pa nga mga bilidhon gikan sa tumalambong. Samtang nagahimo sang ila adlaw-adlaw nga mga hilikuton, may pila ka mga Saksi nga ginpatay gani sang mga makawat.

Walay sapayan sining mga sablag, ang mga Saksi ni Jehova sa El Salvador nagapadayon sa pagpangabudlay sing lakas sa pagbantala sing maayong balita. Ginahimo nila ini bilang pagtuman sa Makasulatanhon nga sugo: “Sa tanan nga kapungsuran ang maayong balita dapat anay ibantala.” (Marcos 13:10) Madamo pa sa sining pungsod ang nagakalangkag sa paglaum sa Ginharian nga ginatanyag sang Biblia, kag ginatinguhaan sang mga Saksi nga lab-uton ang tagsatagsa sa ila. Ang di-pormal nga pagpanaksi isa ka epektibo nga metodo sang pagbantala.

Samtang nagapabulong sa isa ka ospital, gingamit sang isa ka Saksi ang tanan nga kahigayunan sa pagpakighambal sa iban nga mga pasyente nahanungod sa mga saad sang Dios sa palaabuton, nga masapwan sa Biblia. Ang isa ka grabe nga pasyente masinulub-on nga nanganduhoy: “Sa indi madugay mapatay na ako!” Apang ang masinulub-on nga panimuot sang pasyente wala magpaluya sa Saksi nga ipaambit sa iya ang maayong balita sang Ginharian sang Dios. Sa baylo, binasa niya sing mabaskog sa tawo ang libro nga Mahimu Ka Mabuhi sing Dayon sa Paraiso sa Duta, nga ginbalhag sang mga Saksi ni Jehova. Pagligad sang pila ka adlaw, nagguwa na ang Saksi sa ospital, nga nagahunahuna sing masubo nga ang tawo nagatagumatayon na.

Apat ka tuig sang ulihi nagpabulong ang Saksi sa lain naman nga ospital. Samtang didto sia, isa ka pasyente ang nagpalapit sa iya kag nagsiling: “Nadumduman mo bala ako”? Amo yadto ang tawo nga iya nakilala anay sang apat ka tuig nga nagligad, ang tawo nga nagatagumatayon sadto! Daw ano ka makalilipay nga sorpresa sang ginhakos sia sang tawo kag nagdugang: “Isa na man ako sa mga Saksi ni Jehova!” Ginbaton sang tawo ang paglaum sa palaabuton nga yara sa Biblia, nagtuon sing Biblia upod sa mga Saksi ni Jehova, kag gindedikar ang iya kabuhi kay Jehova. Indi lamang nga Saksi na sia kundi nagapakigbahin pa sia sa bug-os tion nga ministeryo subong isa ka regular payunir sa halos duha ka tuig na.

Sa sini nga kaso, ang mga binhi sang kamatuoran nga ginsab-ug sa isa ka di-pormal nga danyag nakalab-ot sa isa ka mabinatunon nga tagipusuon. Ining pribilehiyo sa pagbulig sa mga tawo nga makadangat sa paghibalo sing kamatuoran nagatiklod sa matuod nga mga Cristiano nga padayunon ang pagbantala nga hilikuton walay sapayan sining “makahalanguyos nga tion nga mabudlay pakigbagayan.”