Report sang mga Manugbantala sang Ginharian

“Wala Sila Mag-untat”

KUTOB pa sang mga adlaw ni Jesucristo kag sang iya mga apostoles, gintinguhaan na sing bug-os sang relihioso nga mga lider nga punggan ang pagbantala sing maayong balita sang Ginharian sang Dios. Ang mga apostoles sulitsulit kag padayon nga ‘ginmanduan’ sang lokal nga mga awtoridad sa Jerusalem nga “indi maghambal sa ngalan ni Jesus.” (Binuhatan 5:​27, 28, 40) Walay sapayan, ginasugid sang rekord sa Biblia nga “ang pulong sang Dios nagtubo, kag ang kadamuon sang mga gintutun-an nagdugang sing tuman gid sa Jerusalem.”​—⁠Binuhatan 6:⁠7.

Duha ka milenyo sang ulihi makit-an naton gihapon nga ginaimpluwensiahan sang relihioso nga mga lider sa Israel ang lokal nga mga awtoridad agod upangan ang hilikuton sang matuod nga mga Cristiano sa sinang pungsod. Sang Nobiembre 1987, sa idalom sang pag-ipit sang radikal nga mga relihionista, ginmanduan sang lokal nga mga awtoridad sa Tel Aviv, Israel, ang mga Saksi nga untaton ang paghiwat sing Cristianong mga miting sa Kingdom Hall nga nahamtang sa sanga talatapan sang Watch Tower Society. Ginpatuman ang mando sang Oktubre 1989. Subong pagtuman, ginhiwat sang mga Saksi ang ila mga miting sa gin-arkilahan nga mga pasilidad sa sulod sang tatlo ka tuig samtang ang ila mga Kingdom Hall nagapabilin nga wala magamit.

Samtang, ini nga bagay gindala sa igtalupangod sang Mataas nga Hukmanan sang Hustisya sang Israel. Gin-usisa liwat sang opisina sang abogado sa estado ang argumento nga ginpresentar sang mga Saksi kag gindeklarar nga mangin madinalag-on ang ila pag-apelar bangod ang kasuguan napasad lamang sa relihioso nga pagpasulabi. Gani, wala sing may mahimo ang lokal nga mga awtoridad kundi nga ligwaton ang ila desisyon, kag malipayon nga nagbalik ang mga Saksi ni Jehova sa ila mga Kingdom Hall.

Naupangan bala ang hilikuton sa pagbantala sing kamatuoran sang Biblia sadtong mga tinuig? Wala gid! Sa tion sang pagsira sing Kingdom Hall, may duha ka kongregasyon sa Tel Aviv kag may separado nga grupo sang pagtuon sa Biblia sa malapit nga banwa sang Lod. Mga tatlo ka tuig sang ulihi, sang ginbuksan liwat ang Kingdom Hall, nagdugang sa apat ka kongregasyon ang mga Saksi ni Jehova, kag isa ka bag-o nga grupo sang pagtuon sa Biblia ang nagatipon sa Beersheba.

Ang pag-uswag sa Israel indi lamang sa tunga sang mga grupo sang panguna nga lenguwahe, ang Arabiko kag Hebreo. Nagdugok man ang madamong mga dumuluong gikan sa anay Unyon Sobyet, gani ang nagahambal sing Ruso nga mga Saksi ni Jehova masako karon sa pagpaambit sing maayong balita upod sa ila. Ang pila ka mga miting sa Ruso nga hambal ginhiwat sa tatlo ka kongregasyon; sining karon lang kapin sa isa ka gatos ka tawo ang nagtipon para sa Ruso nga asambleya.

Walay duhaduha, ang mapalabilabihon nga mga relihionista magapadayon sang ila kampanya batok sa matuod nga pagsimba. Apang ang mga manugbantala sang Ginharian padayon nga nagailog sa unang siglo nga mga Cristiano, nga walay sapayan sing paghingabot, “wala sila mag-untat sa pagpanudlo kag pagwali sing maayong balita nahanungod sa Cristo, si Jesus.”​—⁠Binuhatan 5:​42.