Mag-andam sa Simoniya!
SI Simon nga taga-Samaria ginatahod gid sa iya komunidad. Nagkabuhi sia sang unang siglo C.E., kag ginadayaw gid sang mga tawo ang iya abilidad sa salamangka amo nga nagasiling sila tuhoy sa iya: “Ini nga tawo amo ang Gahom sang Dios, nga matawag nga Daku.”—Binuhatan 8:9-11.
Apang, pagkatapos nga nangin Cristiano si Simon, ginkilala niya ang gahom nga mas labaw pa sa iya anay ginpakita. Amo ini ang gahom nga ginhatag sa mga apostoles ni Jesus, nga nagbulig sa ila nga mapaambit sa iban ang milagruso nga mga dulot sang balaan nga espiritu. Nagdayaw gid si Simon amo nga gintanyagan niya sing kuwarta ang mga apostoles kag nagpangabay: “Hatagi man ninyo ako sini nga gahom, agod nga ang bisan sin-o nga takdungan ko sang akon mga kamot makabaton sia sing balaan nga espiritu.”—Binuhatan 8:13-19.
Ginsabdong ni apostol Pedro si Simon, nga nagasiling: “Kabay nga ang imo pilak madula upod sa imo, bangod naghunahuna ka nga paagi sa kuwarta matigayon mo ang walay bayad nga dulot sang Dios. Wala ikaw sing bahin ukon kapalaran sa sini nga butang, kay ang imo tagipusuon indi matarong sa panulok sang Dios.”—Binuhatan 8:20, 21.
Sa sini nga rekord sang Biblia naghalin ang tinaga nga “simoniya,” nga ginlaragway subong “ang sala sa pagbakal ukon pagbaligya sing mga posisyon ukon promosyon sa simbahan.” Ginkilala sang New Catholic Encyclopedia nga ilabi na kutob sang ika-9 tubtob ika-11 nga siglo ang “simoniya naglapnag sa mga monasteryo, sa manubo nga mga klero, sa episkopado, kag bisan gani sa papado.” Ang ikasiam nga edisyon sang The Encyclopædia Britannica (1878) nagasiling: “Ang isa ka pagtuon sa maragtas sang Papado nagkumbinsi sa mga estudyante nga wala sing eleksion sa simbahan nga wala sing nadalahig nga simoniya, samtang sa madamo nga hitabo ang simoniya sa papado amo ang pinakamalain, pinakamakahuluya, kag pinakahayag.”
Ang matuod nga mga Cristiano karon dapat mag-andam sa simoniya. Halimbawa, mahimo nga hatagan sang iban sing sobra nga pagdayaw ukon sing mga regalo yadtong makahatag sa ila sing dugang nga mga pribilehiyo. Sa pihak nga bahin, yadtong makahatag sina nga mga pribilehiyo mahimo magpakita sing paboritismo sa sadtong makasarang—kag sa masami handa—maghatag sa ila sing mga regalo. Ini nga mga kahimtangan nagadalahig sing simoniya, kag maathag nga ginapakamalaut sang Kasulatan ini nga buhat. “Busa, maghinulsol, sa sining imo kalainan,” siling ni Pedro kay Simon, “kag makiluoy kay Jehova agod, kon mahimo, ang pahito sang imo tagipusuon [“ining imo mga padihot,” New Jerusalem Bible] patawaron sa imo; kay nakita ko nga isa ikaw ka makahililo nga apdo kag isa ka gapos sang pagkadimatarong.”—Binuhatan 8:22, 23.
Sing malipayon, nakita ni Simon ang kadakuon sang iya sayop nga handum. Nakitluoy sia sa mga apostoles: “Pangamuyo kamo kay Jehova tungod sa akon agod nga walay mag-abot sa akon sang napamulong ninyo.” (Binuhatan 8:24) Subong pagsunod sa importante nga leksion sini nga hitabo, ginatinguhaan sang matuod nga mga Cristiano nga likawan ang bisan anong dagta sang simoniya.