“Ang Israel sang Dios” kag ang “Dakung Kadam-an”

“Nagtulok ako, kag, yari karon! isa ka dakung kadam-an, nga wala sing tawo nga makaisip.”​—⁠BUGNA 7:⁠9.

1-3. (a) Ano ang mahimayaon langitnon nga paglaum sang hinaplas nga mga Cristiano? (b) Paano gintinguhaan ni Satanas nga gub-on ang kongregasyon sang unang siglo? (c) Ano ang natabo sang 1919 nga nagpakita nga napaslawan ang panikasog ni Satanas nga dagtaan ang hinaplas nga Cristianong kongregasyon?

ANG pagkatukod sang “Israel sang Dios” sang 33 C.E. isa ka daku nga tikang sa pagpanghikot sang mga katuyuan ni Jehova. (Galacia 6:16) Ang hinaplas nga mga katapo sini may paglaum nga mangin dimamalatyon espiritu nga mga tinuga kag sa paggahom kaupod ni Cristo sa langitnon nga Ginharian sang Dios. (1 Corinto 15:​50, 53, 54) Bangod yara sa amo nga posisyon sila ang may panguna nga bahin sa pagpakabalaan sang ngalan ni Jehova kag sa pagdugmok sang ulo sang dakung Kaaway, si Satanas nga Yawa. (Genesis 3:​15; Roma 16:20) Indi katingalahan nga ginhimo ni Satanas ang tanan niya nga masarangan sa paglaglag sining bag-o nga kongregasyon, paagi sa paghingabot kag sa pagtinguha nga dagtaan ini!​—⁠2 Timoteo 2:​18; Judas 4; Bugna 2:⁠10.

² Sang buhi pa ang mga apostoles, wala gid magmadinalag-on si Satanas. Apang, pagkatapos nga napatay sila, wala mapunggan nga naglapnag ang apostasya. Sang ulihi, gikan sa tawhanon nga pagtamod, ang putli nga Cristianong kongregasyon nga gintukod ni Jesus daw nadagtaan sang napasulod ni Satanas ang apostata nga relihioso nga katikuan nga nakilal-an karon subong ang Cristiandad. (2 Tesalonica 2:​3-8) Walay sapayan, nagpabilin ang matuod nga Cristianismo.​—⁠Mateo 28:⁠20.

³ Sa iya ilustrasyon tuhoy sa trigo kag mga gamhon, gintagna ni Jesus nga ang matuod nga mga Cristiano magatubo sa isa ka tion upod sa “mga gamhon,” ukon butig nga mga Cristiano; kag natabo ini. Apang nagsiling man sia nga sa katapusan nga mga adlaw, “ang mga anak sang ginharian” liwat nga painon sing maathag gikan sa “mga gamhon.” (Mateo 13:​36-43) Nangin matuod man ini. Sang 1919 ang tunay nga hinaplas nga mga Cristiano nagguwa gikan sa pagkaulipon sa Babilonia. Ginkilala sila sang Dios subong “ang matutom kag mainandamon nga ulipon,” kag ginsugdan nila sing maisugon ang pagbantala sing maayong balita sang Ginharian. (Mateo 24:​14, 45-47; Bugna 18:4) Kalabanan sa ila mga Gentil; apang bangod may pagtuo sila kaangay ni Abraham, sila sa pagkamatuod ‘binhi ni Abraham.’ Mga katapo sang “Israel sang Dios.”​—⁠Galacia 3:​7, 26-29.

Ang “Dakung Kadam-an”

4. Anong grupo sang mga Cristiano ang nangin talalupangdon, ilabi na sang katuigan 1930?

⁴ Sang primero, ang mga nagbaton sa pagbantala sang hinaplas nga mga Cristiano nangin espirituwal man nga mga Israelinhon, ang nagkalabilin sang 144,000, nga may langitnon nga paglaum. (Bugna 12:17) Apang, ilabi na sang katuigan 1930, isa pa ka grupo ang nangin talalupangdon. Nakilal-an ini upod sa “iban nga mga karnero” sa ilustrasyon ni Jesus tuhoy sa mga karnero sa toril. (Juan 10:16) Mga disipulo sila ni Cristo nga may paglaum nga mabuhi sing walay katapusan sa paraiso sa duta. Sila ang espirituwal nga mga binhi, silingon pa, sang hinaplas nga mga Cristiano. (Isaias 59:​21; 66:​22; ipaanggid ang 1 Corinto 4:​15, 16.) Ginkilala nila ang kongregasyon sang hinaplas nga Cristano subong ang matutom kag mainandamon nga ulipon, kag kaangay sang ila hinaplas nga mga kauturan, ginahigugma nila sing tudok si Jehova, may pagtuo sa halad ni Jesus, may kakugi sa pagdayaw sa Dios, kag may kahanda sa pag-antos para sa pagkamatarong.

5. Paano ang posisyon sang iban nga karnero amat-amat nga nahangpan sang ulihi?

⁵ Sang primero indi pa maathag ang posisyon sining iban nga mga karnero, apang sa pagligad sang tinion, nahangpan ini sing mas maathag. Sang 1932 ang hinaplas nga mga Cristiano ginpalig-on nga pahulagon ang iban nga mga karnero nga makigbahin sa pagbantala nga hilikuton​—⁠butang nga ginahimo na sang madamo nga iban nga karnero. Sang 1934 ang iban nga mga karnero ginpalig-on nga magpabawtismo sa tubig. Sang 1935 nakilal-an sila upod sa “dakung kadam-an” sang Bugna kapitulo 7. Sang 1938 gin-agda sila sa pagtambong sa Memoryal sang kamatayon ni Jesucristo subong mga tumalan-aw. Sang 1950 ang hamtong nga mga lalaki sa tunga nila nakilal-an subong ang “mga prinsipe” nga nagaalagad subong “isa ka palalipdan sa hangin kag isa ka palanaguan sa unos.” (Salmo 45:​16; Isaias 32:​1, 2) Sang 1953, ang dutan-on nga organisasyon sang Dios​—⁠nga sadto nga tion ang mas daku nga bahin sini ginahuman sang iban nga karnero​—⁠nakit-an subong ang sentro sang dutan-on nga katilingban nga magaluntad sa bag-ong kalibutan. Sang 1985 nahangpan nga pasad sa halad gawad ni Jesus, ang iban nga karnero ginkilala nga matarong subong mga abyan sang Dios kag may paglaum nga makalampuwas sa Armagedon.

6. Ano ang relatibo nga mga posisyon sang hinaplas kag sang iban nga karnero sa karon, nga nagadul-ong sa anong mga pamangkot?

⁶ Sa karon, sa sining ulihi nga bahin sang “katapusan nga mga adlaw,” ang kalabanan sang 144,000 napatay na kag nakabaton sang ila langitnon nga padya. (2 Timoteo 3:​1; Bugna 6:​9-11; 14:13) Ang mga Cristiano nga may dutan-on nga paglaum ang nagahimo karon sing kalabanan nga pagbantala sing maayong balita, kag ginakabig nila ini nga isa ka pribilehiyo sa pagsakdag sa hinaplas nga mga kauturan ni Jesus. (Mateo 25:40) Apang, ining mga hinaplas amo ang matutom kag mainandamon nga ulipon nga paagi sa ila ang espirituwal nga pagkaon ginahatag sa tion sining katapusan nga mga adlaw. Ano ang mangin kahimtangan sang iban nga karnero kon mabaton na sang tanan nga hinaplas ang ila langitnon nga padya? Anong mga aman ang ihatag nian sa iban nga mga karnero? Ang malip-ot nga pagbalikid sa dumaan nga Israel magabulig sa aton sa pagsabat sinang mga pamangkot.

Isa ka Tipiko nga “Ginharian sang mga Saserdote”

7, 8. Tubtob sa anong kasangkaron ang dumaan nga Israel isa ka ginharian sang mga saserdote kag isa ka balaan nga pungsod sa idalom sang Kasuguan nga katipan?

⁷ Sang ginpili ni Jehova ang Israel subong iya pinasahi nga pungsod, naghimo sia sang isa ka katipan sa ila, nga nagasiling: “Kon magtuman kamo sang akon tingog kag magbantay sang akon katipan, mangin pinasahi ko kamo nga pagkabutang sa tunga sang tanan nga katawhan, kay ang bug-os nga duta akon. Kag kamo mangin ginharian sang mga saserdote sa akon kag isa ka balaan nga pungsod.” (Exodo 19:​5, 6) Ang Israel amo anay ang pinasahi nga katawhan ni Jehova pasad sa Kasuguan nga katipan. Apang, paano, matuman ang saad tuhoy sa isa ka ginharian sang mga saserdote kag sang isa ka balaan nga pungsod?

⁸ Sadtong matutom pa ang Israel, ginkilala sini ang pagkasoberano ni Jehova kag ginbaton sia subong ila Hari. (Isaias 33:22) Busa, isa sila anay ka ginharian. Apang, subong sang ginpakita sang ulihi, ang saad tuhoy sa “isa ka ginharian” nagakahulugan sing labaw pa. Dugang pa, sang gintuman nila ang Kasuguan ni Jehova, matinlo sila, napain sa mga pungsod sa ila palibot. Isa sila ka balaan nga pungsod. (Deuteronomio 7:​5, 6) Isa bala sila anay ka ginharian sang mga saserdote? Sa Israel ang tribo ni Levi ginpain para sa pag-alagad sa templo, kag sa tunga sinang tribo amo ang Levinhon nga pagkasaserdote. Sang gin-inagurahan ang Mosaikong Kasuguan, ang lalaki nga mga Levinhon ginkuha subong kabaylo sang panganay sang tagsa ka di-Levinhon nga pamilya.⁠a (Exodo 22:​29; Numeros 3:​11-16, 40-51) Busa, ang tagsa ka pamilya sa Israel sadto, silingon pa, may tiglawas sa pag-alagad sa templo. Amo ini ang naghimo sa pungsod nga suod gid sa pagkasaserdote. Walay sapayan, gintiglawas nila si Jehova sa iban nga mga pungsod. Ang bisan sin-o nga dumuluong nga luyag magsimba sa matuod nga ­Dios dapat maghimo sini upod sa Israel.​—⁠2 Cronica 6:​32, 33; Isaias 60:⁠10.

9. Ano ang nagpahulag kay Jehova nga sikwayon ang naaminhan nga ginharian sang Israel ‘gikan sa pag-alagad subong saserdote sa iya’?

⁹ Sang mapatay si Solomon, ang katawhan sang Dios natunga sa naaminhan nga pungsod sang Israel sa idalom ni Hari Jeroboam kag sa nabagatnan nga pungsod sang Juda sa idalom ni Hari Rehoboam. Sanglit ang templo, ang sentro sang putli nga pagsimba, yara sa teritoryo sang Juda, si Jeroboam nagpatindog sing butig nga porma sing pagsimba paagi sa pagpatindog sing mga larawan sang tinday nga baka sa teritoryo sang iya pungsod. Dugang pa, “naghimo sia sing balay sa mataas nga mga duog kag naghimo sing mga saserdote gikan sa bug-os nga katawhan, nga indi gikan sa mga anak ni Levi.” (1 Hari 12:31) Ang naaminhan nga pungsod labi nga naglugdang sa butig nga pagsimba sang gintugutan ni Hari Ahab ang iya dumuluong nga asawa, si Jesebel, sa pagtukod sing pagsimba kay Baal sa pungsod. Sang ulihi, si Jehova nagpahibalo sing paghukom sa malalison nga ginharian. Paagi kay Oseas, sia nagsiling: “Ang akon katawhan ginalaglag, tungod sing kakulang sang ihibalo. Bangod nga ginsikway mo ang ihibalo, sikwayon ko man ikaw sa pag-alagad subong saserdote sa akon.” (Oseas 4:6) Wala madugay sang ulihi, ginlaglag sang mga Asi­rianhon ang naaminhan nga ginharian sang Israel.

10. Paano ang nabagatnan nga ginharian sang Juda, sang matutom pa ini, nagtiglawas kay Jehova sa iban nga mga pungsod?

¹⁰ Kamusta ang nabagatnan nga pungsod sang Juda? Sang mga adlaw ni Ezequias, si Jehova nagsiling sa ila paagi kay Isaias: “Kamo akon mga saksi, . . . ang akon alagad nga ginpili ko, . . . ang katawhan nga ginhuman ko nga sa akon, agod nga magpadayag sila sang akon kadayawan.” (Isaias 43:​10, 21; 44:21) Sang matutom sila, ang nabagatnan nga ginharian amo anay ang nagapahibalo sang himaya ni Jehova sa mga pungsod kag nagaganyat sa mga may matarong sing tagipusuon sa pagsimba sa iya templo kag agod alagaran sang matuod Levinhon nga pagkasaserdote.

Ang mga Dumuluong sa Israel

11, 12. Hingadli ang pila ka dumuluong nga nag-alagad kay Jehova upod sa Israel.

¹¹ Kon tuhoy sa mga dumuluong nga nagsunod sa sining pungsudnon nga saksi, may mga aman para sa ila sa Kasuguan nga ginhatag kay Moises​—⁠nga ang iya asawa nga si Zipora, isa ka Midianhon. “Isa ka daku nga kadam-an” sang mga di-Israelinhon ang naghalin sa Egipto upod sa Israel kag nakasaksi sang ginhatag ang Kasuguan. (Exodo 2:​16-22; 12:​38; Numeros 11:4) Si Rahab kag ang iya pamilya ginlu­was sa Jerico kag sang ulihi ginbaton sa Judiyong kongregasyon. (Josue 6:​23-25) Wala madugay sang ulihi, ang mga Gabaonita nakighidait sa Israel kag ginhatagan sing mga hilikuton may kaangtanan sa tabernakulo.​—⁠Josue 9:​3-27; tan-awa man ang 1 Hari 8:​41-43; Ester 8:⁠17.

¹² Sang ulihi, ang mga dumuluong nag-alagad sa mataas nga mga katungdanan. Si Urias nga Hethanon, nga bana ni Batseba, nalakip sa “gamhanan nga mga lalaki” ni David, subong man si Zelek nga Amonhon. (1 Cronica 11:​26; 39, 41; 2 Samuel 11:​3, 4) Si Ebed-melec, nga Etiopeanhon, nag-alagad sa palasyo kag malapit sia sa hari. (Jeremias 38:​7-9) Pagkatapos nga makabalik ang Israel gikan sa pagkatapok sa Babilonia, ang di-Israelinhon nga mga Netinim ginhatagan sing daku nga responsabilidad sa pagbulig sa mga saserdote. (Esdras 7:24) Sanglit ang kadamuon sining matutom nga mga dumuluong, ukon dumuluong nga mga pumuluyo, ginakabig nga nagalandong sa dakung kadam-an karon, ang ila kahimtangan makapainteres gid sa aton.

13, 14. (a) Ano ang mga pribilehiyo kag mga salabton sang mga proselita sa Israel? (b) Paano dapat tamdon sang mga Israelinhon ang matutom nga mga proselita?

¹³ Mga proselita sila, nga dedikado nga mga sumilimba ni Jehova sa idalom sang Mosaikong Kasuguan nga napain gikan sa mga pungsod upod sa mga Israelinhon. (Levitico 24:22) Naghalad sila sing mga dulot, naglikaw sa butig nga pagsimba, kag naglihi sa dugo, subong sang ginhimo sang mga Israelinhon. (Levitico 17:​10-14; 20:2) Nagbulig sila sa pagpatindog sang templo ni Solomon kag nagbuylog sa pagpasag-uli sang matuod nga pagsimba sa idalom nanday Hari Asa kag Hari Ezequias. (1 Cronica 22:​2; 2 Cronica 15:​8-14; 30:25) Sang gingamit ni Pedro ang una nga yabi sang Ginharian sang Pentecostes 33 C.⁠E., ang iya mga pinamulong nabatian sang mga “Judiyo kag [di-Judiyo] nga mga proselita.” Mahimo gid, ang pila sang tatlo ka libo nga ginbawtismuhan sadto nga adlaw mga proselita. (Binuhatan 2:​10, 41) Wala madugay sang ulihi, isa ka Etiopeanhon nga proselita ang ginbawtismuhan ni Filipe​—⁠antes gingamit ni Pedro ang katapusan nga yabi sang Ginharian kay Cornelio kag sa iya pamilya. (Mateo 16:​19; Binuhatan 8:​26-40; 10:​30-48) Sing maathag, ang mga proselita wala gintamod subong mga Gentil.

¹⁴ Walay sapayan, ang posisyon sang mga proselita sa Israel indi kaangay sa iya sang kinaugali nga mga Israelinhon. Ang mga proselita wala mag-alagad subong mga saserdote, kag ang ila mga panganay wala sing tiglawas sa Levinhon nga pagkasaserdote.⁠b Kag ang mga proselita wala sing duta nga palanublion sa Israel. Walay sapayan, ang mga Israelinhon ginsugo nga magmapatugsilingon sa matutom nga mga proselita kag tamdon sila subong mga kauturan.​—⁠Levitico 19:​33, 34.

Ang Espirituwal nga Pungsod

15. Ano ang nangin resulta sang ang kinaugali nga Israel nagdumili sa pagbaton sa Mesias?

¹⁵ Ang Kasuguan gindesinyo agod huptan nga matinlo ang Israel, napain gikan sa mga pungsod sa palibot nila. Apang may isa pa ini ka katuyuan. Si apostol Pablo nagsulat: “Ang Kasuguan nangin manugtuytoy naton tubtob kay Cristo, agod nga mapakamatarong kita paagi sa pagtuo.” (Galacia 3:24) Sing makapasubo, ang kalabanan nga mga Israelinhon wala magpatuytoy sa Kasuguan padulong kay Cristo. (Mateo 23:​15; Juan 1:11) Gani ginsikway ni Jehova ina nga pungsod kag ginpahanabo ang pagkabun-ag sang “Israel sang Dios.” Dugang pa, ginpalab-ot niya ang pangagda sa mga di-Judiyo nga mangin bug-os nga banwahanon sa sining bag-o nga Israel. (Galacia 3:​28; 6:16) Sa sining bag-o nga pungsod nga ang saad ni Jehova sa Exodo 19:​5, 6 tuhoy sa harianon nga pagkasaserdote nakatigayon sang makadalayaw, katapusan nga katumanan. Paano?

16, 17. Sa anong kahulugan ang hinaplas nga mga Cristiano sa duta “harianon”? “saserdotenhon”?

¹⁶ Ginkutlo ni Pedro ang Exodo 19:​6 sang ginsulatan niya ang hinaplas nga mga Cristiano sang iya adlaw: “Kamo ‘pinili nga kaliwatan, harianon nga pagkasaserdote, balaan nga pungsod, katawhan nga iya sang Dios.’ ” (1 Pedro 2:9) Ano ang buot silingon sini? Mga hari bala ang hinaplas nga mga Cristiano sa duta? Indi, ang ila pagkahari yara pa sa palaabuton. (1 Corinto 4:8) Walay sapayan, mga “harianon” sila sa kahulugan nga ginpili sila para sa palaabuton harianon nga mga pribilehiyo. Bisan sa karon sila isa ka pungsod sa idalom sang isa ka hari, si Jesus, nga gintangdo sang Dakung Soberano, si Jehova nga Dios. Si Pablo nagsulat: “Si [Jehova] nagluwas sa aton gikan sa gahom sang kadudulman kag nagpaliton sa aton sa ginharian sang Anak sang iya gugma.”​—⁠Colosas 1:⁠13.

¹⁷ Ang hinaplas bala nga mga Cristiano sa duta mga saserdote? Sa isa ka kahulugan, huo. Subong isa ka kongregasyon, nagaalagad sila sa isa ka pat-od saserdotenhon nga katungdanan. Ginpaathag ini ni Pedro sang magsiling sia: “Kamo . . . magatukod sang isa ka espirituhanon nga balay para sa isa ka balaan nga pagkasaserdote.” (1 Pedro 2:​5; 1 Corinto 3:16) Sa karon, ang nagkalabilin sang hinaplas nga mga Cristiano subong isa ka hubon amo ­ang “matutom kag mainandamon nga ulipon,” ang alagyan para sa pagpanagtag sing espiri­tuwal nga pagkaon. (Mateo 24:​45-47) Kaangay sa dumaan nga Israel, ang bisan sin-o nga maluyag sa pagsimba kay Jehova magahimo ­sini kaupod sa sining hinaplas nga mga Cris­tiano.

18. Subong saserdotenhon, ang hinaplas nga Cristianong kongregasyon sa duta may anong panguna nga salabton?

¹⁸ Dugang pa, ginbuslan sang hinaplas nga mga Cristiano ang Israel sa pribilehiyo nga pagpanaksi sing pagkadaku ni Jehova sa tunga sang mga pungsod. Ginapakita sang konteksto nga sang gintawag ni Pedro ang hinaplas nga mga Cristiano nga isa ka harianon nga pagkasaserdote, ginahunahuna niya ang tuhoy sa pagbantala nga hilikuton. Sa pagkamatuod, gintingob niya sa isa ka pagkutlo ang saad ni Jehova sa Exodo 19:​6 upod sa Iya mga pinamulong sa Israel sa Isaias 43:​21 sang sia magsiling: “Kamo . . . ‘isa ka harianon nga pagkasaserdote, . . . [agod] nga mapakita ninyo ang gamhanan nga mga buhat’ sang nagtawag sa inyo gikan sa kadudulman pakadto sa iya kalatingalahan nga kapawa.” (1 Pedro 2:9) Nahisanto sa sini, si Pablo nagpamulong tuhoy sa pagpahibalo sang pagkahalangdon ni Jehova subong isa ka halad sa templo. Sia nagsulat: “Paagi [kay Jesus] maghalad kita sing dalayon sa Dios sing halad sang pagdayaw, nga amo, ang bunga sang mga bibig nga nagatu-ad sang iya ngalan.”​—⁠Hebreo 13:⁠15.

Isa ka Langitnon nga Katumanan

19. Ano ang katapusan, dakung katumanan sang saad nga ang Israel mangin isa ka ginharian sang mga saserdote?

¹⁹ Apang, ang Exodo 19:​5, 6 may mas daku mahimayaon nga katumanan. Sa tulun-an sang Bugna, nabatian ni Juan ang langitnon nga mga tinuga nga nagaaplikar sini nga kasulatan samtang ginadayaw nila ang ginbanhaw nga si Jesus: “Gin-ihaw ikaw kag gintubos mo sa Dios sang imo kaugalingon nga dugo ang mga tawo sa tagsa ka kabikahan kag katawhan kag pungsod, kag ginhimo sila nga ginharian kag mga saserdote sa aton Dios, kag magagahom sila sa duta.” (Bugna 5:​9, 10) Busa, sa pat-od nga kahulugan sini, ang harianon nga pagkasaserdote amo ang langitnon nga Ginharian sang Dios, ang nagagahom nga awtoridad nga gintudlo sa aton ni Jesus nga ipangamuyo. (Lucas 11:2) Ang 144,000 tanan nga hinaplas nga mga Cristiano nga nagpabilin nga matutom tubtob sa kamatayon makatigayon sing bahin sa sinang Ginharian nga kahimusan. (Bugna 20:​4, 6) Daw ano ka dalayawon nga katumanan sang saad nga ginhimo madugay na paagi kay Moises!

20. Anong pamangkot ang nagakinahanglan pa sing sabat?

²⁰ Ano ang kahulugan sining tanan sa kahimtangan sang dakung kadam-an kag sang ila palaabuton kon mabaton na sang tanan nga hinaplas ang ila makadalayaw nga palanublion? Maathagan naton ini sa katapusan nga artikulo sini nga serye.

[Mga footnote]

Mapaathag Mo Bala?

◻ Paano ang posisyon sang iban nga karnero nahangpan sing mas maathag?

◻ Ngaa ginsikway ni Jehova ang naaminhan nga Ginharian sang Israel subong isa ka saserdote sa iya?

◻ Sang matutom pa, ano ang posisyon sang Juda sa atubangan sang mga pungsod?

◻ Ano ang posisyon sang matutom nga mga proselita sa Israel?

◻ Paano ang hinaplas nga kongregasyon nagaalagad subong isa ka ginharian sang mga saserdote?

[Retrato sa pahina 16]

Subong isa ka harianon nga pagkasaserdote, ginpahayag sang hinaplas nga mga Cristiano ang himaya ni Jehova sa duta

[Retrato sa pahina 18]

Ang katapusan nga katumanan sang Exodo 19:​6 amo ang Ginharian