Madumduman Mo Bala?

Nalipay ka bala sa pagbasa sa bag-o nga mga guwa sang Ang Lalantawan? Kon amo, mawili ka sa pagdumdom sa masunod:

◻ Ngaa makasalig kita sa ginpili nga mga indibiduwal ni Jehova nga magatuytoy sa iya katawhan?

Ginapili ni Jehova para sa pila ka responsabilidad ang mga indibiduwal nga may mga kinaiya nga kinahanglanon sa pagtuytoy sa iya katawhan sa dalanon nga luyag niya nga pilion nila sa sinang partikular nga tion.​—⁠8/15, pahina 14.

◻ Ano ang matun-an naton gikan sa eksperiensia ni Jonas?

Sobra ang pag-ulikid ni Jonas sa iya kaugalingon sangsa iban. Manuto kita kay Jonas paagi sa indi pag-una sa aton kaugalingon kag sa aton balatyagon.​—⁠8/15, pahina 19.

◻ Paano masiling nga “ang ngalan ni Jehova torre nga mabakod”? (Hulubaton 18:⁠10)

Ang pagdangop sa ngalan sang Dios nagakahulugan sing pagsalig kay Jehova mismo. (Salmo 20:1; 122:⁠4) Nagakahulugan ini sang pagsakdag sa iya soberanya, pagsunod sa iya mga kasuguan kag mga prinsipio, pagtuo sa iya mga saad, kag paghatag sa iya sang eksklusibo nga debosyon. (Isaias 50:10; Hebreo 11:⁠6)​—⁠9/1, pahina 10.

◻ Paano ang paagi sa pagpanaksi ni Pablo sa atubangan sang dungganon nga mga tawo nagaaman sing maayo nga halimbawa sa aton?

Sa pagpakighambal kay Hari Agripa, nangin mahinantupon si Pablo, nagpadaku sang mga punto nga ginaugyunan nila ni Agripa. Sing kaanggid, dapat naton padakuon ang positibo nga mga bahin sang maayong balita, nagapadaku sa mga paglaum nga aton ginaugyunan. (1 Corinto 9:22)​—⁠9/1, pahina 31.

◻ Sin-o ang makabenepisyo sa pagpailob ni Jehova?

Bangod sang pagpailob ni Jehova, minilyon pa karon ang ginahatagan sing kahigayunan nga maluwas sa nagapakari nga “adlaw ni Jehova.” (2 Pedro 3:​9-15) Ang iya pagpailob nagatugot man sa tagsatagsa sa aton nga ‘panikasugan sing padayon ang aton kaluwasan nga may kahadlok kag pagkurog.’ (Filipos 2:12)​—⁠9/15, pahina 20.

◻ Daw ano ka malahalon ang Septuagint nga badbad sang Biblia?

Ini nga badbad may daku nga nahimo sa pagpalapnag sing ihibalo tuhoy kay Jehova nga Dios kag tuhoy sa iya Ginharian nga ang Hari sini amo si Jesucristo. Paagi sa Septuagint, napahamtang ang importante nga sadsaran para sa nagahambal sing Griego nga mga Judiyo kag mga Gentil sang unang siglo sa pagbaton sing maayong balita sang Ginharian.​—⁠9/15, pahina 30.

◻ Ano ang ginatudlo sa aton sang parabola may kaangtanan sa buhaha nga anak tuhoy sa Dios?

Una, si Jehova “maluluy-on kag mainayuhon, mahinay sa pagpangakig kag bugana sa mahigugmaon nga kaayo kag sa kamatuoran.” (Exodo 34:⁠6) Ikaduha, sia ‘handa sa pagpatawad’ kon ang pagbalhin sa tagipusuon mangin basihan para magpakita sia sing kaluoy. (Salmo 86:⁠5)​—⁠10/1, pahina 12, 13.

◻ San-o matuman ang mahidaiton nga mga kahimtangan nga ginsaad sa Isaias 65:​21-25?

Subong nahiusa nga mga sumilimba ni Jehova sa espirituwal nga paraiso karon, ang mga hinaplas kag ang “iban nga mga karnero” nakaeksperiensia karon sing hatag-Dios nga paghidait. (Juan 10:16) Kag ina nga paghidait magapadayon sa pisikal nga Paraiso, kon ‘ang kabubut-on sang Dios matuman sa duta, subong sang sa langit.’ Sa amo nga tion bug-os nga matuman ang pinamulong ni manalagna Isaias. (Mateo 6:10)​—⁠10/15, pahina 24.

◻ Ngaa ginasaulog sang mga Cristiano ang mga anibersaryo sang kasal apang indi ang mga kaadlawan?

Wala ginapakalain sang Biblia ang pag-asawahay. Isa ini ka pribado nga butang kon bala ang mga Cristiano mamat-od nga hatagan sing igtalupangod ang anibersaryo sang kasal, nagahanduraw liwat sang kalipay sadto nga okasyon kag ang ila pamat-od nga tinguhaan nga magmadinalag-on subong mag-asawa. Apang, ang lamang nga pagsaulog sang kaadlawan nga ginrekord sa Biblia amo yadtong iya sang mga pagano, kag ginaangot ini nga mga okasyon sa mapintas nga mga buhat.​—⁠10/15, pahina 30, 31.

◻ Sa ilustrasyon ni Pablo nga narekord sa 1 Corinto 3:​12, 13, ano ang ginasimbulo sang “kalayo”, kag sa ano dapat magbantay ang mga Cristiano?

May kalayo nga aton tanan maatubang sa kabuhi​—⁠mga pagtilaw sa aton pagtuo. (Juan 15:20; Santiago 1:​2, 3) Ang tanan nga ginatun-an naton sa kamatuoran pagatilawan. Kon mapigaw ang aton pagtudlo, mahimo nga may makahalanusbo nga resulta, subong sang ginpaandam ni Pablo. (1 Corinto 3:15)​—⁠11/1, pahina 11.

◻ Paano si Noe naglakat ‘upod sa matuod nga Dios’? (Genesis 6:⁠9)

Naglakat si Noe upod sa matuod nga Dios paagi sa paghimo sang ginsugo sang Dios sa iya. Bangod sang paghugod sang iya kabuhi sa paghimo sang kabubut-on sang Dios, naangkon ni Noe ang isa ka mainit, suod nga relasyon sa Dios.​—⁠11/15, pahina 10.

◻ Ano nga mga kahigayunan ang nabuksan para sa aton bangod wala naton mahibaluan ang sibu nga tion kon san-o ipatuman ang pagtimalos sang Dios sa malauton?

Nagahatag ini sa aton sing kahigayunan nga pamatud-an nga ginahigugma gid naton si Jehova kag luyag naton nga maglakat sa iya mga dalanon sing dayon. Nagapakita man ini nga kita mainunungon sa Dios kag nagasalig sa pagtadlong niya sang mga butang. Dugang pa, nagabulig ini sa aton nga magmabinantayon kag magmata sa espirituwal. (Mateo 24:​42-44)​—⁠11/15, pahina 18.

◻ Ano ang buot silingon nga magtuo “sa ngalan sang Anak sang Dios”? (1 Juan 5:⁠13)

Nagakahulugan ini nga tumanon ang tanan nga sugo ni Cristo, lakip ang iya sugo nga “maghigugmaanay.” (Juan 15:​14, 17) Ang gugma nagatinguha sa paghimo sing maayo sa iban. Ginadula sini ang tanan nga pag-ihig-ihig sa rasa, relihion, kag sosyal nga kahimtangan.​—⁠12/1, pahina 7.

◻ Ngaa ang mga Saksi ni Jehova “mga dulumtan”? (Mateo 10:⁠22)

Ang mga Saksi ni Jehova dimakatarunganon nga ginadumtan bangod man sang mga rason nga ginhingabot anay ang unang mga Cristiano. Una, ginaaplikar sang mga Saksi ni Jehova ang ila relihioso nga mga pagtuluuhan sa mga paagi nga nagapaugot sa iban. Ikaduha, ang mga Saksi ni Jehova nangin puntariya sang butig nga mga panumbungon​—⁠mga kabutigan kag pagpatiko sa ila mga pagtuluuhan.​—⁠12/1, pahina 14.