Leksion Gikan sa mga Pispis kag mga Bulak

ANO gid bala ang labi nga ginakabalak-an sang mga tawo karon? Para sa kalabanan, ini amo ang pagtigayon sing bastante nga kuwarta agod mabuhi ang ila pamilya ukon ang pagpauswag sang ila talaksan sang pagkabuhi.

Ang pagtigayon sing bastante nga kuwarta agod mabuhi ang kaugalingon ukon ang pamilya amo man ang pangunang ginakabalak-an sang si Jesucristo yari pa sa duta. Apang nagpaandam sia nga ining matarong nga kabalaka mahimo mangin nagapangibabaw nga kabalaka nga wala nagalakip sang espirituwal nga mga butang. Sa pag-ilustrar sang iya punto, ginsilingan ni Jesus ang iya mga disipulo nga tan-awon sing maayo ang mga pispis kag mga bulak.

Ang mga pispis kinahanglan magkaon kada adlaw​—⁠sing kapin pa sa aton bangod sang ila mataas nga metabolismo. Dugang pa, wala sila nagasab-ug sing binhi, nagaani ukon nagatipon sing pagkaon para sa palaabuton. Apang, subong sang ginsiling ni Jesus, “ginapakaon sila sang [aton] langitnon nga Amay.” (Mateo 6:26) Sa kaanggid, ginapanaptan sang Dios sing pinakamatahom nga panapton ang matahom nga “mga lirio sa latagon.”​—⁠Mateo 6:​28-30.

Si Jesus nagapasalig sa aton nga kon pirme naton ginatamod sing nagakaigo ang materyal nga mga kinahanglanon kag ginauna ang espirituwal nga mga butang, ang Dios magapat-od nga kita man may kinahanglanon nga pagkaon kag panapton. Kon si Jehova nga Dios nagaulikid sa mga pispis kag mga bulak, pat-od gid nga magaulikid sia sa mga nagahigugma sa iya kag ‘padayon nga nagapangita anay sang ginharian kag sang iya pagkamatarong.’ (Mateo 6:33) Ginauna mo bala ang mga interes sang Ginharian sang Dios sa imo kabuhi?