Ano ang Palaabuton sang Aton Duta?
“Wala na sing iban pa nga siglo sa rekord ang makatupong sa ika-20 kon tuhoy sa makasiligni nga kasingki sibil, sa kadamuon sang pag-ilinaway, sa resulta nga mga guban sang refugee, sa minilyon ka tawo nga napatay sa mga inaway, kag sa kadakuon sang gasto para sa ‘depensa,’ ” siling sang World Military and Social Expenditures 1996. Magabag-o pa ayhan ini nga kahimtangan?
Ginpahanumdom ni apostol Pedro ang mga Cristiano tuhoy sa ginsaad sang Dios siniglo na ang nagligad: “Nagahulat kita sing bag-ong mga langit kag bag-ong duta suno sa saad [sang Dios], kag sa sini magapuyo ang pagkamatarong.” (2 Pedro 3:13) Ining mga pulong bahin anay sang tagna ni Isaias. (Isaias 65:17; 66:22) Naeksperiensiahan sang dumaan nga Israel ang una nga katumanan sang ang pungsod ginpabalik sa ginsaad nga duta sa tapos mabihag sa Babilonia sa sulod sang 70 ka tuig. Paagi sa pagsulit sa saad nga “bag-ong mga langit kag bag-ong duta,” ginpakita ni Pedro nga ang tagna matuman pa sa daku nga kasangkaron—sa bug-os nga kalibutan!
Kabubut-on sang Dios ang pagpaluntad sing matarong nga mga kahimtangan sa bug-os nga duta, kag pahanabuon ini paagi sa iya langitnon nga Ginharian upod kay Cristo subong Hari. “Ang pungsod indi magabayaw sing espada batok sa pungsod, kag indi na sila magtuon sing inaway.” (Isaias 2:4) Ining bug-os nga paghidait kag kalig-unan sa duta amo ang gintudlo ni Jesus sa iya mga sumulunod nga paabuton kag ipangamuyo sa kinaandan nga ginatawag Amay Namon, ukon Pangamuyo Sang Ginuo, nga nagasiling: “Magkari ang imo ginharian. Matuman ang imo kabubut-on kon paano sa langit, amo man sa duta.”—Mateo 6:9, 10
Malipay ka bala magpuyo sa isa ka kalibutan nga matarong subong sang sa langit? Amo ina ang paglaum nga ginatanyag sang Biblia sa tagsatagsa nga nagatinguha nga kilalahon ang Dios sing bug-os tagipusuon kag magkabuhi suno sa iya matarong nga mga dalanon.