Pat-ura nga Unahon ang mga Ulunahon!

Gab-i na sang miting, apang may hilikuton ka pa. Diin ang imo unahon?

ISA ikaw ka bana kag amay. Samtang nagahingapos ang isa ka malawig, mabudlay nga adlaw sang trabaho, ginhunahuna mo ang miting sa kongregasyon sa sina nga gab-i. Kon maghalin ka dayon pagkatapos sang trabaho, hustuhan lang nga makapaligo ka, makailis, kag makakaon sing dalidali agod indi maulihi sa miting. Sa wala ginapaabot, nagpalapit ang imo amo kag ginsilingan ikaw nga mag-overtime. Nagsaad sia sing daku nga bayad. Kinahanglanon mo ang kuwarta.

Ukon isa ikaw ka asawa kag iloy. Samtang nagahanda ka sang panihapon, nakita mo ang isa ka tumpok sang wala maplantsa nga mga panapton, ang pila gamiton buwas. Namangkot ka sa imo kaugalingon, ‘Kon magtambong ako karon nga gab-i sa miting, san-o ako makapamalantsa?’ Bangod bag-o lang ikaw makatrabaho, narealisar mo kon daw ano kabudlay atipanon ang mga responsabilidad sa puluy-an samtang may palangitan-an.

Ukon isa ikaw ka estudyante. Sa imo kuwarto, nagatumpok ang imo homework sa lamesa. Kalabanan sa sini madugay na nga ginhatag, apang ginpabuyanbuyanan mo ini, kag karon ang pila sining mga asaynment dapat tapuson dayon. Daw ginasulay ikaw nga maglisensia sa imo mga ginikanan nga mapabilin ikaw anay sa puluy-an kag indi magtambong sa miting agod tapuson ang imo homework.

Diin sini ang imo unahon: ang ekstra sekular nga trabaho, ang pagpamalantsa, ang homework, ukon ang miting sa kongregasyon? Ano ang buot silingon, sa espirituwal nga paghambal, nga unahon ang ulunahon? Ano ang pagtamod ni Jehova?

Ano ang Dapat Unahon?

Wala madugay sa tapos nabaton sang mga Israelinhon ang Napulo ka Sugo, nadakpan ang isa ka tawo nga nagapangahoy sa Adlaw nga Inugpahuway. Istrikto nga ginadumilian ini sa Kasuguan. (Numeros 15:​32-34; Deuteronomio 5:​12-15) Paano mo hukman ang amo nga kaso? Pasayluhon mo bala ang tawo, nagapangatarungan nga, ti, wala sia magpangabudlay agod huptan ang maluho nga estilo sang pagkabuhi kundi agod mag-aman lamang sing mga kinahanglanon sang iya pamilya? Mangatarungan ka ayhan nga bangod madamo pa sing okasyon sa bug-os nga tuig nga tumanon ang Adlaw nga Inugpahuway, ang indi pagtuman sini sing makaisa, ayhan bangod sa kapaslawan sang tawo nga magplano sing abanse, mahapos lang pasayluhon?

Gintamod ni Jehova sing mas serioso ang amo nga kaso. “Sang ulihi,” siling sang Biblia, “si Jehova nagsiling kay Moises: ‘Patyon ang amo nga tawo.’ ” (Numeros 15:35) Ngaa naakig gid si Jehova sa ginhimo sang tawo?

Ang katawhan may anom ka adlaw sa pagpangahoy subong man sa pag-atipan sang ila mga kinahanglanon tuhoy sa pagkaon, panapton, kag puluy-an. Ang ikapito nga adlaw dapat ihinguyang sa ila espirituwal nga mga kinahanglanon. Samtang indi sayop ang magpangahoy, sayop nga gamiton ang tion nga dapat ginpain sa pagsimba kay Jehova. Bisan pa ang mga Cristiano wala napaidalom sa Mosaikong Kasuguan, wala bala ini nagatudlo sa aton sing isa ka leksion kon paano areglahon sing nagakaigo ang aton ulunahon nga mga butang karon?​—⁠Filipos 1:⁠10.

Sa tapos maghinguyang sing 40 ka tuig sa kahanayakan, handa na ang mga Israelinhon sa pagsulod sa Ginsaad nga Duta. Ang pila natak-an na sa pagkaon sang gin-aman sang Dios nga manna sa kahanayakan kag pat-od nga luyag nila bayluhan ang ila kalan-on. Agod buligan sila nga mahuptan ang nagakaigo nga pagtamod samtang nagasulod sila sa duta nga “nagailig ang gatas kag dugos,” ginpahanumdom sila ni Jehova: “Indi sa tinapay lamang mabuhi ang tawo kundi sa tagsa ka pulong nga nagaguwa sa baba ni Jehova.”​—⁠Exodo 3:8; Deuteronomio 8:⁠3.

Kinahanglan mangabudlay sing lakas ang mga Israelinhon para sa ila “gatas kag dugos.” Yara ang mga hangaway nga lutuson, mga balay nga patindugon, mga latagon nga tamnan. Walay sapayan sina, ginsugo ni Jehova ang katawhan sa pagpain sing tion kada adlaw sa pagpamalandong sa espirituwal nga mga butang. Dapat man sila maghinguyang sing tion sa pagtudlo sa dalanon sang Dios sa ila kabataan. Si Jehova nagsiling: “Kag itudlo man ninyo [ang akon mga kasuguan] sa inyo mga anak, nga nagahambal nahanungod sa ila sa nagalingkod ka sa imo balay, kag sa nagalakat ka sa dalanon, kag sa nagahigda ka, kag sa nagabangon ka.”​—⁠Deuteronomio 11:⁠19.

Tatlo ka beses kada tuig ang tagsa ka lalaki nga Israelinhon kag proselita sa pungsod ginsugo nga magkadto sa atubangan ni Jehova. Bangod narealisar nila nga ang bug-os nga pamilya makabenepisyo sa espirituwal sa sina nga mga okasyon, ginpaupod sang madamo nga mga ulo sang pamilya ang ila asawa kag kabataan. Apang sin-o ang magaamlig sa ila mga puluy-an kag sa ila mga latagon sa ila mga kaaway samtang malayo ang ila pamilya? Nagsaad si Jehova: “Wala sing isa nga magkaibog sang imo duta kon magtaklad ka sa atubangan ni Jehova nga imo Dios sing makatlo sa isa ka tuig.” (Exodo 34:24) Nagakinahanglan nga magtuo ang mga Israelinhon nga kon unahon nila ang espirituwal nga mga intereses, indi sila madulaan sing materyal. Gintuman gid bala ni Jehova ang iya ginsiling? Pat-od gid nga ginhimo niya!

Padayon nga Pangitaa Anay ang Ginharian

Gintudluan ni Jesus ang iya mga sumulunod nga unahon ang espirituwal nga mga butang sangsa bisan ano pa. Sa Sermon sa Bukid, ginlaygayan niya ang iya tagpalamati: “Dili kamo mabalaka kag magsiling: ‘Ano bala ang aton kaunon?’ ukon, ‘Ano bala ang aton imnon?’ ukon, ‘Ano bala ang aton ipanapot?’ Padayon . . . anay nga pangitaa ang ginharian kag ang iya pagkamatarong, kag ini tanan [kinahanglanon nga materyal] nga mga butang idugang sa inyo.” (Mateo 6:​31, 33) Pagkatapos sang kamatayon ni Jesus, ginsunod dayon sang bag-ong nabawtismuhan nga mga Cristiano ang amo nga laygay. Madamong mga Judiyo ukon Judiyo nga mga proselita ang naglakbay pa Jerusalem sa pagtambong sa piesta sang Pentecostes sang 33 C.E. Samtang didto, ang wala ginapaabot nga butang natabo. Nabatian nila kag ginbaton ang maayong balita tuhoy kay Jesucristo. Bangod nalangkag nga makatuon pa sing dugang sa ila bag-o nasapwan nga pagtuo, nagpabilin sila sa Jerusalem. Naubusan sila sing mga kinahanglanon, apang ang materyal nga mga benepisyo ikaduha lamang. Nasalapuan nila ang Mesias! Ginpaambit sang ila Cristianong kauturan ang ila materyal nga mga butang agod ang tanan makapadayon sa “paghugod sang ila kaugalingon sa mga panudlo sang mga apostoles kag . . . sa mga pangamuyo.”​—⁠Binuhatan 2:⁠42.

Sang ulihi, ginpatumbayaan sang pila ka Cristiano ang kinahanglanon nga magpakig-upod sing regular sa mga miting. (Hebreo 10:​23-25) Ayhan nangin materyalistiko sila, nagapasapayan sang espirituwal nga mga butang samtang nagatinguha nga magmalig-on sila sa pinansial kag ang ila pamilya. Sa tapos mapalig-on ang iya mga kauturan nga indi pagpabay-an ang mga miting, si apostol Pablo nagsulat: “Panginluwas kamo sa gugma sa kuwarta, kag magkontento sang yara sa inyo. Kay sia nagasiling: ‘Indi ko ikaw nga mas-a pagpalugaw-an ukon pagpatumbayaan ko ikaw.’ ”​—⁠Hebreo 13:⁠5.

Suno gid sa tion ang laygay ni Pablo. Mga lima ka tuig sa tapos ginsulat ni Pablo ang iya sulat sa mga Hebreo, ginlikupan sang Romanong hangaway sa idalom ni Cestius Gallus ang Jerusalem. Nadumduman sang matutom nga mga Cristiano ang paandam ni Jesus: “Kon makita ninyo [ini] . . . , ang tawo sa atop indi na magpanaug, ukon magsulod sa pagkuha sing bisan ano sa iya balay; kag ang tawo sa latagon dili magbalik sa pagkuha sang iya kunop.” (Marcos 13:​14-16) Nahibaluan nila nga nasandig ang ila kaluwasan, indi sa kalig-on sang ila trabaho ukon sa balor sang ila materyal nga mga pagkabutang, kundi sa ila pagtuman sa mga instruksion ni Jesus. Nasapwan sadtong nagsunod sa laygay ni Pablo kag nag-una sang espirituwal nga mga intereses nga mahapos ang pagbiya sa puluy-an, trabaho, mga panapton, kag ginapakabahandi nga mga pagkabutang kag malagyo sa kabukiran sangsa kay bisan sin-o nga wala magsikway sa gugma sa kuwarta.

Kon Paano Karon Ginauna sang Pila ang Ulunahon

Ginapabilihan karon sang matutom nga mga Cristiano ang regular nga pagpakig-upod sa ila mga kauturan, kag madamo ang nagsakripisyo agod lamang makatambong sa mga miting. Sa pila ka duog, ang lamang nga trabaho nga matigayon amo ang may relyebo nga trabaho. Nagtanyag ang isa ka utod nga lalaki nga buslan ang iya mga kaupod sa trabaho kada gab-i sang Sabado, nga amo ang ginapili sang kalabanan nga mga tawo sa iya komunidad sa paglingawlingaw, kon sila magbulos sa iya trabaho sa mga gab-i nga ginahiwat ang mga miting. Ang iban nga mga kauturan nga nagatrabaho man sing subong sini nagatambong sa mga miting sa pihak nga kongregasyon kon ang ila trabaho nagapugong sa ila nga indi makatambong sa ila kongregasyon. Sa sini nga paagi, halos wala sila sing nawasi nga mga miting. Narealisar dayon sang bag-uhan nga interesado sa Canada ang importansia sang Teokratikong Eskwelahan sa Pagministro kag Miting sa Serbisyo, apang ginabalabagan sang iya trabaho ang pagtambong niya sa miting. Busa, ginbayaran niya ang iya kaupod sa trabaho sa pagbulos sa iya agod makatambong sia sa sining importante nga mga miting.

Madamo sang may malala nga balatian ang talagsa lang nga indi makatambong sa isa ka miting. Nagapamati sila sa mga programa sa puluy-an paagi sa telepono ukon sa mga rekord sa tape kon indi sila makakadto sa Kingdom Hall. Nagapakita sila sing dalayawon nga apresasyon sa espirituwal nga mga aman ni Jehova paagi sa iya “matutom kag mainandamon nga ulipon”! (Mateo 24:45) Ginaapresyar gid sang mga Cristiano nga nagaatipan sa ila tigulang nga mga ginikanan kon ang isa ka utod nga lalaki ukon babayi magtanyag nga magbantay sa ila ginikanan agod makatambong man sila sa miting sa kongregasyon.

Magplano sing Abanse!

Ang mga ginikanan nga nabalaka sa ila espirituwal nga mga kinahanglanon nagabulig sa ila kabataan nga apresyahon ang Cristianong mga miting. Sa kabilugan, ginapaabot nila ang ila kabataan nga himuon ang ila homework gilayon sa baylo nga tugutan ang pagtumpok sang mga asaynment. Sa mga gab-i sang miting mahimo himuon sang kabataan ang ila homework pag-abot dayon sa puluy-an. Wala ginatugutan ang mga kalingawan ukon iban pa nga mga hilikuton sa pagsablag sa mga miting sa kongregasyon.

Subong isa ka bana kag amay, ginauna mo bala ang pagtambong sa mga miting? Subong isa ka asawa kag iloy, ginaplano mo bala ang imo mga responsabilidad agod makatambong sa mga miting? Subong isa ka tin-edyer, ginakabig mo bala nga mas importante ang mga miting sangsa homework ukon mas importante ang homework sangsa mga miting?

Ang miting sa kongregasyon isa ka mahigugmaon nga aman ni Jehova. Ang tanan nga panikasog dapat himuon agod makapakigbahin sa sini nga kahimusan. Si Jehova bugana nga magapakamaayo sa imo kon unahon mo ang mga ulunahon!