“Sin-o Bala ang Nag-anak sang mga Tinulo sang Tun-og?”

GINLARAGWAY sang isa ka dyurnalista sang ika-19 nga siglo ang mga tinulo sang tun-og subong “ang likido nga mga hiyas sang duta, nga ginahimo sang hangin.” Ginpamangkot sang aton Manunuga ang patriarka sang una nga si Job: “Sin-o bala ang nag-anak sang mga tinulo sang tun-og?” (Job 38:28) Ginpahanumdom sang Dios si Job nga ang hamili nga tun-og naghalin sa iya.

Luwas sa nagainggat, kaangay sa hiyas nga katahom, ginaangot sang Biblia ang tun-og sa pagpakamaayo, pertilidad, kabuganaan, kag sa pagpreserbar sang kabuhi. (Genesis 27:28; Deuteronomio 33:​13, 28; Zacarias 8:12) Sa tion sang mainit, walay ulan nga panag-on sa Israel, “ang tun-og sa Hermon” nag-amlig sa gamhon sang duta, kag busa sang mga pumuluyo sini. Ang puno sing kakahuyan kag may yelo nga putukputukan sang Bukid Hermon padayon nga nagapatubas sing alisngaw sa gab-i nga nagatubig agod mangin bugana nga tun-og. Ginpaanggid sang salmista nga si David ang paumpaw nga madala sini nga tun-og sa makalilipay nga kahimtangan kon magpuyo sing nahiusa upod sa mga masigkasumilimba ni Jehova.​—⁠Salmo 133:⁠3.

Ang mga instruksion ni manalagna Moises sa Israel malum-ok kag makapaumpaw, kaangay sang mga tinulo sang tun-og. Sia nagsiling: “Ang akon hambal magatulo subong sang tun-og, subong sang dabodabo sa hilamon kag subong sang talithi sa gamhon.” (Deuteronomio 32:⁠2) Sa karon, ginabantala sang mga Saksi ni Jehova ang nagahatag-kabuhi nga maayong balita sang Ginharian sang Dios tubtob sa mga ukbong sang duta. (Mateo 24:14) Ginahatag sang Dios ang imbitasyon: “ ‘Kari!’ Kag ang bisan sin-o nga ginauhaw magkari; ang bisan sin-o nga maluyag magkuha sing walay bayad nga tubig sang kabuhi.” (Bugna 22:17) Minilyon sang katawhan sa tanan nga kapungsuran ang nagabaton sini nga tanyag sang espirituwal nga paumpaw gikan sa Dios, nga makasakdag sang kabuhi sing dayon.