Panuytoy sa Pagpili sing Maayo nga mga Kaupod

ANG mga lamharon nagakadto sa ila mga katubotubo sa baylo nga sa ila mga ginikanan para sa panuytoy sa pagpanapot kag musika, siling sang isa ka report sa Reader’s Digest. Busa importante nga hibaluon sang mga ginikanan kon sin-o ang kaupod sang ila kabataan kag kon diin.

“Responsabilidad ninyo nga magpangusisa,” siling ni Esmé van Rensburg, senyor nga manunudlo sa departamento sang sikolohiya sa isa ka unibersidad sa Bagatnan nga Aprika. Sia nagdugang: “Mahimo nga ang imo bata maugot sa imo, apang magakalma sila.” Nian naghatag sia sing masunod nga mga panuytoy sa mga ginikanan. Ang mga kasuguan dapat makatarunganon kag may pat-od sadsaran nga mga prinsipio; mamati sa imo bata; indi mangakig, kundi magpabilin nga kalma, kag hunahunaa ang luyag mo ihambal. Kon ang imo bata nakapakig-abyan na sa indi maayo nga kaupod, ipatalupangod ang indi maayo nga batasan nga ginpadaku sang pag-abyanay sa baylo nga dumilian lamang ang dugang pa nga pagpakig-upod.

Ang maayo nga laygay para sa mga ginikanan madugay na nga matigayon sa Pulong sang Dios, ang Biblia. Halimbawa, ini nagasiling: “Magmadagmit sa pagpamati, magmahinay sa paghambal, magmakuli sa pagpangakig.” (Santiago 1:19) Ang Kasulatan nagahatag man sining maayo nga laygay sa pagpili sing mga kaupdanan: “Sia nga nagalakat upod sa maalam nga mga tawo mangin maalam, apang sia nga nagapakig-angot sa mga buangbuang magaantos.” (Hulubaton 13:20) Ini nga mga halimbawa nagailustrar sang kaalam nga matigayon sadtong nagabasa sing Biblia nga may apresasyon kag nagaaplikar kon ano ang ginasiling sini sa ila matag-adlaw nga kabuhi.