Pagpakita sing Gugma sa mga Nagakinahanglan
ANG mga Cristiano may obligasyon kag pribilehiyo sa pagpakita sing gugma sa ila mga kauturan nga lalaki kag babayi nga nagakinahanglan. (1 Juan 3:17, 18) Si apostol Pablo nagsulat: “Magbuhat kita sang maayo ayon sa tanan nga tawo, apang labi na gid sa mga may labot sa aton sa pagtuo.” (Galacia 6:10) Ang isa ka utod nga lalaki nga nagaalagad kay Jehova sa sulod sang halos apat ka dekada nakaeksperiensia sining karon lang sing gugma sang Cristianong paghiliutod sa tion sang pagmasakit kag pagkapatay sang iya asawa. Sia nagsulat:
“Sanglit ako ang nagaatipan sang akon asawa sa balay sang nagamasakit sia, wala ako makatrabaho sa sulod sang halos duha ka bulan. Naumpawan gid ako sang ang mga abyan sa kongregasyon kinabubut-on nga nagbulig sa amon! Madamo kami sing nabaton nga regalo nga kuwarta—‘sa pagbulig sa mga kagastuhanan,’ subong sang ginasiling sang kaupod nga mga kard—bayad para sa bulanan nga arkila, mga kagamitan, kag iban pa nga mga kagastuhanan.
“Duha ka semana antes mapatay ang akon asawa, ang amon manugtatap sa sirkito makapalig-on nga nagduaw sa amon. Ginpakita pa gani niya ang mga slide nga pagatan-awon sang kongregasyon sa talipuspusan sang semana. Nakapamati kami sa mga miting paagi sa telepono—lakip ang mga miting para sa pagguwa sa latagon nga ginadumalahan sang manugtatap sa sirkito. Sa isa sining mga miting, ginpahambal niya sing tingob ang grupo sang manugbantala sing ‘hello’ sa akon asawa. Busa, bisan wala sia nagapakig-upod sing pisikal, wala sia magbatyag nga nagaisahanon.
“Sa sulod sang isa ka oras matapos sia mapatay, halos ang tanan nga mga gulang nagduaw sa balay. Kapin sa isa ka gatos ka utod nga lalaki kag babayi ang nagduaw sa sina lamang nga adlaw. Ang pagkaon maalwan nga gin-aman sang mga kauturan amo nga may bastante nga kalan-on para sa tanan. Indi ko na madumduman ang tanan nga regalo, tinaga sing simpatiya, makapaumpaw nga mga pulong, kag mga pangamuyo para sa akon. Makapalig-on gid ini! Sang ulihi ginpangabay ko na ang mga kauturan nga untatan ang pag-aman sing pagkaon kag ang pagbulig sa pagtinlo sa balay!
“Indi bala nga sa organisasyon lamang ni Jehova naton makita ang subong sina nga pagpabutyag sang dimakagod nga kaawa, kabalaka, kag gugma? Madamo nga tawo karon ang makaisip sa ila kamot sang kadamuon sang ila matuod nga mga abyan. Ginpakamaayo kita ni Jehova sing isa ka daku masangkad nga pamilya sang espirituwal nga mga utod nga lalaki kag babayi!”—Marcos 10:29, 30.