Matigayon Ninyo ang “Tagipusuon sang Leon”

GINAGAMIT kon kaisa sang Biblia ang leon subong simbulo sang kaisog kag pagsalig. Ang isganan ukon maisugon nga mga lalaki ginalaragway subong may “tagipusuon sang leon,” kag ang mga matarong ginasiling nga “kaangay sang bataon nga leon nga masinaligon.” (2 Samuel 17:10; Hulubaton 28:⁠1) Ilabi na kon ginahangkat, ginapakita sang leon nga takus ini sa reputasyon sini subong “ang pinakagamhanan sa tunga sang mga kasapatan.”​—⁠Hulubaton 30:⁠30.

Ginapaanggid ni Jehova ang iya determinasyon sa pag-amlig sa iya katawhan sa pagkawalay kahadlok sang leon. Ang Isaias 31:​4, 5 nagasiling: “Subong sang leon, bisan sang bataon nga leon, nga nagangurob sa ibabaw sang iya tinukob, kon tawgon ang kadam-an sang mga manugbantay batok sa iya, kag walay sapayan sang ila tingog indi sia malisang kag walay sapayan sang ila kagahod indi sia magaduko; sa amo si Jehova sang mga kasuldadusan magapanaug sa pag-away sa ibabaw sang Bukid nga Sion . . . Nagaapin sa iya, luwason man niya sia. Nagaluwas sa iya, papalagyuhon man niya sia.” Busa ginapasalig ni Jehova ang iya mga alagad sang iya aktibo nga pag-atipan, ilabi na kon nagasumalang sing kalisdanan.

Ginapaanggid sang Biblia ang labing daku nga kaaway sang katawhan, si Satanas nga Yawa, sa isa ka nagangurob, nagapanukob nga leon. Agod malikawan nga mangin tulukbon niya, ginasugo kita sa Kasulatan: “Hupti ang inyo kaligdong, magmabinantayon.” (1 Pedro 5:⁠8) Ang isa ka paagi sa paghimo sini amo ang paglikaw sa makamamatay nga espirituwal nga katuyo. Sa sining bahin si Jesus nagsiling: “Hatagi sing igtalupangod ang inyo kaugalingon nga ang inyo mga tagipusuon indi gid mabug-atan sang sobra nga pagkaon kag lakas nga pag-inom kag mga kabalaka sa kabuhi.” (Lucas 21:​34-36) Huo, ang pagbugtaw sa espirituwal sa sining “katapusan nga mga adlaw” makahatag sa aton sang “tagipusuon sang leon,” isa nga ‘dimationg, masinaligon kay Jehova.’​—⁠2 Timoteo 3:1; Salmo 112:​7, 8.