Ngaa Nagabiya Sila sa Relihion?
SADTONG tungatunga nga bahin sang ika-19 nga siglo, halos indi mo mabatian sa isa ka pumuluyo sang Prussia (karon naaminhan nga Alemanya) nga nagasiling nga wala sia sing relihion. Sa katunayan, ginapanilagan sang mga pulis ang isa nga nagasaylo halin sa panguna nga relihion pakadto sa nagsipak nga simbahan. Nagbag-o na gid ang kahimtangan!
Sa karon, madamo nga Aleman ang nagahalin sa mga simbahan. Ginreport nga 1 sa 4 kuno ang nagasiling nga wala sila sing relihion. Amo man sini ang nagakatabo sa Austria kag Switzerland. Kon ang mga katapo amo ang dugo sang isa ka relihion, nian, subong sa ginsiling sang Aleman nga manunulat nga si Reimer Gronemeyer, “ang mga simbahan sa Europa ginadugo sa kamatayon.”
Kon Ngaa Ginasikway Nila ang Relihion
Ngaa ginasikway sang madamo ang organisado nga relihion? Sa masami, bangod sang pinansial nga mga rason, ilabi na sa mga kadutaan diin ginapabayad ang mga katapo sing buhis sa simbahan. Madamo ang nagapamangkot, ‘Ngaa ang kuwarta nga ginputuyputuyan ko nagakadto sa simbahan?’ Ang iban nalas-ayan bangod sang daku nga manggad kag gahom sang simbahan. Mahimo gid nga nagaugyon sila kay Kardinal Joachim Meisner sang Cologne, Alemanya, nga nagsiling nga ang manggad sang simbahan mahimo nagaimpluwensia nga hatagan sini sing daku gid nga igtalupangod ang materyal nga mga butang kag “indi ang sinsero nga pagtuo kay Cristo.”
Ang iban nagabiya sa ila simbahan bangod nakita nila ini nga makatalaka, indi makawiwili, kag indi makapaayaw sa ila espirituwal nga pagkagutom. Ginagutom sila suno sa gintagna ni manalagna Amos, ‘ginagutom, indi sa kalan-on, kag kauhaw, indi sa tubig, kundi sa pagpamati sa mga pulong ni Jehova.’ (Amos 8:11) Bangod halos wala sila sing nabaton nga kalan-on gikan sa ila relihion, naghalin sila sa sini.
Bisan pa matuod ining mga problema, nagakaigo bala nga sikwayon na ang tanan nga relihion? Handurawa ang isa ka gutom nga tawo nga nakakita sing daw tinapay tan-awon. Apang, sang ginkaon niya ini, nasapwan niya nga serin lang gali ini. Indi na bala sia magkaon kag busgon ang iya gutom? Indi, mangita sia sing matuod nga kalan-on. Sing kaanggid, kon ang isa ka relihion wala makabusog sa espirituwal nga pagkagutom sang mga katapo sini, sikwayon na bala nila ang relihion? Ukon mas maalamon bala nga mangita sila sing paagi nga mabusog ang ila pagkagutom sa espirituwal? Amo sina ang ginhimo sang madamo, subong sang ginapakita sang masunod nga artikulo.