Madumduman Mo Bala?

Nabinagbinag mo na bala sing maayo ang bag-o nga mga guwa sang Ang Lalantawan? Kon amo, mawili ka sa paghinumdom sang mga masunod:

◻ Ngaa dimakatarunganon ang doktrina sang predestinasyon?

Kon ang Dios nakahibalo nga daan kag nagtagna sang pagkahulog sa sala ni Adan, nian si Jehova mangin awtor sang sala sang ginhimo niya ang tawo kag sia ang mangin balasulon sang tanan nga kalautan kag pag-antos sang tawo. Maathag nga indi ini mapahisanto sa kamatuoran nga si Jehova isa ka Dios sang gugma nga nagadumot sa kalautan. (Salmo 33:5; Hulubaton 15:9; 1 Juan 4:⁠8)​—⁠4/15, pahina 7, 8.

◻ Sa katumanan sang Isaias 2:​2-4, ano ang ginahimo sang katawhan sa madamo nga kapungsuran?

Samtang nagadugok sila sa balay sang pagsimba ni Jehova, nagalikaw man sila sa ‘pagtuon sing inaway,’ bangod ginabutang nila ang ila pagsalig sa proteksion sang langitnon nga mga kasuldadusan sang Dios, nga handa sa paglaglag sa tanan nga mga kaaway sang paghidait.​—⁠4/15, pahina 30.

◻ Sin-o ang mga gamhanan sang Dios nga ginsambit sa Joel 3:​10, 11?

Mga 280 ka beses sa Biblia, ang matuod nga Dios ginatawag nga si “Jehova sang mga kasuldadusan.” (2 Hari 3:14) Ining mga kasuldadusan amo ang gamhanan nga mga hubon sang mga anghel sa langit, nga nakahanda sa pagtuman sang sugo ni Jehova.​—⁠5/1, pahina 23.

◻ Anong leksion ang aton matun-an sa pagsugo sang Dios kay Job nga ipangamuyo yadtong nakasala sa iya? (Job 42:⁠8)

Antes gin-ayo si Job, ginsugo ni Jehova nga magpangamuyo sia para sa mga nakasala sa iya. Ginapakita sini nga ginaobligar kita ni Jehova nga pasayluhon naton ang nakasala sa aton antes mapatawad ang aton mga sala. (Mateo 6:12; Efeso 4:32)​—⁠5/1, pahina 31.

◻ Ano ang buot silingon ni Santiago sang magsiling sia: “Pahikuta sing bug-os ang pagbatas”? (Santiago 1:⁠4)

Ang pagbatas may buluhaton, may “hilikuton.” Ang hilikuton sini amo ang paghimo sa aton nga bug-os sa tanan nga bahin. Gani, paagi sa pagtugot sa mga pagtilaw nga mahanabo nga wala sing bisan anong mga panikasog nga maggamit sing dimakasulatanhon nga mga pamaagi agod matapos ini sa gilayon, ang aton pagtuo ginatilawan kag ginaputli.​—⁠5/15, pahina 16.

◻ Ngaa naghulat ang Dios sing tuman kadugay sa paglubad sang mga problema sang katawhan?

Ang pagtamod ni Jehova sa tion tuhay sa aton. Para sa dayon nga Dios, ang tion kutob sa pagtuga kay Adan tubtob karon wala pa gani isa ka semana. (2 Pedro 3:⁠8) Apang ano man ang aton pagtamod sa tion, ang tagsa ka adlaw nga nagaligad labi pa nga nagapapalapit sa aton sa adlaw sang kaakig ni Jehova.​—⁠6/1, pahina 5, 6.

◻ Ano ang nagapahulag sa mga Saksi ni Jehova?

Ang mga panudlo ni Jehova nagpatubas sing isa ka tumalagsahon nga katawhan, nga gintudluan sa paghigugmaanay sa isa kag isa kag sa ila isigkatawo subong sang ila kaugalingon. (Isaias 54:13) Ang gugma amo ang nagapahulag sa mga Saksi ni Jehova nga magpadayon sa pagbantala walay sapayan sang dipagsapak ukon paghingabot. (Mateo 22:​36-40; 1 Corinto 13:​1-8)​—⁠6/15, pahina 20.

◻ Ano ang ginapahangop sang mga pulong ni Jesus: “Panikasog kamo sing lakas gid agod makasulod sa ganhaan nga makitid”? (Lucas 13:⁠24)

Ang mga pulong ni Jesus nagapahangop sing paghimakas, pagpangabudlay naton sing lakas. Ginapakita man sang iya mga pulong nga ang iban mahimo nga magatinguha sa ‘pagsulod sa ganhaan’ sa tion lamang nga kombeniente sa ila, nga wala nagadali subong amo ang luyag nila. Sa amo, mahimo naton pamangkuton ang aton kaugalingon, ‘Nagapangabudlay gid bala ako sing lakas?’​—⁠6/15, pahina 31.

◻ Paano ang mga binanhaw “ginhukman bangod sa nasulat sa mga linukot suno sa ila binuhatan”? (Bugna 20:⁠12)

Ining mga linukot indi ang rekord sang ila nagligad nga binuhatan; sang napatay sila, ang mga sala nga nahimo nila sang nagakabuhi pa sila ginpatawad na. (Roma 6:​7, 23) Apang, ang ginbanhaw nga mga tawo yara gihapon sa Adanikong sala. Kon amo, ining mga linukot nagaunod sing mga instruksion sang Dios nga dapat sundon sang tanan agod makabenepisyo sing bug-os gikan sa halad ni Jesucristo.​—⁠7/1, pahina 22.

◻ Anong leksion para sa aton ang yara sa parabola ni Jesus tuhoy sa mahigugmaon sa isigkatawo nga Samaritano? (Lucas 10:​30-37)

Ginapakita sang parabola ni Jesus nga ang isa ka matarong gid nga tawo indi lamang nagasunod sa mga kasuguan sang Dios kundi nagailog man sang iya mga kinaiya. (Efeso 5:⁠1) Ginapakita man sini nga ang gugma sa isigkatawo nagalandas sang tanan nga mga balagbag sa rasa, kultura, kag relihion. (Galacia 6:10)​—⁠7/1, pahina 31.

◻ Ano ang tatlo ka bahin nga makilala mo ang imo nga anak kag maubayan sila subong mga ginikanan?

(1) Buligi ang imo mga anak sa pagpili sing nagakaigo nga sahi sang palamugnan; (2) ihanda sila sa pag-atubang sa emosyonal nga kahuol sa eskwelahan kag sa ulubrahan; (3) ipakita sa ila kon paano paayawan ang ila espirituwal nga mga kinahanglanon.​—⁠7/15, pahina 4.

◻ Ngaa nagpahuway ang Dios sa “ikapito nga adlaw”? (Genesis 2:​1-3)

Ang Dios wala magpahuway sa ikapito nga adlaw sang pagpanuga bangod sang kakapoy. Sa baylo, nag-untat sia sa hilikuton nga pagpanuga sa duta agod tugutan ang iya binuhatan nga mag-uswag kag makadangat sa kabug-usan nga himaya, sa iya kadayawan kag kadungganan.​—⁠7/15, pahina 18.

◻ Ano ang tatlo ka paagi nga kita makapakita sing katarungan?

Nahauna, dapat naton sundon ang moral nga mga talaksan sang Dios. (Isaias 1:17) Ikaduha, nagapakita kita sing katarungan kon ginatratar naton ang iban subong sang luyag naton nga pagtratar ni Jehova sa aton. (Salmo 130:​3, 4) Ikatlo, nagapakita kita sing diosnon nga katarungan kon kita maukod nga nagabantala. (Hulubaton 3:⁠27)​—⁠8/1, pahina 14, 15.