Isa ka Hilikuton nga “Talahuron”

GINLAYGAYAN ni apostol Pedro ang iya masigka-Cristiano: “Hupti ang inyo maayo nga paggawi sa tunga sang mga pungsod, agod paagi sa butang nga ginahambal nila batok sa inyo subong mga malauton, sila subong resulta sang inyo maayong binuhatan nga ila nasaksihan magahimaya sa Dios sa adlaw sang iya pag-usisa.” (1 Pedro 2:12) Ginpadayag sang mga Saksi ni Jehova sa Italya ining maayong paggawi sa sulod na sang madamo nga tinuig. Subong sang ginsugo ni Jesus nga “magbantala sa mga atop,” ginahimo nila sing dayag ang ila Cristianong hilikuton, nga makita sang publiko. (Mateo 10:27; Juan 18:20) Busa, sang ang isa ka abogado kag isa ka pari sa Italya nagbalhag sing mga panumbungon nga ang mga Saksi ni Jehova “isa ka nagapakunokuno nga relihioso nga sekta” kag ginlakip sila sa “sekreto nga mga organisasyon nga nagasiod sa katawhan,” namat-od ang mga Saksi ni Jehova nga maghimo sing legal nga aksion bangod sang mapasipalahon nga mga panumbungon.

Sa una nga kasaba, nagdesisyon ang korte nga wala sing nalapas nga kasuguan ang abogado kag ang pari. Apang, sang Hulyo 17, 1997, ginsikway sang Hukmanan sa Apelasyon sang Venice ang una nga desisyon sang korte, kag napamatud-an sini ang duha ka akusado nga nakasala. Ang Hukmanan sa Apelasyon nagsiling: “Ang ginbalhag nga mga artikulo nga ginapatuhuyan nagaunod sing mga ekspresyon kag mga dinalan nga makaguba sang reputasyon sang mga sumulunod sang relihion nga ‘mga Saksi ni Jehova.’ Maathag nga ang katuyuan sang artikulo amo nga ipadayag ang mga sumulunod sini sa kaugot sang publiko.” Ginsiling sang korte nga ang mga artikulo “indi makatarunganon nga paggamit sang kinamatarong sa pagreport kag sa paghukom.” Ginpamulta sang korte ang duha ka akusado kag ginmanduan man sila nga bayaran ang tanan nga gasto sang korte, lakip ang mga kagastuhanan sang mga Saksi sa korte sa duha ka kaso.

Sa nasulat sini nga pamatbat, ang Hukmanan sa Apelasyon sang Venice nagkomento: “Paagi lamang sa pagpatuman sing alangay kag pag-amlig sa tanan nga kinamatarong nga ginagarantiya sang Konstitusyon sang [Italya] nga posible matapna ang mga porma sang pagkadimapahanuguton kag relihioso nga pagkapanatiko.” Ginkilala sang pamatbat nga ang hilikuton sang mga Saksi ni Jehova indi sekreto ukon relihioso nga pagpakunokuno. “Ang paglakip sa mga Saksi nga isa sang sekreto nga mga organisasyon,” patalupangod sang korte, “wala gani nagatahod sa mga pamatuod, kay ang ginhinambitan nga relihion masapwan sa madamo nga siudad kag ang masangkad nga pagbantala nga ginahimo sang mga miembro sini, ilabi na sa talipuspusan sang semana kag sa iban nga mga piesta opisyal, kilala gid kag talahuron ang mga panikasog, bisan ano pa ang hunahunaon sang isa sa mga doktrina nga ginabantala.” Sa amo, ang rekord sang makugi nga pagbantala kag huwaran nga paggawi sang mga Saksi ni Jehova sa Italya nakabulig sa pagdula sang mga pag-ihig-ihig batok sa ila.​—⁠Mateo 5:​14-16; 1 Pedro 2:⁠15.