Report sang mga Manugbantala sang Ginharian
Ang Pagbatas Nagadul-ong sa Pagpakamaayo sang Dios sa Malawi
SI Jose isa anay ka matutom nga alagad ni Jehova. (Hebreo 11:22) Isa man sia ka mabinatason gid nga tawo. Bisan nga ginluiban sia sang iya mga kauturan, duha ka beses nga ginbaligya subong ulipon, kag sang ulihi ginbilanggo sa sayop nga mga panumbungon, wala magluya ang espiritu ni Jose. Sa baylo, mapainubuson nga ginbatas niya ang mga tuig sang kapipit-an, mapainubuson nga naghulat sa pagpakamaayo ni Jehova.—Genesis 37:23-28, 36; 39:11-20.
Amo man sa karon, ang mga Saksi ni Jehova sa Malawi mapainubuson nga naghulat sa pagpakamaayo sang Dios. Sa sulod sang 26 ka tuig, ginbatas sining Cristianong mga Saksi ang mga pagdumili sang gobierno, daku nga pagpamatok, kag madamo nga pagpamintas. Apang nangin mapuslanon ang ila pagbatas!
Sang magsugod ang paghingabot sa Malawi sang talipuspusan sang 1967, may mga 18,000 ka manugbantala sang Ginharian. Handurawa ang kalipay sang mga Saksi sang mahibaluan nila nga ang 1997 nga tuig sang pag-alagad nagsugod nga may bag-o nga kataason nga 38,393 ka manugbantala—mas madamo sing kapin sa duha ka pilo sangsa pagsugod sang pagdumili! Dugang pa, ang nagtambong sa 13 ka “Mga Mensahero sang Diosnon nga Paghidait” Distrito nga mga Kombension nga ginhiwat sa Malawi naglab-ot sa kapin sa 117,000. Sa pagkamatuod, ginpakamaayo ni Jehova ang ila pagtuo kag pagbatas.
Ang isa ka halimbawa sining pagpakamaayo amo ang eksperiensia sang 14-anyos nga bata nga lalaki nga si Machaka. Sang ginbaton ni Machaka ang tanyag nga magtuon sa Biblia upod sa mga Saksi ni Jehova, naakig kaayo ang iya mga ginikanan. Nagsiling sila: “Kon luyag mo mangin isa ka Saksi, kinahanglan nga maglayas ka sa balay.” Apang, wala mapauntat sining pamahog ang iya pagtuon. Subong resulta, ginkuha sang mga ginikanan ni Machaka ang tanan niya nga panapton. Naghulag ang mga kauturan paagi sa pagbakal sa iya sing dugang nga mga bayo. Sang mahibaluan ini sang mga ginikanan ni Machaka, ginsilingan nila sia: “Kon suportahan ikaw sang mga Saksi, maghalin ka kag magpuyo upod sa ila.” Pagkatapos mabinagbinag sing maayo ang kahimtangan, naghalin si Machaka sa ila puluy-an, kag ginsapupo sia sang isa ka pamilya sa lokal nga kongregasyon.
Naugot gid ang mga ginikanan ni Machaka amo nga namat-od sila nga maghalin sa ila lugar agod makalikaw sa mga Saksi. Siempre pa, ginsubuan sa sini si Machaka, apang naumpawan sia sang ginpaathag sang mga kauturan sa iya ang Salmo 27:10 nga nagasiling: “Kon biyaan ako sang akon amay kag iloy, nian sapupuhon ako ni Jehova.”
Sang ulihi, naghumok ang buot sang mga ginikanan ni Machaka, kag namat-od sia nga magpauli sa ila balay. Maathag nga napahulag gid sila sang determinasyon sang ila bata nga alagaron si Jehova bangod luyag man nila makatuon sing Biblia upod sa mga Saksi ni Jehova! Nagtambong man sila sa tatlo gid ka adlaw nga “Mga Mensahero sang Diosnon nga Paghidait” Distrito nga Kombension, kag pagkatapos sini nakasiling sila: “Sa pagkamatuod, amo ini ang organisasyon sang Dios.”
Huo, ang pagpamatok mahimo nga mabudlay, apang ang mainunungon nga mga mensahero sang Dios wala nagaampo. Maisugon sila nga nagapadayon, nakahibalo nga ang “kapipit-an nagapatubas sing pagbatas; ang pagbatas, sing nahamut-an nga kahimtangan.” (Roma 5:3, 4) Ang mga Saksi ni Jehova sa Malawi sarang makapamatuod nga ang pagbatas nagadul-ong sa pagpakamaayo sang Dios.