Mga Pamangkot Gikan sa mga Bumalasa
Ano nga Panimuot ang Dapat Ipakita sa Cristianong mga Pagbawtismo?
Isa ina ka makawiwili nga pamangkot, kay bisan pa madamo sang aton mga bumalasa ang bawtismado na, nadalahig sila, kasubong sang mga magapabawtismo. Hambalan naton anay ang tuhoy sa nagapabawtismo, nga bug-os nga ginatugmawan. Ano ang dapat nga mangin panimuot nila?
Sa Mateo 28:19, 20, ginsilingan ni Jesus ang iya mga sumulunod nga maglakat kag maghimo sing mga disipulo sa mga tawo, nagatudlo kag nagabawtismo sa ila. Wala niya ginpakita ang bawtismo subong tuman ka emosyonal nga eksperiensia, isa ka buhat nga nagagikan sa umalagi nga kakunyag. Isa ini ka serioso nga tikang, subong sang makita naton sa halimbawa ni Jesus. Ang Lucas 3:21 nagasiling: “Si Jesus man ginbawtismuhan kag, samtang nagapangamuyo sia, nagbukas ang langit.” Huo, gintamod sang aton Huwaran ang bawtismo sing serioso, sing mapangamuyuon. Indi naton sia mahanduraw, pagkatapos nga makabutwa sa tubig, nga nagakumpas sang simbulo sang kadalag-an, nagasinggitan sa paghugyaw, ukon nagawaras sang iya mga kamot, apang ginhimo ini sang iban sining karon lang. Indi, sang si Juan Bautista lamang ang yara, nangamuyo si Jesus sa iya Amay.
Apang, wala ginapanugda sang Biblia nga ang bawtismo dapat mangin masubo nga hitabo, nga nagakinahanglan sing pinasahi nga mga dagway ukon luwa sa tion sang bawtismo, subong sang ginapatuman sang mga iglesia sa Cristiandad sa karon. Dumduma lamang ang adlaw sang Pentecostes, sang linibo ka mga Judiyo kag kombertido ang nagpaidalom sa Cristianong bawtismo. Natun-an na nila ang Kasuguan sang Dios kag may kaangtanan na sa iya. Gani kinahanglan lamang nila nga tun-an kag batunon ang Mesias, nga si Jesus. Kon nahimo na nila ini, makapabawtismo na sila.
Ang Binuhatan 2:41 nagasiling: “Yadtong tinagipusuon nga nagabaton sang iya pulong ginbawtismuhan.” Ang bersion sang Biblia ni Weymouth mabasa: “Busa, yadtong malipayon nga nagbaton sang iya pulong ginbawtismuhan.” Nalipay sila sa makakulunyag nga balita tuhoy sa Mesias, kag pat-od nga inang tinagipusuon nga kalipay nagdul-ong mismo sa pagbawtismo, ang bawtismo sa atubangan sang ginatos ka malipayon nga tumalan-aw. Bisan ang mga anghel sa langit nagatan-aw man kag nagakalipay. Dumduma ang mga pinamulong ni Jesus: “Nagasiling ako sa inyo, nga may kalipay sa atubangan sang mga manugtunda sang Dios sa isa ka makasasala nga nagahinulsol.”—Lucas 15:10.
Madamo sing paagi nga mapakita sang tagsatagsa sa aton ang pagkaserioso kag kalipay sang pagbawtismo. Sa iban nga mga iglesia ang mga nagapabawtismo nagasuksok sang puti nga mga panapton ukon itom. Wala sing Makasulatanhon nga sadsaran ang amo nga kinahanglanon. Sa gihapon, ang tuman kanipis ukon sirangon nga panapton nga inugpaligo indi nagakaigo, sa mga lalaki man ukon sa mga babayi. Kag subong sang ginpatalupangod na, sa pagbutwa sa tubig, ang bag-ong Cristiano indi dapat maghimo sing pinasahi nga mga kumpas ukon maghulag subong nga daw nagdaug sia sing daku nga kadalag-an. Ang tanan sa Cristianong paghiliutod nagakalipay nga ang bag-uhan nabawtismuhan. Dapat nga nahangpan niya nga ining pagpasundayag sang pagtuo pamuno lamang sa malawig nga dalanon sang integridad agod matigayon ang kahamuot sang Dios.—Mateo 16:24.
Kita, subong tumalan-aw sa dayag nga pagbawtismo, nagapakigbahin sa kalipay sang okasyon, ilabi na kon ang ginbawtismuhan isa ka himata ukon isa nga gintun-an naton sang Biblia. Apang, agod makapakig-ambit sing bug-os, dapat kita mamati sa kabug-usan sang diskurso upod sa mga kandidato, ginapamatian ang ila dayag nga pagsabat sa mga pamangkot nga ginpresentar sa ila, kag nagaupod sa pangamuyo. Ang paghimo sini makabulig sa aton nga mahuptan ang nagakaigo nga pagtamod sa pagbawtismo; matigayon naton ang pagtamod sang Dios sa sini. Pagkatapos sang bawtismo, ang aton kalipay wala nagakinahanglan sing isa ka parada sang kadalag-an, sing isa ka pungpong sang mga bulak, ukon sing isa ka sinalusalo sa pagpadungog sa isa nga ginbawtismuhan. Apang sarang naton mapalapitan ang aton bag-o nga utod nga lalaki ukon babayi agod ipabutyag ang kalipay sa dalayawon nga tikang nga ginhimo kag sa pagpaalinton sing mainit nga pag-abiabi sa aton Cristianong paghiliutod.
Sa pagsumaryo, nian, kita tanan, lakip yadtong nagpatugmaw sa tubig, dapat magtamod sa bawtismo upod ang nagakaigo nga pagkaserioso. Indi ini tion sang magahod nga mga pagpabutyag sing emosyon, sang sinalusalo, ukon sang kinasadya. Apang indi man ini tion sang pagkasubo. Sarang kita magakalipay sing nagakaigo nga ang mga bag-uhan nagbuylog sa aton sa dalanon padulong sa dayon nga kabuhi. Kag sarang naton maabiabi sing malipayon ang aton bag-o nga mga kauturan nga lalaki kag babayi.
[Retrato sa pahina 31]