Laglagon Bala sang Dios ang Kalibutan?
SUNO kay Papa Juan Paulo II, ang mga tawo makatulok nga may pagsalig sa palaabuton. Sa bug-os nga maragtas, siling niya, “ang mga tawo padayon nga nagapakasala, ayhan sing grabe pa sangsa ginlaragway anay antes sang anaw.” Walay sapayan sini, ang papa nagapaathag, “suno sa katipan sang Dios kay Noe nahangpan naton nga wala na sing sala nga magapahulag sa Dios nga laglagon ang kalibutan nga iya mismo gintuga.”
Matuod bala nga indi na paglaglagon sang Dios ang kalibutan? Ang Biblia nagasiling nga pagkatapos sang Anaw, ang Dios nagsiling kay Noe: “Indi na pagpapason ang tanan nga unod sang mga tubig sang anaw, kag wala na sing anaw nga magalaglag sa duta.” (Genesis 9:11) Ang papa nagasiling nga paagi sining mga pinamulong ang Dios “nangako nga amligan niya [ang duta] gikan sa kalaglagan.”
Ginapaathag sang Biblia nga indi pagtugutan sang Manunuga nga malaglag ang aton planeta. “Ang duta nagatindog tubtob sa tion nga wala sing pat-od,” siling sang Biblia. (Manugwali 1:4) Apang kapin pa ang matun-an sa Anaw—butang nga wala makumentuhan sang papa.
Si Jesus nagsiling nga ang mga kahimtangan sa duta sa tion sang iya palaabuton nga presensia mangin “kaangay sang mga adlaw ni Noe,” sang ang mga tawo “wala magsapak tubtob nga nag-abot ang anaw kag naglunod sa ila tanan.” (Mateo 24:37-39) Sing kaanggid, si apostol Pedro nagsulat nga subong nga ang “kalibutan sadto nga tion nalaglag sang ginlapawan ini sang tubig,” amo man ang nagahulat sa karon nga kalibutan sa “adlaw sang paghukom kag kalaglagan sang mga tawo nga didiosnon.”—2 Pedro 3:5-7.
Nalimtan bala ni Jesus kag ni Pedro ang tuhoy sa pagpakigkatipan sang Dios kay Noe? Wala gid! Subong sang ginsiling niya sa iya pagpakigkatipan kay Noe, indi magagamit ang Dios sang anaw agod tapuson ining malauton nga sistema sang mga butang. Sa baylo, gamiton niya ang gahom sang “Hari sang mga hari kag Ginuo sang mga ginuo,” si Jesucristo. (Bugna [Apokalipsis] 19:11-21) Busa, suno sa Biblia, ang duta indi malaglag, kundi ang “kalibutan” sang malauton nga katawhan amo ang pat-od nga pagalaglagon. (Hulubaton 2:21, 22; Bugna 11:18) Pagkatapos sina, “ang mga matarong magapanubli sang duta, kag magapuyo sa sini sing dayon.”—Salmo 37:29.