Mahimo Bala Ang Pagano Nga Selebrasyon Mangin Cristiano?
SANG tigtulugnaw sang 2004, mainit nga gindebatehan sa Italya ang pagsaulog sang Paskua. Ang pila ka manunudlo nag-ugyon sa ideya nga buhinan ukon dulaon pa gani ang bisan ano nga may kaangtanan sa relihioso nga mga tradisyon sang Paskua. Ginrekomendar nila ini bangod nagadamo ang mga estudyante nga indi Katoliko ukon Protestante. Apang, ang iban nga mga manunudlo kag mga propesyonal nag-insister nga dapat respetuhon kag tipigan ang tradisyon.
Apang, luwas sa sini nga pagbinais, diin gid bala naghalin ang mga tradisyon sang Paskua? Sang nagahingapos na ang debate, ang pamantalaan sa Batikano nga L’Osservatore Romano naghatag sing pila ka interesante nga mga obserbasyon.
Tuhoy sa petsa sang pagsaulog sang Paskua, ining Katoliko nga pamantalaan nagsiling: “Indi mapat-od kon ano gid ang sibu nga petsa sang pagkabun-ag ni Jesus, bangod wala ini ginapakita sang maragtas sang Roma, sang sensus nga ginhimo sa bug-os nga imperyo sadto kag sang pagpanalawsaw nga ginhimo sa nagsunod nga mga siglo. . . . Ang petsa nga Disiembre 25 nga kilala gid karon, ginpili sang Simbahan sang Roma sang ikap-at nga siglo. Sang panahon sang pagano nga Roma, gindedikar nila ini nga petsa sa dios nga Adlaw . . . Bisan pa ginakilala na sa Roma ang Cristianismo bangod sa Mando ni Constantino, ang mito tuhoy sa . . . dios nga Adlaw lapnag gihapon, ilabi na sa mga soldado. Ang nasambit nga mga selebrasyon, nga ginahiwat tanan sa Disiembre 25, naghalin gid sa popular nga tradisyon. Agod mangin Cristiano nga selebrasyon ang Disiembre 25, ginpili sang Simbahan sang Roma ini nga adlaw para saulugon ang pagkabun-ag sang matuod nga Adlaw sang Katarungan nga si Jesucristo sa baylo nga ipatungod ini nga selebrasyon sa dios nga Adlaw.”
Kamusta naman ang paggamit sang Christmas tree, nga nangin bahin na sang Katoliko nga tradisyon?
Ang artikulo sang pamantalaan nagsiling nga sang dumaan nga mga tion, madamo nga evergreen, subong sang “holly, butcher’s broom, laurel kag mga sanga sang pino ang ginapatihan nga may mga birtud ukon gahom nga makapaayo sing mga balatian.” Ang artikulo nagsiling pa: “Sa Bisperas sang Paskua, Disiembre 24, ginadumdom sanday Adan kag Eva sa isa ka popular nga sugilanon tuhoy sa Kahoy sang dutan-on nga Paraiso . . . Dapat gid tani nga kahoy nga mansanas ang gamiton, apang bangod indi ini bagay sa tigtulugnaw, ang kahoy nga pino ang ginbutang sa plataporma kag ginpangsab-itan sing mga mansanas ang mga sanga sini ukon, subong simbulo sang palaabuton nga Pagtubos, gingamit ang pinasahi sing desinyo nga mga wafer nga may binukbok nga mga kraker subong simbulo sang presensia ni Jesus sang ginpatok niya ang katapusan nga panihapon, lakip man ang matam-is nga mga pagkaon kag mga regalo para sa mga kabataan.” Ano ang natabo pagligad sini nga tion?
Sang ginsambit nga ang tradisyon sa paggamit sang Christmas tree una nga naghalin sa Alemanya sang ika-16 nga siglo, ang L’Osservatore Romano nagsiling: “Ang Italya amo ang isa sa mga pungsod nga ulihi nagbaton sa Christmas tree, bangod sang lapnag nga huringhuring nga ang paggamit sing mga Christmas tree naghalin sa mga Protestante kag gani dapat islan sang Belen [ang Natividad ukon pagkabun-ag ni Cristo].” Si Papa Paulo VI ang “nag-umpisa sini nga tradisyon sang ginpatindog niya [sa St. Peter’s Square, sa Roma] ang daku kaayo nga Christmas tree” malapit sa Belen.
Mahamuot ka bala sa mga selebrasyon kag mga simbulo nga gintawag nga Cristiano sang isa ka lider sang simbahan bisan pa naghalin ini sa mga pagano? Ginalaygayan sang Biblia ang matuod nga mga Cristiano kon ano ang nagakaigo nga himuon: “Ano bala ang pag-updanay sang pagkamatarung kag kalautan? Ukon ano bala ang paghiambit sang kapawa sa kadudulman?”—2 Corinto 6:14-17.
[Mga piktyur sa pahina 8, 9]
Christmas tree (sa pihak nga pahina) kag ang Belen sa Batikano
[Credit Line]
© 2003 BiblePlaces.com
[Piktyur sa pahina 9]
Ang dios nga adlaw
[Credit Line]
Museum Wiesbaden