Isa ka Walay Pulos nga Ritwal?
ANG sakramento sang pagpangumpisar siniglo na nga ginahimo sang mga Katoliko. Apang, para sa madamo isa ini ka walay pulos nga hilikuton. Nagahinumdom sang iya pagkapamatan-on, ang isa ka prinsipal sa hayskul nga si Bob nagsiling: “Tin-edyer ako anay, kag bisan sadto pa wala ko ini ginakabig nga importante.” Ngaa wala? Para sa iya, ang pagpangumpisar nangin isa ka walay pulos nga ritwal. Sia nagapaathag: “Ang pagpangumpisar kaangay sang pagdala sang imo tanan nga bagahe nga puno sing mga sala sa tawo sang adwana sa erport. Ginpamangkot niya ikaw tuhoy sa imo mga sala kag ginpalakat ka niya sa tapos mo mabuhisan ang luho nga mga butang nga ginbakal mo samtang didto ka sa pungsod sa luwas.”
Sa kaanggid, si Frank Wessling, nga nagsulat sa U.S. Catholic, nagalaragway sang batasan sang pagpangumpisar subong “isa ka simple gid katama nga huluhalintang nga giya, halin sa pagdula sang kinaandan nga mga sala paagi sa saulado nga pagpangadi sing paghinulsol tubtob sa ritwal nga buhat sang pakulahaw nga paghinulsol.” Ang paghinakop ni Wessling? “Kumbinsido ako nga ang Pagpangumpisar maayo para sa kalag,” siling niya. “Apang kon paano ini ginahimo sang mga Katoliko amo ang problema.”
Ginasaysay sang Biblia ang pagpangumpisar sa tuhay gid nga paagi. Ang labing importante amo ang pagpangumpisar ukon pagtu-ad sa Dios. (Salmo 32:1-5) Kag ang Cristianong disipulo nga si Santiago nagsulat: “May nagamasakit bala sa inyo? Magpatawag sia sang mga tigulang sang kongregasyon kag pangamuyuan nila sia, nga ginahaplas sia sing lana sa ngalan ni Jehova. Busa magtinuaray kamo sang inyo mga sala kag magapangamuyuay kamo, agod nga mag-ayo kamo.”—Santiago 5:14, 16.
Ang isa ka Cristiano nga ginabug-atan sing sala mahimo magtawag sang mga manugtatap sang kongregasyon, nga makahatag sing personal kag praktikal nga laygay gikan sa Biblia agod buligan ang nakasala sa pagbiya sang iya malain nga dalanon. Ang mga manugtatap makahatag sing nagakaigo nga pagpalig-on samtang ginabantayan nila ang pag-uswag sang isa nga nagamasakit sa espirituwal. Tuhay gid sa pormalistiko nga ritwal sang pagpangumpisar nga ginahimo sang mga simbahan karon! Ginpalig-on sang personal nga bulig sang mga gulang sang kongregasyon, ang mahinulsulon nga mga makasasala makatigayon sing paumpaw nga nabatyagan ni David, subong sang ginapabutyag sa iya salmo: “Ginkilala ko ang akon sala sa imo, kag wala ko ginlikom ang akon kalautan. Ako nagsiling: ‘Itu-ad ko ang akon mga paglalis kay Jehova.’ Kag ikaw nagpatawad sang kalautan sang akon mga sala.”—Salmo 32:5.