Makapati Ka Bala sa Dios Subong Isa ka Persona?

“INDI na kinahanglan nga magpati ikaw sa Dios agod mangin isa ka Cristiano . . . Bahin kita karon sang bug-os nga pagbag-o, apang sa ika-21 nga siglo ang simbahan mangin wala na sing Dios sa tradisyonal nga kahulugan,” paathag sang isa ka tigulang nga kapelyan sa unibersidad sang Britanya. Naghambal sia subong tiglawas sang Sea of Faith nga kahublagan nga ginasakdag sang dimagkubos sa isa ka gatos ka Britanikong pari. Ining “mga Cristianong ateista” nagasiling nga ang relihion ginhimo lamang sang mga tawo kag nga, subong sang ginsiling sang isa ka katapo, ang Dios “isa [lamang] ka ideya.” Ang labaw sa kinaugali nga Dios wala na nagahisanto sa ila panghunahuna.

“Ang Dios patay” amo anay ang bantog nga hulubaton sang dekada 1960. Ginpabanaag sini ang pagtamod sang Aleman nga pilosopo nga si Friedrich Nietzsche sang ika-19 nga siglo kag naghatag sa madamo nga pamatan-on sing balibad sa paghimo sing naluyagan nila, sa pagpaayaw sa hilway nga paghuliray kag pagpatuyang sa pag-abuso sa droga. Apang ina bala nga kahilwayan naghatag sa mga flower child, subong amo ang pagkilala sa ila, sing isa ka mas makaalayaw nga kalipay sa kabuhi?

Sang amo man nga dekada, ginbalhag sang Anglikano nga obispo nga si John A. T. Robinson ang iya kontrobersial nga libro nga Honest to God. Madamo sang iya kaupod nga klerigo ang nagmulay sa iya bangod sang iya paghunahuna sa Dios “subong isa ka bahin lamang sang madamo nga eksperiensia sang tawo.” Ang propesor sa teologo nga si Keith Ward namangkot: “Ang pagpati bala sa Dios isa na lang ka kinaraan nga disparatis, nga ginasikway karon sang mga mangin-alamon?” Sa pagsabat sang iya pamangkot, sia nagsiling: “Wala na sing labi pa ka importante sa relihion karon sangsa pagbalik sing ihibalo tuhoy sa tradisyonal nga ideya nahanungod sa Dios.”

Ang Pag-antos kag ang Dios Subong Persona

Madamo sang nagapati sa Dios subong persona ang nabudlayan sa pag-angot sang ila pagpati sa mga trahedya kag pag-antos nga ila makita. Halimbawa, sang Marso 1996, 16 ka lamharon nga kabataan, upod sa ila manunudlo, ang ginpaniro kag napatay sa Dunblane, Scotland. “Indi ko gid mahangpan ang kabubut-on sang Dios,” siling sang isa ka naligban nga babayi. Ang kalisang tuhoy sa trahedya ginpabutyag sa isa ka ginbilin nga card upod sa mga bulak sa guwa sang eskwelahan sang kabataan. Nasulat sa sini ang isa ka tinaga, “NGAA?” Sa pagsabat ang isa ka ministro sa Simbahan sang Dunblane nagsiling: “Wala sing paathag sa sini. Indi namon masabat kon ngaa dapat ini matabo.”

Sang ulihi sa amo man nga tuig, ang bantog lamharon nga klerigo sang Simbahan sang Inglaterra makangilidlis nga ginpatay. Ginreport sang Church Times nga nabatian sang nakibot nga kongregasyon nga nagahambal ang punong deakono sang Liverpool nga “sulitsulit nga nagapamangkot sa Dios sing ngaa? ngaa?” Ining klerigo wala man sing makapaumpaw nga tinaga gikan sa Dios nga isa ka persona.

Ano, nian, ang aton dapat patihan? Makatarunganon ang pagpati sa Dios subong isa ka persona. Amo ini ang yabi sa pagsabat sa mga pamangkot nga ginpautwas sa ibabaw. Ginaagda namon kamo nga binagbinagon ang mga ebidensia nga ginapresentar sa masunod nga artikulo.

[Kapsion sa pahina 3]

Ang card nagapamangkot sing “Ngaa?”

[Credit Line]

NEWSTEAM No. 278468/Sipa Press