“Ginsabat ni Jehova ang Akon mga Pangamuyo!”

SA BUG-OS nga kalibutan, ang mga Saksi ni Jehova nagadumala sing halos lima ka milyon ka pagtuon sa Biblia sa puluy-an upod sa mga tawo nga interesado makatigayon sing sibu nga ihibalo nahanungod sa Dios kag sa iya matahom nga katuyuan para sa katawhan. Bisan ang mga bata sa tunga sang mga Saksi ni Jehova nagapakigbahin sa sining hilikuton. Binagbinaga, halimbawa, ang isa ka bata nga lalaki nga si Joel. Ginsimbuluhan niya ang iya dedikasyon kay Jehova kag nagpabawtismo sang nuebe anyos sia. Pagligad sang isa ka tuig may amo sini sia nga eksperiensia:

“Samtang sa ministeryo, nakilala ko ang isa ka babayi nga si Candy. Gintanyagan ko sia sing brosyur nga ‘Toloka! Ginahimo Ko nga Bag-o ang Tanan nga Butang.’ May yari na sia sini, gani gintanyagan ko sia sing libro nga Mahimu ka Mabuhi sing Dayon sa Paraiso nga Duta. May yari man sia sini. Nian nahunahuna ko, ‘Tanyagan ko ining babayi sing isa ka pagtuon sa Biblia.’ Nagpasugot sia!

“Ang utod nga babayi ni Candy, nga nagatagumatayon bangod sang kanser, nagapuyo upod sa iya. Isa pa, si Candy nagatuon nga mangin nars. Gani sa isa ka panag-on sang tion, ang pagtuon sa Biblia nauntat. Apang kami sang akon mga ginikanan padayon nga nakig-angot sa iya paagi sa pagbilin sing magasin sa iya ukon sa iya bana, nga si Dick. Ginsugiran kami ni Dick nga ginabutang ni Candy ang mga magasin sa tupad sang iya katre kag ginabasa ini sa gab-i.

“Sang ulihi, ang utod nga babayi ni Candy napatay. Ginsugilanon namon sang akon mga ginikanan si Candy nahanungod sa kahimtangan sang patay. Namat-od sia nga padayunon ang iya pagtuon sa Biblia. Sa tuhay nga adlaw, ginpamangkot namon si Dick kon bala luyag niya magtuon upod ni Candy kag himuon ini nga isa ka pangpamilya nga pagtuon. Nahunahuna niya nga isa ini ka maayo nga ideya. Gani karon, kaupod ni Dad, ginatun-an ko sanday Dick kag Candy. Maayo ang ila pag-uswag kag nagapakita sing apresasyon sa pagtuon sa Biblia.

“Madugay ko na ginapangamuyo nga makatigayon ako sing isa ka pagtuon sa Biblia, kag ginsabat ni Jehova ang akon mga pangamuyo!”