Ang Libro nga Wala Ginasapak sang Kalabanan nga mga Pamatan-on
“PAANO ko mapat-od nga ang Biblia amo gid ang Pulong sang Dios? Indi ini makawiwili nga libro para sa akon,” siling sang isa ka lin-ay nga si Beate.
Sa Alemanya, diin nagapuyo si Beate, may amo man nga balatyagon ang kalabanan nga mga pamatan-on; gani, para sa ila indi importante ang pagbasa sang Biblia. Ginpakita sang isa ka surbe didto sining karon lang nga mga 1 porsiento sang mga pamatan-on ang pirme gid nagabasa sing Biblia, 2 porsiento ang pirme nagahimo sini, 19 porsiento ang talagsa lang, kag halos 80 porsiento ang wala gid. Mahimo nga pareho man ang kadamuon sa iban nga pungsod, ayhan sa imo man ginapuy-an. Maathag nga ang Biblia isa ka libro nga wala ginasapak sang kalabanan nga mga pamatan-on.
Gani, indi katingalahan nga ang pagkawalay namang-an sa Biblia lapnag sa tunga sang mga pamatan-on! Sang maaga nga bahin sang tuig 2000, ang pamantalaan nga Lausitzer Rundschau nagreport tuhoy sa surbe nga nagpakita kon pila ka tawo ang pamilyar sa Napulo ka Sugo kag naggamit sini nga panuytoy sa kabuhi. Tuhoy sa mga tawo nga kapin sa 60 anyos ang pangidaron, 67 porsiento ang nakahibalo sang mga sugo kag gintuytuyan sini; para sa mga tawo nga ubos sa 30 anyos, 28 porsiento lamang ang kadamuon. Huo, indi pamilyar ang madamo nga pamatan-on sa Pulong sang Dios.
Tuhay ang Pagtamod Sang Iban
Sa pihak nga bahin, sa bug-os nga kalibutan, nasapwan sang minilyon ka pamatan-on nga mapuslanon gid ang Pulong sang Dios. Si Alexander, halimbawa, 19 anyos kag nagabasa sing Biblia kada aga antes magkadto sa trabaho. “Para sa akon, ini amo ang pinakamaayo nga paagi nga sugdan ang adlaw,” siling niya. Batasan ni Sandra nga basahon ang isa ka bahin sang Biblia kada gab-i. “Nangin bahin na ini sang akon rutina kada adlaw,” paathag niya. Kag si Julia, nga 13 anyos, nakapalambo na sing batasan sa pagbasa sing di-magkubos sa isa ka kapitulo sa Biblia antes magtulog sa gab-i. “Nalipay gid ako sa sini, kag luyag ko padayunon ini nga batasan sa palaabuton.”
Diin nga pagtamod ang husto kag maalamon? Takus gid bala basahon ang Biblia? Mapuslanon bala ini kag importante sa mga pamatan-on? Ano sa banta mo?