“Bisan Pa Wala Gid Ninyo Sia Makita, Ginahigugma Ninyo Sia”
“Bisan pa wala gid ninyo sia makita, ginahigugma ninyo sia. Bisan pa wala kamo nagatulok sa iya sa karon, sa gihapon nagapakita kamo sing pagtuo sa iya kag nagakasadya sing daku.”—1 PEDRO 1:8.
1. Bisan pa wala sing bisan sin-o sa duta karon ang nakakita kay Jesus, paano ang iban nga relihiosong mga tawo nagatinguha sa pagpakita sing debosyon sa iya?
WALA sing bisan sin-o nga nagakabuhi karon ang nakakita kay Jesucristo. Apang, minilyon ka tawo ang nagapangangkon nga nagahigugma sa iya. Kada Enero 9 sang tagsa ka tuig, sa Manila, sa Pilipinas, ang subong kadaku sa tawo nga estatwa ni Jesucristo nga nagapas-an sing krus ginaguyod sa mga kalye sa ginatawag nga amo ang labing daku, labing talalupangdon nga pagpadayag sang popular nga relihion sa pungsod. Ang nalangkag nga kadam-an nagatikludanay kag nagadis-uganay; ang mga tawo nagataklasanay pa gani sa pagsalimuang nga matandog ang imahen. Madamo sang nagakadto agod magtan-aw sini ang ginaganyat lamang sang daku nga prosesyon. Apang, ang iban sa ila walay duhaduha mga tawo nga naganyat sing sinsero kay Jesus. Bilang pamatuod sina, mahimo nga nagasuksok sila sing krusipiho ukon tayuyon nga nagasimba. Apang, sarang bala makabig ang subong sina nga idolatriya subong matuod nga pagsimba?
2, 3. (a) Sin-o sa mga sumulunod ni Jesus ang aktuwal nga nakakita kag nakabati sa iya? (b) Sin-o pa sang unang siglo ang naghigugma kay Jesus kag nagtuo sa iya, bisan pa wala gid nila makita sia sing personal?
2 Sang unang siglo, linibo sa Romanong probinsia sang Judea, Samaria, Perea, kag Galilea ang personal nga nakakita kag nakabati gid kay Jesucristo. Namati sila samtang ginapaathag niya ang makalilipay nga mga kamatuoran nahanungod sa Ginharian sang Dios. Mga saksi sila sa mga milagro nga iya ginhimo. Ang iban sini nangin debotado nga mga disipulo niya, kumbinsido nga sia “ang Cristo, ang Anak sang buhi nga Dios.” (Mateo 16:16) Apang, wala malakip sa sini ang mga utod nga ginpadalhan ni apostol Pedro sang iya unang inspirado nga sulat.
3 Ang mga utod nga ginsulatan ni Pedro nagapuyo sa Romanong probinsia sang Pontus, Galacia, Capadocia, Asia, kag Bitinia—tanan nahamtang sa duog sang modernong-adlaw nga Turkey. Ginsulatan sila ni Pedro: “Bisan pa wala gid ninyo sia makita, ginahigugma ninyo sia. Bisan pa wala kamo nagatulok sa iya sa karon, sa gihapon nagapakita kamo sing pagtuo sa iya kag nagakasadya sing daku upod ang dimabungat kag mahimayaon nga kalipay.” (1 Pedro 1:1, 8) Paano nila nakilala si Jesucristo tubtob sa punto nga ginhigugma nila sia kag nagpakita sing pagtuo sa iya?
4, 5. Paano ining mga tawo nga wala gid makakita kay Jesus nakatigayon sing nagakaigo nga ihibalo tuhoy sa iya agod higugmaon sia kag tuuhan?
4 Mahimo gid nga ang iban sa ila yadto sa Jerusalem sang manaksi si apostol Pedro sa kadam-an nga nagtambong sa kapiestahan sang Pentecostes sang 33 C.E. Pagkatapos sang kapiestahan madamong disipulo ang nagpabilin sa Jerusalem agod makabaton sing dugang pa nga instruksion gikan sa mga apostoles. (Binuhatan 2:9, 41, 42; ipaanggid ang 1 Pedro 1:1.) Sa makapila nga paglibot subong misyonero, makugi nga nagministeryo si apostol Pablo sa tunga man sang mga tawo nga nagapuyo sa duog nga ginpadalhan ni Pedro sang unang Biblikanhon nga sulat nga nagadala sang iya ngalan.—Binuhatan 18:23; 19:10; Galacia 1:1, 2.
5 Ngaa naganyat gid kay Jesus yadtong mga tawo nga wala makakita sa iya bisan san-o? Sa aton adlaw, ngaa minilyon pa, sa bilog nga globo, ang tudok nga nagahigugma sa iya?
Ang mga Butang nga Ila Nabatian
6. (a) Kon nabatian mo si Pedro nga nagapanaksi nahanungod kay Jesus sang Pentecostes 33 C.E., ano kuntani ang natun-an mo? (b) Paano ini nag-apektar sa mga 3,000 nga didto sadto nga okasyon?
6 Kon didto ka sa Jerusalem sang maghambal si Pedro sa kadam-an sadto nga nagtipon para sa kapiestahan sang 33 C.E., ano kuntani ang natun-an mo nahanungod kay Jesus? Indi gid maduhaduhaan nga ang mga milagro nga iya ginhimo nagpamatuod nga ginpadala sia sang Dios. Nga, bisan pa ginpapatay si Jesus sang makasasala nga mga tawo, wala sia magpabilin sa lulubngan kundi ginbanhaw na kag ginbayaw sa langit sa tuuhan sang Dios. Nga si Jesus, sa pagkamatuod, amo ang Cristo, ang Mesias nga tuhoy sa iya nagsulat ang mga manalagna. Nga paagi kay Jesucristo, ang balaan nga espiritu ginpasagahay sa iya mga sumulunod amo kon ngaa nakapanaksi sila sa gilayon sa mga tawo gikan sa madamong pungsod nahanungod sa kalatingalahan nga mga butang nga ginahimo sang Dios paagi sa iya Anak. Ang tagipusuon sang madamo nga nakabati kay Pedro sadto nga okasyon natandog gid, kag mga 3,000 ang nagpabawtismo subong Cristianong mga disipulo. (Binuhatan 2:14-42) Kon didto ka sadto, ginhimo mo ayhan ining desidido nga aksion?
7. (a) Kon didto ka anay sa Antioquia sang magbantala didto si apostol Pablo, ano kuntani ang natun-an mo? (b) Ngaa ang iban sa tumalambong nangin mga tumuluo kag nagpaambit sa iban sing maayong balita?
7 Kon isa ikaw sa mga tawo nga nakabati sang magpanudlo anay si apostol Pablo sa Antioquia sa Romanong probinsia sang Galacia, ano pa kuntani ang natun-an mo nahanungod kay Jesus? Nabatian mo kuntani ang paathag ni Pablo nga ang pagpamatbat sang mga manuggahom sing kamatayon kay Jesus sa Jerusalem gintagna na anay sang mga manalagna. Nabatian mo man kuntani ang pamatuod sang mga nakasaksi sang pagkabanhaw ni Jesus. Pat-od nga nakumbinsi ka sa paathag ni Pablo nga paagi sa pagbanhaw kay Jesus gikan sa kamatayon, ginpamatud-an ni Jehova nga ining isa amo matuod ang Anak sang Dios. Kag indi bala nga nakunyag kuntani ang imo tagipusuon sang mahibal-an mo nga ang kapatawaran sang mga sala nga posible paagi sa pagtuo kay Jesus makadul-ong sa kabuhi nga walay katapusan? (Binuhatan 13:16-41, 46, 47; Roma 1:4) Bilang pagkilala sa importansia sang ila nabatian, ang iban sa Antioquia nangin mga disipulo, aktibo nga nagpaambit sa iban sing maayong balita, bisan pa ang paghimo sini nagkahulugan nga magaatubang sila sing mabaskog nga paghingabot.—Binuhatan 13:42, 43, 48-52; 14:1-7, 21-23.
8. Kon didto ka anay sa miting sang kongregasyon sang Efeso sang mabaton ang sulat ni Pablo sa ila, ano kuntani ang natun-an mo?
8 Ano kon kaupod ikaw sa Cristianong kongregasyon sa Efeso, sa Romanong probinsia sang Asia, sang mabaton ang inspirado nga sulat ni Pablo para sa mga disipulo didto? Ano kuntani ang natun-an mo gikan sa sini nahanungod sa papel ni Jesus sa katuyuan sang Dios? Sa amo nga sulat ginpaathag ni Pablo nga paagi kay Cristo ang tanan nga butang sa langit kag sa duta ipasag-uli nga may paghiusa sa Dios, nga ang dulot sang Dios paagi kay Cristo ginatanyag sa katawhan sang tanan nga kapungsuran, nga ang mga indibiduwal nga patay sa panulok sang Dios bangod sang ila mga paglapas ginahimo nga buhi liwat paagi sa pagtuo kay Cristo, kag nga subong resulta sini nga aman, posible liwat nga ang mga tawo mangin hinigugma nga mga anak sang Dios.—Efeso 1:1, 5-10; 2:4, 5, 11-13.
9. (a) Ano ang makabulig sa imo sa paghantop kon bala nahangpan mo mismo ang kahulugan sang ginsulat ni Pablo sa mga taga-Efeso? (b) Paano ang kauturan sa Romanong mga probinsia nga ginsambit ni Pedro naapektuhan sang ila natun-an nahanungod kay Jesus?
9 Ginpadaku ayhan sang apresasyon sa sini tanan ang imo gugma sa anak sang Dios? Naimpluwensiahan ayhan sina nga gugma ang imo adlaw-adlaw nga pagkabuhi, subong sang ginpalig-on ni apostol Pablo sa kapitulo 4 tubtob 6 sang Efeso? Napahulag kay ayhan sina nga apresasyon nga usisaon sing maayo kon ano nga mga butang ang ginauna mo sa imo kabuhi? Bilang gugma sa Dios kag pasalamat sa iya Anak, naghimo ka ayhan sing kinahanglanon nga mga pagpasibu agod nga ang paghimo sang kabubut-on sang Dios amo gid ang sentro sang imo kabuhi? (Efeso 5:15-17) Tuhoy sa epekto sa mga Cristiano sa Asia, sa Galacia, kag iban pa nga Romanong probinsia sang ila natun-an, si apostol Pedro nagsulat sa ila: “Bisan pa wala gid ninyo makita [si Jesucristo], ginahigugma ninyo sia. . . . Nagapakita kamo sing pagtuo sa iya kag nagakasadya sing daku upod ang dimabungat kag mahimayaon nga kalipay.”—1 Pedro 1:8.
10. (a) Ano walay duhaduha ang kabangdanan sang gugma sang unang mga Cristiano kay Jesus? (b) Paano man kita makabenepisyo?
10 May butang pa nga walay duhaduha nagpadaku sang gugma para sa Anak sang Dios nga nabatyagan sadtong unang mga Cristiano nga ginsulatan ni Pedro. Ano yadto? Sang tion nga ginsulat ni Pedro ang iya unang sulat, sa dimagkubos duha sang mga Ebanghelyo—kay Mateo kag kay Lucas—ang nasulat na. Ang unang siglo nga mga Cristiano nga wala gid makakita kay Jesus makabasa sining kasaysayan sang Ebanghelyo. Amo man kita. Ang mga Ebanghelyo indi hinimohimo nga mga kasaysayan; makita sa sini ang tanan nga kinaiya sang labing masaligan nga maragtas. Sa sining inspirado nga mga rekord, madamo ang aton makita nga magapadaku sang aton gugma para sa Anak sang Dios.
Ang Espiritu nga Iya Ginpakita
11, 12. Ano ang yara sa espiritu nga ginpakita ni Jesus sa iban nga mga tawo ang nagapahulag sa imo nga higugmaon sia?
11 Sa nasulat nga rekord sang kabuhi ni Jesus, natun-an naton kon paano sia nakig-angot sa iban nga mga tawo. Ang espiritu nga iya ginpakita nagatandog sa tagipusuon sang mga tawo bisan karon, pagkalipas sang kapin sa 1,960 ka tuig nga napatay sia. Ang tanan nga nagakabuhi ginabug-atan sa mga epekto sang sala. Minilyon ang nangin biktima sang inhustisya, pagpakig-away batok sa balatian, ukon bangod sa iban nga mga rason nagabatyag sing makapabakho nga kapaslawan. Sa sini tanan nga tawo, si Jesus nagasiling: “Kari sa akon, kamo tanan nga ginabudlayan kag ginabug-atan, kag papahuwayon ko kamo. Itakud ang akon gota kag magtuon kamo sa akon, kay ako malulo kag mapainubuson sing tagipusuon, kag makakita kamo sing kapahuwayan sa inyo mga kalag. Kay ang akon gota mahulas kag ang akon lulan mamag-an.”—Mateo 11:28-30.
12 Nagpakita si Jesus sing mahinuklugon nga kabalaka para sa mga imol, ginagutom, kag sa mga nagakasubo. Sang kinahanglanon gid suno sa mga kahimtangan, nagpakaon gani sia sa dakung kadam-an sing milagruso. (Lucas 9:12-17) Ginhilway niya sila gikan sa nagaulipon nga mga tradisyon. Ginpalig-on man niya ang ila pagtuo sa aman sang Dios nga tapuson ang pagpigos sang politika kag sang pangabuhi. Wala gindugmok ni Jesus ang espiritu sang mga tawo nga daan na nga nagapangasubo. Upod ang pagpalangga kag gugma, malantipon nga ginlipay niya ang mga mahagop. Ginpapagsik niya ang mga tawo nga kaanggid sang nahanog nga mga tabun-ak nga natungli kag ang mga tawo nga kaanggid sa pabilo nga nagairaw nga malapit na mapalong. Tubtob sa karon, ang iya ngalan nagapapagsik sing paglaum, bisan sa tagipusuon sang mga tawo nga wala gid makakita sa iya.—Mateo 12:15-21; 15:3-10.
13. Ngaa ang paagi sang pagtratar ni Jesus sa mga makasasala nagaganyat sa mga tawo?
13 Wala ginkahamut-an ni Jesus ang pagpakasala, apang nagpakita sia sing pagkamahinangpanon sa mga tawo nga nakasala sa kabuhi apang naghinulsol kag nangayo sa iya sing bulig. (Lucas 7:36-50) Naglingkod sia kag nagkaon upod sa mga tawo nga gintamay sa komunidad kon ginbatyag niya nga magahatag ini sing kahigayunan sa pagbulig sa ila sa espirituwal. (Mateo 9:9-13) Subong resulta sang espiritu nga ginpakita niya, minilyon ka tawo sa kaanggid nga mga kahimtangan nga wala gid makakita kay Jesus ang napahulag nga kilalahon sia kag magtuo sa iya.
14. Ano ang nagaganyat sa imo tuhoy sa paagi sang pagbulig ni Jesus sa mga tawo nga nagabalatian, inutil, ukon nagakalisod?
14 Ang paagi sang pagtratar ni Jesus sa mga tawo nga nagabalatian ukon inutil nagahatag sing pamatuod sa iya pagkamahigugmaon kag pagkamainawaon subong man sa iya ikasarang sa pagdala sing paumpaw. Sa amo, sang magpalapit sa iya ang isa ka tawo nga aruon kag nakiluoy sing bulig, wala si Jesus mangil-ad sang makita sia. Kag wala niya pagsugiri ang tawo nga, bisan pa naluoy sia sa iya, grabe na gid ang iya balatian kag wala na sia sing mahimo. Ang tawo nagpakiluoy: “Ginuo, kon luyag mo lang, mapatinlo mo ako.” Sa walay pangalag-ag, gin-untay ni Jesus ang iya kamot kag gintandog ang aruon nga tawo, nga nagasiling: “Luyag ko. Magmatinlo ka.” (Mateo 8:2, 3) Sa isa pa ka okasyon nagtinguha ang isa ka babayi nga mag-ayo paagi sa patago nga pagtandog sa sidsid sang kunop ni Jesus. Gintratar sia ni Jesus sa isa ka maluluy-on kag makalipay nga paagi. (Lucas 8:43-48) Kag sang masugata niya ang isa ka kumpanyar sa lubong, natandog sia sang kaluoy sa nagakalisod nga balo nga babayi nga namatyan sing bugtong nga anak nga lalaki. Bisan pa wala gingamit ni Jesus ang gahom nga ginhatag sa iya sang Dios sa pag-aman sing pagkaon para sa iya kaugalingon sa milagruso nga paagi, gingamit niya ini agod banhawon ang napatay nga pamatan-on kag ginpasag-uli sia sa iya iloy.—Lucas 4:2-4; 7:11-16.
15. Paano ang pagbasa sang mga kasaysayan nahanungod kay Jesus kag pagpamalandong sa sini nagaapektar sa imo?
15 Samtang ginabasa naton ining mga kasaysayan kag nagapamalandong sa espiritu nga ginpakita ni Jesus, labi pa nga nagadaku ang aton gugma sa sining isa nga naghalad sang iya tawhanon nga kabuhi agod mahimo kita mabuhi sing dayon. Bisan pa wala gid naton sia makita, ginaganyat kita sa iya, kag luyag naton sundon ang iya mga tikang.—1 Pedro 2:21.
Ang Iya Mapainubuson nga Pagsalig sa Dios
16. Kay sin-o ginsentro ni Jesus ang una nga igtalupangod, kag ano ang ginpalig-on niya sa aton nga himuon naton?
16 Labaw sa tanan, ginsentro ni Jesus ang iya kag ang aton igtalupangod sa iya langitnon nga Amay, si Jehova nga Dios. Ginpakilala niya ang labing daku nga sugo sa Kasuguan, nga nagasiling: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.” (Mateo 22:36, 37) Ginlaygayan niya ang iya mga disipulo: “Magtuo kamo sa Dios.” (Marcos 11:22) Sang ang ila pagtuo nag-atubang sing daku nga pagtilaw, ginpalig-on niya sila: “Padayon kamo nga magpangamuyo.”—Mateo 26:41.
17, 18. (a) Paano ginpakita ni Jesus ang iya mapainubuson nga pagsalig sa iya Amay? (b) Ngaa ang ginhimo niya tuman gid ka importante sa aton?
17 Si Jesus mismo nagpakita sing huwaran. Ang pangamuyo isa ka importante nga bahin sang iya kabuhi. (Mateo 14:23; Lucas 9:28; 18:1) Sang mag-abot ang tion nga magpili sia sing iya mga apostoles, wala magsandig si Jesus sa iya lamang desisyon, bisan pa nga sang una sia ang nagadumala sa tanan nga anghel sa langit. Mapainubuson nga ginhinguyang niya ang bug-os nga gab-i sa pagpangamuyo sa iya Amay. (Lucas 6:12, 13) Sang gindakop sia kag malapit na mag-antos sing masakit nga kamatayon, nagdangop liwat si Jesus sa iya Amay, kag hugot nga nangamuyo. Wala niya ginhunahuna nga kilala gid niya si Satanas kag madali niya landason ang bisan ano nga mahimo planuhon sining malaut. Nahibaluan ni Jesus kon daw ano ka importante nga indi sia dapat mapaslawan. Mangin makahuluya gid ini nga kapaslawan para sa iya Amay! Kag mangin daku gid ini nga kapierdihan para sa katawhan, nga nagasandig para sa ila kabuhi sa halad nga ihatag pa ni Jesus!
18 Si Jesus makapila nga nangamuyo—sang kaupod sa iya mga apostoles sa isa ka hulot sa ibabaw sa Jerusalem kag sing labi pa ka hugot sang didto sa hardin sang Getsemani. (Mateo 26:36-44; Juan 17:1-26; Hebreo 5:7) Sang nagaantos sa usok sang pag-antos, wala niya pagpasipalahi ang mga tawo nga nagyaguta sa iya. Sa baylo, nangamuyo sia para sa mga tawo nga naghikot sing walay hinalung-ong: “Amay, patawara sila, kay wala sila makahibalo sang ila ginahimo.” (Lucas 23:34) Ginhuptan niya ang iya hunahuna nga nasentro sa iya Amay, ‘nagatugyan sang iya kaugalingon sa nagahukom sing matarong.’ Ang hingapusan nga mga pulong nga ginbungat niya sa usok sang pag-antos amo ang pangamuyo sa iya Amay. (1 Pedro 2:23; Lucas 23:46) Nagapasalamat gid kita nga, upod ang bug-os nga pagsalig kay Jehova, matutom nga gintapos ni Jesus ang tulumanon nga gintugyan sa iya sang iya Amay! Bisan pa wala gid naton makita si Jesucristo, ginahigugma gid naton sia bangod sang iya ginhimo!
Pagpabutyag sang Aton Gugma sa Iya
19. Sa pagpakita sing gugma kay Jesus, anong mga butang ang dapat naton likawan subong indi gid nagakaigo?
19 Paano kita makahatag sing pamatuod nga ang gugma nga aton ginasiling indi sa pulong lamang? Sanglit ang iya Amay, nga ginahigugma ni Jesus, nagadumili sang paghimo sing mga imahen kag pagtamod sa sini subong mga butang nga ginapatuhuyan sing debosyon, pat-od gid nga indi kita magadala sing kadungganan kay Jesus paagi sa pagkulintas sing isa ka imahen ukon paagi sa pagdala sing imahen sa mga kalye. (Exodo 20:4, 5; Juan 4:24) Wala kita nagapadungog kay Jesus bisan pa kon makapila kita nagatambong sa relihioso nga mga serbisyo kada semana, kon wala kita nagakabuhi nahisanto sa iya mga panudlo sa nabilin nga bahin sang semana. Si Jesus nagsiling: “Ang nagahupot sang akon mga sugo kag nagatuman sini, sia amo ang nagahigugma sa akon. Kag ang nagahigugma sa akon higugmaon sang akon Amay.”—Juan 14:21, 23; 15:10.
20. Ano ang pila ka butang nga magapakita nga ginahigugma gid naton si Jesus?
20 Anong mga sugo ang ginhatag niya sa aton? Una sa tanan, amo ang pagsimba sa matuod nga Dios, si Jehova, kag sa iya lamang. (Mateo 4:10; Juan 17:3) Bangod sang iya papel sa katuyuan sang Dios, nagtudlo man si Jesus nga dapat kita magtuo sa iya subong Anak sang Dios kag nga dapat naton ipakita ini paagi sa paglikaw sa malaut nga mga buhat kag paglakat sa kapawa. (Juan 3:16-21) Ginlaygayan niya kita nga pangitaon anay ang Ginharian sang Dios kag ang iya pagkamatarong, ginauna ini sangsa kabalaka sa pisikal nga mga kinahanglanon. (Mateo 6:31-33) Nagsugo sia nga maghigugmaanay kita subong sang paghigugma niya sa aton. (Juan 13:34; 1 Pedro 1:22) Kag ginsugo niya kita nga mangin mga saksi tuhoy sa katuyuan sang Dios, subong nga amo sia anay. (Mateo 24:14; 28:19, 20; Bugna 3:14) Bisan pa wala gid nila makita si Jesus, mga lima ka milyon ka Saksi ni Jehova karon ang ginapahulag sang matuod nga gugma sa iya nga tumanon ining mga sugo. Wala nagaluya ang ila determinasyon nga magmatinumanon bisan pa wala nila makita sing personal si Jesus. Ginatandaan nila ang ginsiling sang ila Ginuo kay apostol Tomas: “Bangod nga nakakita ka sa akon, nagtuo ka? Malipayon ang wala makakita kag walay sapayan nagatuo.”—Juan 20:29.
21. Paano kita makabenepisyo gikan sa pagtambong sa Memoryal sang kamatayon ni Cristo, nga hiwaton karon nga tuig sa Domingo, Marso 23?
21 Ginalauman nga isa ikaw sa mga tawo sa bug-os nga kalibutan nga magatipon sa mga Kingdom Hall sang mga Saksi ni Jehova pagtunod sang adlaw sa Domingo, Marso 23, 1997, agod dumdumon ang labing daku nga kapahayagan sang gugma sang Dios sa katawhan kag agod saulugon ang kamatayon sang iya matutom nga Anak, si Jesucristo. Ang ihambal kag himuon sa amo nga okasyon dapat magpadaku pa sang aton gugma kay Jehova kag sa iya Anak kag gani magapabaskog sang aton handum nga tumanon ang mga sugo sang Dios.—1 Juan 5:3.
Paano Mo Sabton?
◻ Paano nakilala kag ginhigugma si Jesus sang mga tawo nga ginpadalhan sang una nga tulun-an ni Pedro?
◻ Ano ang pila sang mga butang nga nabatian sang unang mga Cristiano ang nagapadayaw sa imo?
◻ Ano sa espiritu nga ginpakita ni Jesus ang nagapadaku pa gid sang imo gugma sa iya?
◻ Ngaa importante gid sa aton ang mapainubuson nga pagsalig ni Jesus sa Dios?
◻ Paano naton mapakita ang aton gugma kay Jesucristo?
[Kapsion sa pahina 16]
Ginaganyat kita kay Jesus bangod sang espiritu nga iya ginpakita