Ginpetsahan Liwat sang Isa ka Iskolar ang Manuskrito sang Biblia
Suno kay Carsten Peter Thiede, isa ka Aleman nga eksperto sa papirologo, may mabakod nga pamatuod nga ang tatlo ka pidaso nga papiro sang Ebanghelyo ni Mateo (nakilala nga Magdalen Papyrus) ginsulat sang unang siglo.
Sa tapos mapaanggid ang mga pidaso (nga nagaunod sang bahin sang Mateo kapitulo 26) sa dumaan nga sulat sa negosyo nga nakita sa Egipto, natalupangdan ni Thiede nga ang dokumento sa Egipto “daw kapid sang Magdalen Papyrus—sa kabilugan nga panagway kag sa korte kag pagplastar sa kada letra.” Si Thiede kag ang iya kaupod nga awtor nga si Matthew D’Ancona naghinakop sa ila libro nga Eyewitness to Jesus—Amazing New Manuscript Evidence About the Origin of the Gospels nga ang pagkapareho sa duha ka dokumento nagapakita nga dungan ini nga ginsulat. San-o? Ang kasulatan sa negosyo napetsahan “ ‘Sang ika-12 anyos ni Nero nga Ginuo, Epeiph 30’—nga, suno sa aton kalendaryo, amo ang Hulyo 24, 66 [C.E.].”
“Ini nga pagpetsa, kon sibu, importante gid,” komento ni Propesor Philip W. Comfort, sa isa ka artikulo nga ginbalhag sa Tyndale Bulletin, “bangod nagbutang ini sa isa ka manuskrito sang Ebanghelyo ni Mateo sa amo man nga siglo nga ini ginsulat.” Ginahimo man sini ang Magdalen Papyrus nga amo ang pinakadugay nga mga pidaso sang Ebanghelyo nga nagaluntad.
[Retrato sa pahina 29]
Ang Magdalen Papyrus, ginapakita suno sa iya aktuwal nga kadakuon
[Credit Line]
Sa pahanugot sang President and Fellows of Magdalen College, Oxford