Isa ka Madinalag-on nga Kampanya sa Pagpanaksi sa Gresya

ANG mga Saksi ni Jehova madugay na nga nag-atubang sing pagpamatok sa Gresya. Ang pila ka opisyales sang pulisiya, hukmanan, kag gobierno naghingabot sa mga Saksi, sa masami bangod sang pag-ipit gikan sa klero sang Griegong Ortodokso. Kon kaisa ang balibad amo ang layi batok sa proselitismo sang Gresya, kon kaisa naman amo ang pasad-sa-Biblia nga pagdumili sang mga Saksi sa pagkadto sa inaway ukon sa pagpatayon sing dugo.​—⁠Isaias 2:​2-5; Binuhatan 15:​28, 29.

Sa panikasog nga mapasanyog ang daku pa nga paghangop sa tunga sang bunayag sing tagipusuon nga mga awtoridad sa Gresya, mga 200 ka Saksi nga ginakilala sang Griegong gobierno subong relihiosong mga ministro, subong man ang pila nga mga katapo sang legal nga propesyon, ang nakigbahin kasan-o lang sa isa ka kampanya sa bug-os nga pungsod. Gintanyag nila ang gindesinyo sing pinasahi nga brosyur, nga natig-uluhan Jehovah’s Witnesses in Greece, subong man ang libro nga Jehovah’s Witnesses​—⁠Proclaimers of God’s Kingdom. Nag-aman man sila sing isa ka sobre sang mga dokumento nga nagapakita nga wala sing legal nga basihan para sa paghingabot sa mga Saksi ni Jehova. Ginduaw sang mga Saksi ang mga hepe sang pulisiya, mga alkalde, publiko nga manunumbong, kag iban pa nga mga opisyales.

Ang resulta? Ginatos ka maayong mga eksperiensia. Binagbinaga ang pila ka halimbawa.

Gin-abiabi sang kumandante sang isa ka estasyon sang pulisiya sa West Macedonia ang mga kauturan kag nagsiling: “Madugay ko na kamo nga nakilala, . . . kag ginadayaw ko ang inyo kahim-ong. . . . Wala ako nagaugyon sa layi sang proselitismo, kag kon may awtoridad lang ako, dulaon ko ini.”

Ang mga kumandante sang nanuhaytuhay nga mga estasyon sang pulisiya sa madamong siudad nagkomento sing subong sang: “Ginadayaw ko ang inyo ginahimo nga pag-alagad sa katilingban.” “Wala gid kamo nagahatag sing mga problema sa mga pulis; ginahimo ninyo ang isa ka hilikuton sa katilingban.” “Wala gid kami sing problema sa inyo. Ginatahod kag ginadayaw namon kamo.”

Sa Piraeus, may mga luha sa mga mata, nga ginsugiran sang isa ka mataas nga opisyal sang secu­ri­ty po­lice ang mga kauturan nga makahibalo sia mangamuyo kay Jehova nga Dios paagi sa ngalan ni Jesucristo. Labi pa gid niya nga ginkibot ang mga Saksi sang ginsilingan niya sila nga nakahibalo sia nga nagapaabot sila sing pila ka paghingabot antes sang Armagedon, kag nagalaum sia nga gamiton sia sang Dios sa pagbulig sa ila sa sina nga tion! Ginbaton niya ang pangagda sang mga kauturan nga maghambalanay sing dugang pa.

Ang mga Opisyales sang Gobierno Naghulag

Ang isa ka alkalde sa Thessaly nagsiling nahanungod sa Proclaimers nga libro: “Nagakabagay ini nga hatagan sing lugar sa librarya sang munisipalidad​—⁠sing nahauna nga lugar!” Sa gilayon ginpanguha niya ang mga libro gikan sa estante kag ginbulos didto ang Proclaimers nga libro agod makita ang panghapin sini.

Sa naaminhan nga Gresya, mainit nga gin-abiabi sang alkalde ang mga kauturan kag nagsiling: “Kamo ang labing maayo nga mga tawo nga naluyagan ko sa akon komunidad.” Ang mainayuhon nga alkalde sang naaminhan nga Euboea nagsiling sa mga kauturan: “Opisyal anay ako sa army. Apang kamo​—⁠ginadayaw ko gid kamo katama.” Mapagsik sia nga nag-ugyon sa mga impormasyon nga ginhatag sang mga Saksi. Sang ginpakita nila ang isa ka koleksion sang mga libro nga ginbalhag sang Watch Tower Society, sia nagsiling: “Kon ipangako ko nga basahon ko ini tanan, ihatag bala ninyo ini sa akon?” Sila nagsabat: “Aba siempre​—⁠imo ini!” Nalipay gid sia kag halos indi niya pagpalakton ang mga kauturan.

Sa isa ka lugar nga malapit sa siudad sa Attica, ang alkalde malipayon nga nagbaton sang literatura nga gintanyag sang mga kauturan kag nangabay sa ila nga padayon sia nga dalhan sing mga publikasyon sang Sosiedad. Sang manuglakat na sila, nagsiling sia sa ila: “Ang mga tawo ginpaslaw sang mga politiko kag nagapangita sing tunay nga kamatuoran sa iban nga lugar. Napat-od ko nga sugod karon mangin masako gid kamo bangod kamo ang may kamatuoran.”

Ang Publiko nga mga Manunumbong Naghulag

Ang mga kauturan nga nagduaw sa tal-us nga publiko nga manunumbong sa naaminhan nga Gresya naghinumdom: “Nagdayaw gid sia sa aton mga publikasyon kag sa presentasyon, subong man sa panikasog nga ginahimo naton agod pat-uron nga nahibaluan naton kon ano ang pagahimuon kon ginaatubang sang mabug-at nga problema sang pagpatayon sing dugo. Sang ulihi ginpasalamatan niya kami kag mainit nga gindayaw kami bangod sang pagmatumato nga duawon kag pahibaluon sia. Sang ulihi, natukiban namon nga apat ka tuig na ang nakaligad gintawgan niya ang pulis kag ginmando ang pagdakop sa duha ka utod nga lalaki nga nagaalagad sa latagon.”

Nakibot ang duha ka abogado nga mga Saksi nga nagduaw sa opisina sang publiko nga manunumbong sa Atenas nga makita ang kilala kag respetado gid katama nga mas may edad nga publiko nga manunumbong nga nagpalapit sa ila. Gindala niya sila sa higad kag ginsugiran sila nga ang layi batok sa proselitismo wala sing sadsaran kag nagatuga sing kagumon sa sistema sang hukmanan sang Gresya. Ginpasalamatan niya sila upod ang mainit nga pagkamustahanay.

Sa aminhan sang Gresya, ang publiko nga manunumbong mainabyanon katama kag nagbaton sing literatura. Samtang ginabukad niya ang mga pahina sang libro nga Questions Young People Ask​—⁠Answers That Work, nahayanghag sia nga makita ang nanuhaytuhay nga kapitulo sa listahan sang mga kaundan. Nagkomento sia: “Kon ano man ang ginapresentar sining libro, wala ko pa gid makita sa tanan nga simbahan sang Griegong Ortodokso.”

Ang publiko nga manunumbong sa Boeotia nagbaton nga, sang nagligad, nagpapanaug sia sing mando nga tayunan sing dugo ang mga Saksi supak sa ila kabubut-on. Apang sa tapos mangatarungan sa iya ang mga kauturan tuhoy sini, sia nagsiling: “Indi na gid ako magapapanaug sing subong sina nga mando sa palaabuton!” Namat-od sia nga ang lokal nga Hos­pital Liai­son Com­mit­tee para sa mga Saksi ni Jehova dapat konsultahon agod ang tanan nga mga tal-us sa dugo sarang mausisa. Malipayon niya nga ginbaton ang libro nga Young People Ask.

Ang mga Librarian Naghulag

Ang materyal ginpresentar man sa madamong librarian. Sa isa ka librarya sa Atenas, ang matinahuron nga librarian nagbaton sing literatura kag nagkomento: “Maayo gid kay gindalhan ninyo kami sang inyo mga libro bangod ang kalabanan namon nga libro sa amon librarya batok sa inyo. . . . Naakig gid ang isa ka pari nga makita ang inyo mga libro sa librarya. . . . Indi ini importante. Ang tanan nga opinyon dapat pamatian.”

Ang isa ka opisyal sa librarya sang munisipyo sa Crete, nga nakakilala sa mga Saksi ni Jehova sa isa ka kampo militar, nagsiling sa mga kauturan nga nagdayaw sia sa pagdu­mili sang mga Saksi sa pagpakigbahin sa ­inaway. Pirme niya ginapamangkot ang iya kaugalingon, ‘Ngaa dapat mag-antos ining mga tawo?’ Ginbaton niya ang literatura gikan sa mga kauturan kag nagsiling tuhoy sa ila ulihi nga kampanya: “Labing maayo ang inyo ginahimo kag dapat ninyo ini ginhimo sang mga tinuig nga nagligad. . . . Sa Gresya madamo gid ang pag-ihig-ihig.” Ginpangabay niya ang mga kauturan nga duawon sia liwat sa gilayon.

Sa sining pinasahi nga kampanya, ang mga kauturan nakapahamtang sing kapin sa 1,000 ka Proclaimers nga libro, 1,600 ka brosyur nga Jehovah’s Witnesses in Greece, subong man sing ginatos ka libro kag magasin. Subong man, nahambal nila sing personal ang ginatos ka Griegong opisyales. Ginalauman karon sang matutom nga mga alagad ni Jehova sa Gresya kag sa bug-os nga kalibutan nga ang bunayag sing tagipusuon nga mga awtoridad sa Gresya magatigayon sing walay nadampigan nga pagtamod tuhoy sa mga Saksi ni Jehova.