Mga Balibad—Paano Ini Ginatamod ni Jehova?
“ANG babayi nga ginhatag mo nga manginkaupud ko, ginhatagan niya ako gikan sa kahoy, kag nagkaon ako,” siling sang lalaki. “Ang man-ug nagdaya sa akon, kag nagkaon ako,” sabat sang babayi. Ining pinamulong sang aton unang mga ginikanan nga sanday Adan kag Eva sa Dios amo ang pinakauna nga mga balibad nga ginhimo sang tawo.—Gen. 3:12, 13.
Ang pagsilot ni Jehova kanday Adan kag Eva nagapakita nga wala niya ginbaton ang ila mga balibad sa ila hungod nga paglalis. (Gen. 3:16-19) Buot bala silingon sini nga wala ginabaton ni Jehova ang tanan nga balibad? Ukon may balibad man nga ginabaton niya? Paano naton mahibaluan kon ano nga mga balibad ang ginabaton niya kag kon ano ang wala? Agod masabat ina, binagbinagon anay naton kon ano ang kahulugan sang balibad.
Ang balibad amo ang rason nga ginahatag sang isa agod ipaathag kon ngaa ang isa ka butang ginhimo niya, wala ginhimo, ukon indi paghimuon. Ang balibad mahimo mangin isa ka makatarunganon nga paathag sa sayop nga nahimo kag mahimo man hangpon subong pagpangayo sing pasaylo kag mangin basihan sang pagpasensia ukon pagpatawad. Apang, kaangay sang natabo kanday Adan kag Eva, ang balibad mahimo man nga isa ka indi matuod nga rason, sayop nga pangatarungan nga ginagamit agod hinabunan kon ano gid ang matuod. Bangod ang balibad masami nga indi matuod, pirme ini ginaduhaduhaan.
Kon nagabalibad kita, ilabi na tuhoy sa aton pag-alagad sa Dios, indi naton ‘pagdayaon ang aton kaugalingon paagi sa butig nga pangatarungan.’ (Sant. 1:22) Binagbinagon naton ang pila sa mga halimbawa kag prinsipio sa Biblia nga makabulig sa aton nga ‘padayon nga mapat-od kon ano ang kalahamut-an sa Ginuo.’—Efe. 5:10.
Kon Ano ang Ginapaabot sang Dios sa Aton
Mabasa naton sa Pulong sang Dios ang espesipiko nga mga sugo nga dapat naton sundon subong katawhan ni Jehova. Halimbawa, ang sugo ni Cristo nga ‘maglakat kag maghimo sang mga disipulo sa mga tawo sang tanan nga pungsod’ dapat gid tumanon sang tanan niya nga matuod nga mga sumulunod. (Mat. 28:19, 20) Sa pagkamatuod, ang pagtuman sini nga sugo importante gid amo nga si apostol Pablo nagsiling: “Kailo ako kon indi ko pag-ipahayag ang maayong balita!”—1 Cor. 9:16.
Walay sapayan sini, ang pila sa madugay na nga nagatuon sang Biblia nagapangalag-ag gihapon nga magpakigbahin sa pagbantala. (Mat. 24:14) May iban nga nagapakigbahin anay sa pagbantala nga sang ulihi nag-untat. Ano ang ila balibad? Ano ang reaksion ni Jehova sa mga nagpangalag-ag sa pagtuman sa iya espesipiko nga mga sugo sang una?
Mga Balibad nga Wala Ginabaton sang Dios
“Mabudlay ini katama.” Para sa mga tawo nga mahuluy-on, mabudlay katama ang pagbantala. Apang, binagbinagon naton kon ano ang aton matun-an sa halimbawa ni Jonas. Ginhatagan sia sang asaynment nga para sa iya mabudlay gid katama—ginsugo sia ni Jehova nga ipahayag ang nagahilapit nga kalaglagan sang Ninive. Gani, mahangpan naton kon ngaa nabudlayan gid sia sa pagtuman sini nga sugo. Ang Ninive amo ang kapital sang Asiria kag ang mga Asirianhon nakilal-an gid sa ila kapintas. Mahimo nga naghunahuna si Jonas: ‘Ano ang matabo sa akon kon atubangon ko ini nga mga tawo? Ano ayhan ang himuon nila sa akon?’ Bangod sini, nagpalagyo sia. Apang wala ginbaton ni Jehova ang balibad ni Jonas. Sa baylo, ginpabalik sia ni Jehova sa pagbantala sa mga taga-Ninive. Sa sini nga tion, nangin maisog na si Jonas sa pagtuman sang iya hilikuton kag bangod sini, ginpakamaayo sia ni Jehova.—Jon. 1:1-3; 3:3, 4, 10.
Kon nagabatyag ka nga indi mo masarangan ang pagbantala nga hilikuton, dumduma nga “ang tanan nga butang posible sa Dios.” (Mar. 10:27) Makasalig ka nga pabakuron ka ni Jehova kon padayon mo nga pangayuon ang iya bulig kag pakamaayuhon ka niya kon tinguhaan mo nga mangin maisog sa pagtuman sang imo ministeryo.—Luc. 11:9-13.
“Indi ko.” Ano ang himuon mo kon wala ka sing gana nga tumanon ang imo Cristianong ministeryo? Dumduma nga sarang mabag-o ni Jehova ang imo mga handum. Si Pablo nagsiling: “Ang Dios amo ang isa nga tungod sa iya nahamut-an nagapanghikot sa sulod ninyo agod magbuot kamo kag manghikot.” (Fil. 2:13) Gani, mahimo ka mangabay kay Jehova nga buligan ka nga mahimo ang iya kabubut-on. Amo sina ang ginhimo ni Hari David. Nagpakitluoy sia kay Jehova: “Tuytuyi ako sa imo kamatooran.” (Sal. 25:4, 5) Mailog mo si David paagi sa hanuot nga pagpangamuyo kay Jehova nga pahulagon ka nga himuon kon ano ang ginakahamut-an niya.
Huo, bangod sa kakapoy ukon kaluya sing buot may mga tion nga kinahanglan pa naton piliton ang aton kaugalingon nga magtambong sa mga miting ukon magpakigbahin sa ministeryo. Kon amo sina ang imo ginabatyag, buot bala silingon nga indi tudok ang imo gugma kay Jehova? Indi. Bisan ang matutom nga mga alagad sang Dios sang una kinahanglan man manikasog sing lakas agod matuman ang kabubut-on sang Dios. Halimbawa, si Pablo nagsiling nga ‘ginasakit niya ang iya lawas’ agod matuman ang mga sugo sang Dios. (1 Cor. 9:26, 27) Gani, bisan pa ginapilit naton ang aton kaugalingon sa pagtuman sang aton ministeryo, makasalig kita nga pakamaayuhon kita ni Jehova. Ngaa? Bangod may nagakaigo kita nga rason nga piliton ang aton kaugalingon sa paghimo sang kabubut-on sang Dios—ang aton gugma kay Jehova. Sa paghimo sini, masabat naton ang pangangkon ni Satanas nga wala sang alagad sang Dios ang magapabilin nga matutom sa Iya kon tilawan.—Job 2:4.
“Masako gid ako.” Kon wala ka nagapakigbahin sa ministeryo bangod nagabatyag ka nga tuman sa imo kasako, importante gid nga usisaon mo ang imo mga prioridad. “Gani, padayon nga pangitaa anay ang ginharian,” siling ni Jesus. (Mat. 6:33) Agod masunod mo ini nga prinsipio, mahimo kinahanglan mo pasimplehon ang imo kabuhi ukon buhinan ang tion sa mga paglingawlingaw agod may tion ka para sa pagministeryo. Siempre, nagakaigo man nga hatagan sing tion ang mga kalingawan kag ang iban pa nga personal nga mga hilikuton, apang indi ini makatarunganon nga balibad para patumbayaan ang aton ministeryo. Para sa mga alagad sang Dios, ang intereses sang Ginharian amo ang labing importante.
“Indi ko ina masarangan.” Mahimo magbatyag ka nga indi ka kalipikado nga mangin ministro sang maayong balita. Amo man sina ang ginbatyag sang matutom nga mga alagad sang Dios sang panahon sang Biblia. Nagbatyag sila nga indi nila masarangan ang hilikuton nga ginhatag ni Jehova sa ila. Ang isa ka halimbawa amo si Moises. Sang ginhatagan sia ni Jehova sang espesipiko nga sugo, si Moises nagsiling: “O, Ginoo ko, indi ako madagmit maghambal, bisan tubtub karon ukon kutub sang pagpamolong mo sa imo alagad; kondi makuli ako sa paghambal kag mabug-at sing dila.” Bisan pa ginpasalig sia ni Jehova, si Moises nagsiling: “O, Ginoo ko, ginaampo ko, ipadala ang iban nga tawo.” (Ex. 4:10-13) Ano ang ginhimo ni Jehova?
Wala ginhatag ni Jehova sa iban ang asaynment nga ginpahimo niya kay Moises. Apang, gintangdo ni Jehova si Aaron agod magbulig kay Moises sa pagtuman sang iya hilikuton. (Ex. 4:14-17) Dugang pa, wala ginpabay-an ni Jehova si Moises kundi ginhatagan sia sang iya mga kinahanglanon agod magmadinalag-on sa pagtuman sang sugo sang Dios. Sa karon, makasalig ka man nga gamiton ni Jehova ang eksperiensiado nga mga kauturan agod buligan ka sa pagtuman sang imo ministeryo. Labaw sa tanan, ginapasalig kita sang Pulong sang Dios nga buligan kita ni Jehova nga mangin kalipikado sa hilikuton nga gintugyan niya sa aton.—2 Cor. 3:5; tan-awa ang kahon nga “Ang Pinakamalipayon nga mga Tuig sang Akon Kabuhi.”
“May nakasaklaw sa akon.” Ang pila nag-untat sa pagbantala kag pagtambong sa mga miting bangod may nakasaklaw sa ila, kag nagahunahuna sila nga batunon ni Jehova ang ila balibad. Huo, normal lang nga maglain ang aton buot kon may makasaklaw sa aton. Apang makatarunganon bala nga himuon naton ini nga balibad agod mag-untat kita sa aton Cristianong mga hilikuton? Si Pablo kag si Bernabe mahimo naglainay man sing buot pagkatapos sang ila di-paghangpanay kag “pagsilabo sang kaakig.” (Binu. 15:39) Apang may isa bala sa ila nga nag-untat sa pag-alagad? Wala gid!
Sing kaanggid, kon may utod nga nakasaklaw sa imo, dumduma nga indi sia ang imo kaaway kundi si Satanas—ang isa nga luyag magtukob sa imo. Apang, ang Yawa indi magmadinalag-on kon ‘magtindog ka batok sa iya, nga malig-on sa pagtuo.’ (1 Ped. 5:8, 9; Gal. 5:15) Kon amo sina ang imo pagtuo, indi ka gid “malugaw-an.”—Roma 9:33.
Kon Limitado Lang ang Aton Mahimo
Ginapakita sang mga halimbawa nga aton nabinagbinag nga ang espesipiko nga mga sugo ni Jehova, subong sang sugo nga magbantala, indi gid puede balibaran. Apang, may makatarunganon nga rason kon ngaa limitado lang ang aton mahimo sa ministeryo. Ayhan bangod ini sang iban pa nga Makasulatanhon nga mga katungdanan. Kon kaisa, bisan pa luyag naton himuon ang aton bug-os nga masarangan sa pag-alagad kay Jehova, ginaupangan kita sang sobra nga kakapoy ukon indi maayo nga panglawas. Apang, ang Pulong sang Dios nagapasalig sa aton nga nahibaluan ni Jehova kon ano ang handum sang aton tagipusuon kag nahangpan niya ang aton mga limitasyon.—Sal. 103:14; 2 Cor. 8:12.
Gani, dapat kita maghalong nga indi naton paghukman ang aton kaugalingon ukon ang iban. Si apostol Pablo nagsulat: “Sin-o ka nga maghukom sa alagad sa balay sang iban? Sa iya kaugalingon nga agalon nagatindog ukon nagakapukan sia.” (Roma 14:4) Sa baylo nga ikumparar ang aton kahimtangan sa iban, dumdumon naton nga “ang kada isa sa aton manabat sang iya kaugalingon sa Dios.” (Roma 14:12; Gal. 6:4, 5) Kon mangamuyo kita kay Jehova kag magsugid sang aton mga balibad sa iya, dapat naton himuon ini upod ang ‘bunayag nga konsiensia.’—Heb. 13:18.
Kon Ngaa ang Pag-alagad kay Jehova Nagahatag sa Aton sing Kalipay
Kita tanan sarang mangin malipayon sa pag-alagad kay Jehova bangod ang iya mga ginapatuman sa aton makatarunganon gid kag masarangan naton himuon bisan ano man ang aton kahimtangan sa kabuhi. Ngaa?
Ang Pulong sang Dios nagasiling: “Indi pag-idingot ang maayo sa mga nagakinahanglan sini, kon masarangan mo ini himuon.” (Hulu. 3:27, NW) Ano ang matun-an mo sa sini nga hulubaton tuhoy sa ginapatuman sang Dios? Wala nagsiling si Jehova nga dapat mo tupungan ang ginahimo sang iban, kundi alagaron mo Sia suno sa ‘masarangan mo himuon.’ Huo, ang kada isa sa aton—ano man ka diutay ukon kadamo sang aton masarangan—sarang makaalagad kay Jehova sing bug-os tagipusuon.—Luc. 10:27; Col. 3:23.
[Kahon/Retrato sa pahina 14]
“Ang Pinakamalipayon nga mga Tuig sang Akon Kabuhi”
Bisan pa may mga kasablagan kita sa pisikal ukon problema sa emosyon, indi kita maghinakop nga indi na kita makapakigbahin sing bug-os sa ministeryo. Subong halimbawa, binagbinagon naton ang natabo kay Ernest, isa ka Cristianong utod nga lalaki sa Canada.
Si Ernest may problema sa paghambal kag tuman ka mahuluy-on. Naghalin sia sa iya trabaho subong construction worker bangod sang iya malubha nga balatian. Huo, nadulaan sia sing trabaho bangod sa kasablagan, apang nadugangan naman ang iya tion sa ministeryo. Sang nakabati sia sang pagpalig-on sa miting sang kongregasyon tuhoy sa pag-auxiliary payunir natandog gid ang iya tagipusuon. Apang, nagbatyag sia nga indi niya ini masarangan.
Agod pamatud-an nga indi niya masarangan ang pag-auxiliary payunir, nag-aplay sia para sa isa ka bulan. Apang nakibot gid sia kay nalab-ot niya ang tulumuron nga oras. Dayon naghunahuna sia, ‘Indi ko na ini mahimo liwat.’ Agod pamatud-an ini, nag-aplay naman sia pagkasunod nga bulan. Kag nalab-ot niya gihapon ang iya oras.
Nag-alagad si Ernest subong auxiliary payunir sa sulod sang isa ka tuig, apang nagsiling sia, “Sigurado ako nga indi ko gid masarangan nga magregular payunir.” Gani, agod mapamatud-an ini, nag-aplay sia subong regular payunir. Nakibot gid sia sang nalab-ot niya ang iya oras sa una nga tuig sang iya pagregular payunir. Gani, nagpadayon sia sa pag-alagad subong regular payunir sa sulod sang duha ka tuig tubtob naglala ang iya balatian kag napatay sia. Apang, antes sia napatay, pirme niya ginasilingan ang mga nagabisita sa iya samtang nagalumawlumaw ang iya mga mata, “Ang pinakamalipayon nga mga tuig sang akon kabuhi amo ang mga tuig nga nagaalagad ako kay Jehova subong payunir.”
[Retrato sa pahina 13]
Sarang naton malandas ang bisan ano nga balagbag sa aton ministeryo
[Retrato sa pahina 15]
Nahamuot si Jehova kon nagaalagad kita sa iya sing bug-os kalag nga ginahimo ang aton bug-os nga masarangan suno sa aton kahimtangan