Mabuligan Bala Kita sang Biblia Karon?

“SA KABUG-USAN, mga 1 porsiento lamang sang Biblia ang takus basahon, apang ang iban nga bahin indi mapuslanon kag kinaraan na.” Ginsiling ini sang isa ka pamatan-on nga lalaki. Madamo ang magaugyon sa iya. Bisan pa ang Biblia amo gihapon ang pinakamabakal sa bug-os nga kalibutan, minilyon ang wala nagakabig sini nga importante kag indi pamilyar sa mga panudlo sini.

Sa 1996 nga Krismas nga edisyon sini, ang Aleman nga pamantalaan nga Süddeutsche Zeitung nagkomento nga ang Biblia “may nagadiutay nga mga bumalasa. Sa dag-on sang natural sciences kag nagadugang nga pagkadi-relihioso, ang mga kasaysayan sa Biblia daw katingalahan kag mabudlay hangpon sang madamo.” Ginapamatud-an sang mga surbe ini nga report. Ginapakita sang pila ka pagtuon nga madamo nga kabataan ang wala gani makahibalo kon sin-o gid si Jesus. Sa isa ka surbe, wala pa sa katunga sang mga tawo nga gin-interbyu ang makasugid sang mga sugilanon sa Biblia tuhoy sa buhaha nga anak kag sa maayo nga Samaritano.

Ang publikasyon sang Swiss Evangelical Church nga Reformiertes Forum nagasiling nga sa Switzerland ang pagkinahanglan sa Biblia indi na katulad sang una. Bisan sa tunga sadtong may kopya sang Biblia, masami na lang ini nga nagakayab-ukan sa bulutangan. Sa Britanya amo man ang kahimtangan. Suno sa isa ka surbe, bisan madamo nga tawo ang may Biblia, ang kalabanan wala pa makabasa sini.

Sa pihak nga bahin, minilyon sa bug-os nga kalibutan ang nagabatyag sing tuhay nahanungod sa Biblia. Ginatamod nila ini subong Pulong sang Dios kag ginakabig ini nga hamili kag mapuslanon. Gani, tayuyon nila ini nga ginabasa. Ang isa ka pamatan-on nga babayi nagsulat: “Ginatinguhaan ko nga mabasa ang isa ukon duha ka kapitulo sang Biblia kada adlaw. Nalipay gid ako sa sini.” Ini nga mga indibiduwal mahalungon nga nagatalupangod sa ginatudlo sang Biblia, kag ginatinguhaan nila nga iaplikar ang laygay sini sa ila kabuhi. Nagapati sila nga mabuligan sila sang Biblia sa magamo nga kalibutan karon.

Ano ang imo opinyon? Wala na bala sing kapuslanan ang Biblia sa modernong mga tion? Ukon hamili bala ini kag mapuslanon? Mabuligan bala kita sang Biblia karon?