Ginhimo Nila nga Mas Mapuslanon ang Ila Kabuhi—Mahimo Mo Man Bala Ini?

SI Marc, nga isa ka utod sa Canada, nagtrabaho anay sa isa ka kompanya nga nagahimo sing mga robot nga ginagamit sa kahawaan. Nagtrabaho sia diri sing part-time kag nagaalagad subong regular payunir. Sang ulihi, gintanyagan si Marc sing promosyon sang iya superbisor, isa ka bug-os tion nga trabaho nga daku ang sueldo. Ano ang ginhimo ni Marc?

Si Amy, nga isa ka utod nga babayi sa Pilipinas, nagregular payunir samtang nagaeskwela. Sang naggradwar sia, gintanyagan sia sing isa ka trabaho nga daku ang sueldo apang dapat sia magtrabaho sing bug-os tion. Ano ang ginhimo ni Amy?

Magkatuhay ang desisyon nanday Marc kag Amy, kag ang resulta sang ila mga desisyon nagapamatuod nga maalamon ang laygay nga ginhatag sa mga Cristiano sa dumaan nga Corinto. Nagsulat si apostol Pablo: “Sugod karon . . . ang mga nagagamit sang kalibutan [dapat magkabuhi] subong sang mga wala nagagamit sini sing bug-os.”—1 Cor. 7:29-31, NW.

Indi Bug-os nga Paggamit sang Kalibutan

Antes naton hibaluon kon ano ang natabo kanday Marc kag Amy, binagbinagon anay naton sing makadali ang kahulugan sang tinaga nga “kalibutan” (ukon, koʹsmos sa Griego) nga gingamit ni Pablo sa iya sulat sa mga taga-Corinto. Sa sina nga teksto, ang koʹsmos nagapatuhoy sa sistema sang kalibutan nga aton ginapuy-an, ang tawhanon nga katilingban sa kabug-usan, nga nagalakip sa ordinaryo nga mga butang nga bahin sang aton inadlaw nga kinahanglanon, subong sang balay, pagkaon, kag panapton.a Agod matigayon ini nga mga kinahanglanon, ang kalabanan sa aton dapat magtrabaho. Sa pagkamatuod, wala kita sing mahimo kundi gamiton ang kalibutan agod matuman ang aton Makasulatanhon nga obligasyon nga amanan ang aton kaugalingon kag ang aton pamilya. (1 Tim. 5:8) Apang, sa amo man nga tion, nahibaluan naton nga “ang kalibutan nagataliwan.” (1 Juan 2:17, NW) Busa, ginagamit naton ang kalibutan suno sa aton kinahanglanon apang indi “sing bug-os.”—1 Cor. 7:31, NW.

Bangod napahulag sang laygay sa Biblia nga limitehan ang paggamit sang kalibutan, madamo nga mga kauturan ang nag-usisa liwat sang ila mga kahimtangan, ginbuhinan ang ila tion sa pagtrabaho, kag ginpasimple ang ila pagkabuhi. Sang ginhimo nila ini, natukiban nila nga nangin mas mapuslanon ang ila kabuhi bangod mas madamo sila sing tion para sa ila pamilya kag sa pag-alagad kay Jehova. Dugang pa, bangod sang ila simple nga pagkabuhi nabuhinan ang ila pagsandig sa kalibutan kag labi nga nagdugang ang ila pagsandig kay Jehova. Mahimo mo man bala nga pasimplehon ang imo kabuhi agod mapasangkad ang mga intereses sang Ginharian sang Dios?—Mat. 6:19-24, 33.

“Nagabatyag Kami Karon nga Mas Suod kay Jehova”

Si Marc, nga ginsambit kaina, nagsunod sa laygay sang Biblia nga indi paggamiton sing bug-os ang kalibutan. Gindis-ayrihan niya ang promosyon. Pagligad sing pila ka adlaw, gintanyagan liwat si Marc sang iya superbisor sing mas daku pa gid nga sueldo agod ganyaton sia nga batunon ang bag-o nga trabaho. “Isa gid ini ka pagtilaw,” siling ni Marc, “apang gindis-ayrihan ko ini gihapon.” Nagpaathag sia kon ngaa: “Luyag namon sang akon asawa nga si Paula nga dugangan ang amon tion sa pag-alagad kay Jehova tubtob sa amon masarangan. Busa, namat-od kami nga pasimplehon ang amon pagkabuhi. Nangamuyo kami sing kaalam kay Jehova agod malab-ot namon ini nga tulumuron kag nagpahamtang sing petsa kon san-o kami magsugod sa paghinguyang sing dugang pa gid nga tion sa pag-alagad sa Iya.”

Nagsiling si Paula: “Nagatrabaho ako sadto sing tatlo ka adlaw kada semana subong sekretarya sa isa ka ospital kag may maayo nga sueldo. Regular payunir man ako. Apang, kaangay ni Marc, luyag ko man alagaron si Jehova sa duog nga mas nagakinahanglan sing mga manugbantala sang Ginharian. Apang, sang ginhatag ko ang akon sulat tuhoy sa akon paghalin, nagsiling ang akon superbisor nga bag-o lang nabakante ang posisyon subong puno nga sekretaryo kag kalipikado kuno ako. Amo ini ang may pinakadaku sing sueldo nga trabaho sang isa ka sekretarya sa ospital, apang nagpabilin ako sa akon desisyon. Sang ginsugid ko sa akon superbisor ang rason kon ngaa indi ako mag-aplay sa sina nga posisyon, gindayaw niya ako bangod sang akon pagtuo.”

Sang ulihi, gin-asayn sanday Marc kag Paula subong espesyal payunir sa isa ka gamay nga kongregasyon sa naligwin nga duog sa Canada. Ano ang resulta sang ila pagsaylo? Nagsiling si Marc: “Sang ginbiyaan ko ang isa ka malig-on nga trabaho nga ginhinguyangan ko sing halos katunga sang akon kabuhi, nahangawa ako, apang ginpakamaayo ni Jehova ang amon ministeryo. Nalipay gid kami sa pagpaambit sang espirituwal nga mga dulot sa iban. Ginpapag-on man sang bug-os tion nga pag-alagad ang amon pag-asawahay. Ang amon pagsugilanunay nasentro sa espirituwal, nga amo gid ang importante nga butang. Nagabatyag kami karon nga mas suod kay Jehova.” (Binu. 20:35) Nagdugang si Paula: “Kon biyaan mo ang imo trabaho kag ang kasulhay sa inyo duog, dapat nga magsalig ka sing bug-os kay Jehova. Ginhimo namon ini, kag ginpakamaayo kami ni Jehova. Ginpabatyag man kami sang amon pinalangga nga mga kauturan sa amon bag-o nga kongregasyon nga ginahigugma kag ginakinahanglan nila kami. Ang kusog nga gingamit ko sang una sa pagtrabaho, ginagamit ko na karon sa pagbulig sa mga tawo sa espirituwal. Nagaawas gid ang akon kalipay sa pag-alagad sa sini nga asaynment.”

‘Bugana Apang Indi Malipayon’

Tuhay naman ang desisyon ni Amy nga ginsambit kaina. Ginbaton niya ang gintanyag sa iya. Nagsiling si Amy: “Sa una nga tuig, aktibo pa ako sa pag-alagad apang ang akon igtalupangod amat-amat nga nagbalhin gikan sa intereses sang Ginharian pakadto sa paghingamo sing promosyon. Nakatigayon ako sing makagalanyat nga mga tanyag agod mag-uswag ang akon karera kag ginhinguyang ko ang akon kusog agod makatigayon pa gid sing mas mataas nga posisyon. Samtang nagadugang ang akon responsibilidad sa akon trabaho, nagadiutay man ang akon tion sa pagministeryo. Sang ulihi, nag-untat na ako sa pagbantala.”

Sa paghinumdom sa sina nga tion, nagsiling si Amy: “Bugana ako sa pinansial. Pirme ako nagabiyahe kag ginahangad sang iban bangod sang akon posisyon. Apang, indi ako malipayon. Bisan pa may kuarta ako, madamo ako sing problema. Nagapalibog ako kon ngaa. Nian nakamarasmas ako nga bangod naghingamo ako sing isa ka karera sa kalibutan, halos nagtalang na ako gikan sa pagtuo. Naeksperiensiahan ko gid ang ginsiling sang Pulong sang Dios. Nag-antos ako sing ‘madamo nga kasakit.’”—1 Tim. 6:10, NW.

Ano ang ginhimo ni Amy? Nagsiling sia: “Nagpabulig ako sa mga gulang agod mangin mapagros liwat sa espirituwal kag nagtambong sa mga miting. Sa tion sang ambahanon, nagatululagay ang akon luha. Nadumduman ko kon daw ano ako ka malipayon sa tion sang akon lima ka tuig nga pagpakigbahin sa pagpangani subong payunir, bisan pa nga pigado ako sang una. Narealisar ko nga dapat ko untatan ang pag-uyang sing tion sa paghingamo sing kuarta kag dapat ko unahon ang mga intereses sang Ginharian. Nagkuha ako sing mas manubo nga posisyon sa akon ginatrabahuan agod nga makapakigbahin liwat sa pagbantala. Apang, nagapahangop ini nga mawasi ko ang 50 porsiento sang akon sueldo sang una.” Malipayon nga nagsiling si Amy: “Nalipay ako sa pag-alagad subong payunir sa sulod sang pila ka tuig. Nabatyagan ko na karon ang kaayawan nga wala ko anay naeksperiensiahan sang nagtrabaho ako para sa kalibutan.”

Mabag-o mo bala ang imo kahimtangan kag mapasimple ang imo pagkabuhi? Kon ihinguyang mo ang imo tion sa pagpalapnag sang mga intereses sang Ginharian, mahimo man mangin mapuslanon ang imo kabuhi.—Hulu. 10:22.

[Footnote]

[Blurb sa pahina 19]

Mahimo mo bala mabag-o ang imo mga kahimtangan kag mapasimple ang imo pagkabuhi?

[Kahon/​Piktyur sa pahina 19]

“Naluyagan Ko Gilayon Ini!”

Ginahandum gid sang isa ka Cristianong gulang sa Estados Unidos nga si David nga buylugan ang iya asawa kag kabataan sa bug-os tion nga pag-alagad. Nagpasugot ang kompanya nga iya ginatrabahuan nga matrabaho sia sing part-time, amo nga nakaregular payunir sia. Ano ang resulta sini sa iya kabuhi? Pagligad sing pila ka bulan, nagsulat si David sa iya amigo: “Indi gid matupungan ang kalipay sa pag-alagad kay Jehova sing bug-os tion upod sa pamilya. Abi ko anay madugayan pa ako nga makapasibu sa pagpayunir, apang naluyagan ko gilayon ini! Daw ano gid ka makapaumpaw!”

[Piktyur sa pahina 18]

Sanday Marc and Paula samtang nagapanaksi