Mga Pamangkot Gikan sa mga Bumalasa

Ang ‘pagtanda’ bala nga ginsambit sa 2 Tesalonica 3:14 isa ka pormal nga proseso sa kongregasyon, ukon butang bala ini nga himuon sang indibiduwal nga mga Cristiano sa paglikaw sa mga batinggilan?

Ang ginsulat ni apostol Pablo sa mga taga-Tesalonica nagapakita nga ang mga gulang sa kongregasyon may espesipiko nga papel sa sina nga ‘pagtanda.’ Apang, ang indibiduwal nga mga Cristiano magapadayon sa paghimo sini pagkatapos, nagahimo sini nga may ginahunahuna nga espirituwal nga mga tulumuron. Mahangpan naton ini sing maayo gid paagi sa pagbinagbinag sa laygay ni Pablo sa orihinal nga kahimtangan sini.

Nagbulig si Pablo sa pagtukod sang kongregasyon sa Tesalonica, nagbulig sa mga lalaki kag babayi nga mangin mga tumuluo. (Binuhatan 17:1-4) Sang ulihi nagsulat sia gikan sa Corinto agod dayawon kag palig-unon sila. Naghatag man sing kinahanglanon nga laygay si Pablo. Ginpalig-on niya sila nga ‘magkabuhi sing malinong, maghimo sang ila kaugalingon nga buluhaton, kag mangabudlay paagi sa ila mga kamot.’ Ang iban wala nagahimo sina, busa si Pablo nagdugang: “Nagalaygay kami sa inyo, mga kauturan, nga laygayan ang magamo, magpamulong sing malugpayon sa napung-awan nga mga kalag, sakdagon ang mga maluya.” Maathag nga may yara mga “magamo”a sa tunga nila nga kinahanglan laygayan.—1 Tesalonica 1:2-10; 4:11; 5:14.

Pila ka bulan sang ulihi, ginsulat ni Pablo ang iya ikaduha nga sulat sa mga taga-Tesalonica, nga may dugang nga mga komento tuhoy sa palaabuton nga presensia ni Jesus. Naghatag man si Pablo sing dugang nga panuytoy kon paano pakig-angutan ang mga magamo nga ‘wala gid nagapangabudlay apang nagapahilabot sa mga butang nga wala sila sing labot.’ Ang ila mga buhat nagasumpakil sa halimbawa ni Pablo subong isa ka lakas nga manugpangabudlay kag sa iya maathag nga sugo tuhoy sa pagtrabaho agod sakdagon ang kaugalingon. (2 Tesalonica 3:​7-12) Nagsugo si Pablo nga maghimo sing pila ka tikang. Himuon ini nga mga tikang sa tapos malaygayan sang mga gulang ang magamo. Si Pablo nagsulat:

“Karon nagasugo kami sa inyo, mga kauturan, . . . nga magpahilayo kamo sa tagsa ka utod nga nagagawi sing magamo kag indi suno sa tradisyon nga nabaton ninyo gikan sa amon. Sa inyo bahin, mga kauturan, dili kamo magpakaluya sa paghimo sing husto. Apang kon ang bisan sin-o wala nagatuman sang amon pulong paagi sini nga sulat, padayon ninyo nga tandaan ining isa, mag-untat kamo sa pagpakig-upod sa iya, agod nga mahuy-an sia. Apang dili ninyo pagbilangon sia nga kaaway, kundi padayon sia nga laygayi subong isa ka utod.”—2 Tesalonica 3:6,13-15.

Busa ang dugang pa nga mga tikang naglakip sang pagpahilayo sa mga magamo, pagtanda sa ila, pag-untat sa pagpakig-upod sa ila, apang nagalaygay sa ila subong mga utod. Sa ano nga mga kahimtangan mahimo sang mga katapo sang kongregasyon ini nga mga tikang? Subong bulig agod maathagan ini, talupangdon naton ang tatlo ka kahimtangan nga wala ginapatalupangod diri ni Pablo.

1. Nahibaluan naton nga ang mga Cristiano dili himpit kag may mga kakulangan. Apang, ang gugma isa ka tanda sang matuod nga Cristianismo, nagakinahanglan nga hangpon naton kag pasayluhon ang mga sayop sang iban. Halimbawa, ang isa ka Cristiano mahimo nga may talagsahon nga pagsilabo sing kaakig, subong anay sang natabo sa tunga nanday Bernabe kag Pablo. (Binuhatan 15:36-40) Ukon bangod sang kakapoy, ang isa mahimo makahambal sing maparas kag masakit nga mga tinaga. Sa sina nga mga kahimtangan, paagi sa pagpakita sing gugma kag sa pag-aplikar sa laygay sang Biblia, matabunan naton ang sayop, padayon nga nagakabuhi, nagapakig-upod, kag nagapangabudlay upod sa aton masigka-Cristiano. (Mateo 5:23-25; 6:14; 7:1-5; 1 Pedro 4:8) Maathag nga ining sahi sang mga kakulangan indi ang ginapatuhuyan ni Pablo sa 2 Tesalonica.

2. Wala ginapatuhuyan ni Pablo ang isa ka kahimtangan nga sa diin ang isa ka Cristiano personal nga namat-od nga limitehan ang iya pagpakig-upod sa isa nga ang mga dalanon ukon mga panimuot indi maayo—halimbawa, sa isa nga nagahugod sing sobra sang iya igtalupangod sa kalingawan ukon sa materyal nga mga butang. Ukon mahimo limitehan sang isa ka ginikanan ang pagpakig-upod sang iya anak sa mga pamatan-on nga wala nagasapak sa awtoridad sang ginikanan, nagahampang sa masingki ukon makatalagam nga paagi, ukon nagapasapayan lamang sang Cristianismo. Personal lamang ini nga mga desisyon nga nahisuno sa aton mabasa sa Hulubaton 13:20: “Sia nga nagalakat upod sa maalam nga mga tawo mangin maalam, apang sia nga nagapakig-upod sa mga buangbuang magaantos.”—Ipaanggid ang 1 Corinto 15:33.

3. Tuhoy sa daw tuhay nga kabug-aton, nagsulat si Pablo sa mga taga-Corinto tuhoy sa isa nga nagabuhat sing mabug-at nga sala kag indi mahinulsulon. Ining dimahinulsulon nga mga makasasala dapat paguwaon gikan sa kongregasyon. Ang “malaut” nga tawo dapat itugyan kay Satanas, kon sa aton pa. Pagkatapos sina, ang matutom nga mga Cristiano indi dapat makig-upod sa sinang mga malauton; ginpalig-on ni apostol Juan ang mga Cristiano nga indi gani magtamyaw sa ila. (1 Corinto 5:1-13; 2 Juan 9-11) Apang, wala man ini nagasibu sa laygay sang 2 Tesalonica 3:14.

Tuhay sa tatlo ka kahimtangan sa ibabaw amo ang may kaangtanan sa mga “magamo” nga ginahambalan sa 2 Tesalonica. Si Pablo nagsulat nga ‘mga kauturan’ gihapon sila, nga dapat laygayan kag pakig-angutan subong amo sini. Busa, ang problema sa “magamo” nga mga kauturan indi lamang personal nga problema sa tunga sang mga Cristiano ukon tuman gid ka serioso nga kinahanglan pahilabtan sang mga gulang sa kongregasyon agod sikwayon, subong sang ginhimo ni Pablo may kaangtanan sa imoralidad sa Corinto. Ang mga “magamo” wala makahimo sing mabug-at nga sala, subong sang ginsikway nga tawo sa Corinto.

Ang mga “magamo” sa Tesalonica nakahimo sing talalupangdon nga mga paglikday sa Cristianismo. Wala sila nagatrabaho, ayhan bangod naghunahuna sila nga malapit na ang pagbalik ni Cristo ukon bangod matamad sila. Dugang pa, nagahimo sila sing daku nga gamo paagi sa ‘pagpahilabot sa mga butang nga wala sila sing labot.’ Mahimo nga ang mga gulang sa kongregasyon naglaygay sa ila sing sulitsulit, suno sa laygay ni Pablo sa iya nahauna nga sulat kag sa iban pa nga laygay gikan sa Dios. (Hulubaton 6:6-11; 10:4,5; 12:11, 24; 24:30-34) Nagpadayon gihapon sila sa dalanon nga nagapakahuya sa kongregasyon kag mahimo nga maglaton sa iban nga mga Cristiano. Busa ang Cristianong gulang nga si Pablo, nga wala maghingalan sang mga indibiduwal, dayag nga nagpatalupangod sang ila pagkagarot, nagbuyagyag sang ila sayop nga dalanon.

Ginpahibalo man niya ang kongregasyon nga nagakaigo para sa ila subong mga Cristiano nga “tandaan” ang magamo. Ini nagapakita nga dapat tandaan sang mga indibiduwal yadtong ang ila mga buhat nagasibu sa dalanon nga tuhoy sini ginpaandaman sing dayag ang kongregasyon. Naglaygay si Pablo nga “magpahilayo [sila] gikan sa tagsa ka utod nga nagagawi sing magamo.” Wala gid ina nagakahulugan nga likawan sing bug-os ina nga tawo, kay dapat nila ‘padayon nga laygayan sia subong isa ka utod.’ Padayunon nila ang pagpakig-angot subong Cristiano sa mga miting kag ayhan sa ministeryo. Makalaum sila nga ang ila utod magahulag sa laygay kag magabiya sang iya makatulublag nga mga dalanon.

Sa anong kahulugan nga “magpahilayo” sila sa iya? Maathag nga nagapatuhoy ini sa sosyal nga kahulugan. (Ipaanggid ang Galacia 2:12.) Ang pag-untat nila sa sosyal nga pagpakig-upod sa iya kag paglingawlingaw magapakita sa iya nga ang may prinsipio nga mga tawo wala naluyag sang iya mga dalanon. Bisan indi sia mahuya kag magbag-o, sa dimagkubos ang iban indi na makahibalo sang iya mga dalanon kag mangin kaangay sa iya. Sa amo man nga tion, ining indibiduwal nga mga Cristiano dapat magkonsentrar sa makapalig-on nga mga butang. Si Pablo naglaygay sa ila: “Sa inyo bahin, mga kauturan, indi mag-untat sa paghimo sing husto.”—2 Tesalonica 3:13.

Sing maathag, ini nga laygay sang apostol indi basihan agod nga pakanubuon ukon hukman ang aton mga kauturan nga nakahimo sing diutay nga sayop ukon sala. Sa baylo, ang tulumuron sini amo ang pagbulig sa isa nga nagahimo sing isa ka makatulublag nga dalanon nga maathag nga nagasumpakil sa Cristianismo.

Wala maghatag sing detalyado nga mga kasuguan si Pablo nga daw nagatinguha sa paghimo sing isa ka masibod nga pagsulundan. Apang maathag nga ang mga gulang dapat maglaygay anay kag tinguhaan nga buligan ang magamo. Kon indi sila magmadinalag-on kag ang tawo nagapadayon sa isa ka dalanon nga makatulublag kag mahimo nga maglapnag, mahimo sila maghinakop nga ang kongregasyon dapat pahibaluon. Mahimo sila makahimos sing isa ka pamulongpulong kon ngaa dapat likawan ang subong sini nga kagamo. Indi sila magmitlang sing mga ngalan, apang ang ila nagapaandam nga pamulongpulong magabulig sa pag-amlig sa kongregasyon bangod ang mga masinulundon magahimo sing dugang nga paghalong agod limitehan ang ila sosyal nga pagpakig-upod kay bisan sin-o nga nagapakita gid sing subong sini nga kagamo.

Ginalauman nga sa ulihi ang magamo mahuya sa iya mga dalanon kag magabag-o. Kon makita sang mga gulang kag sang iban sa kongregasyon ang pagbag-o, makapamat-od sila subong indibiduwal nga tapuson ang paglimite sang sosyal nga pagpakig-upod sa iya.

Sa pagsumaryo, nian: Ang mga gulang sa kongregasyon magapanguna sa paghatag sing bulig kag laygay kon ang isa nagagawi sing magamo. Kon wala niya makita ang kasaypanan sang iya dalanon kundi padayon nga nangin indi maayo nga impluwensia, ang mga gulang magapaandam sa kongregasyon paagi sa isa ka pamulongpulong nga nagapaathag sang pagtamod sang Biblia—ini man amo ang pag-date sa mga ditumuluo, ukon bisan ano man nga indi nagakaigo nga dalanon. (1 Corinto 7:39; 2 Corinto 6:14) Ang mga Cristiano sa kongregasyon nga ginpaandaman makadesisyon sing indibiduwal sa paglimite sang iya sosyal nga pagpakig-upod sa isa nga maathag nga nagapadayon sing magamo nga dalanon apang mga kauturan gihapon.

[Footnote]

[Mga laragway sa pahina 31]

Ginalaygayan sang Cristianong mga gulang ang mga magamo apang nagatamod gihapon sa ila subong mga masigkatumuluo