Hanasa Sila Kutob sa Pagkalapsag

GINAPAKITA sang modernong panalawsaw nga “ang mga kiring may pisiolohiko nga mga reaksion sa mga tingog.” Ang mga mananalawsaw sang University of North Carolina “nakatukib nga pagkatapos mabasahan sang mga iloy ang ila mga kabataan sa taguangkan, ang mga bag-ong bun-ag nagabalos kon ang mga dinalan ginabasa liwat,” siling sang Winnipeg Free Press. Kon ang mga babayi nagabasa sing mabaskog samtang nagamabdos, mahimo ini makabulig sa pagpatudok sang maayong mga prinsipio sa moral sa bata. Ang Biblia nagasiling nga ‘nahibal-an ni Timoteo ang balaan nga mga kasulatan kutob sa pagkalapsag.’ (2 Timoteo 3:​14, 15) Sing maathag, nahangpan sang iya iloy kag sang iya lola ang kabilihanan sang paghanas sa iya kutob sa pagkalapsag, nga mahimo naglakip sang pagbasa sing mabaskog.

Ang pagbasa amo “ang aton labing epektibo nga kalantip sa kabuhi sa aton katilingban karon,” siling sang awtor nga si Jim ­Trelease. Ang lengwahe kag kalantip sa bokabularyo ginapasangkad paagi sa pagbasa sing mabaskog.

Maalamon nga sugdan ang pagbasa sing mabaskog sa dimagkubos sa gilayon nga magasugod ka sa pagpakighambal sa imo lapsag. Bisan nga sa primero indi mahangpan sang imo wala pa matawo ukon bag-o lang mabun-ag nga lapsag ang imo ginasiling, ang posible madugay nga mga benepisyo takus sini. Ang Hulubaton 22:6 nagasiling: “Hanasa ang bata sa dalanon nga dapat niya paglaktan; bisan tigulang na sia indi sia magtalikod sa sini.”

Ano ang sarang mo mabasa nga lunsay praktikal kag mapuslanon? Basaha ang Biblia sing mabaskog sa imo anak kada adlaw. Basaha man ang iban pa mapuslanon nga mga publikasyon, subong sang Pagpamati sa Dakung Manunudlu, Ang Akon Libro sang mga Sugilanon sa Biblia, Ang Pinakabantog nga Tawo nga Nagkabuhi, kag ang mga artikulo sa Lalantawan kag Magmata! nga mga magasin.

Matuod, ang paghimo sini nagadalahig sing tion, apang tion ini nga ginhinguyang sing maayo. Isa ini ka kitaon nga paagi sa pagpakita nga ginaulikdan kag ginahigugma mo ang imo anak.