Natun-an Namon “ang Sekreto” sa Amon Sagrado nga Pag-alagad

Panugiron ni Olivier Randriamora

“Nahibaluan ko gid kon ano ang ginakulang, nahibaluan ko gid kon ano ang mangin bugana. Natun-an ko ang sekreto nga mangin kontento sa tanan nga butang kag sa tanan nga kahimtangan, busog man ukon gutom . . . Sa tanan nga butang may kusog ako paagi sa iya nga nagapabakod sa akon.”—Fil. 4:12, 13.

INING ginsiling ni apostol Pablo madugay na nga nagapabakod sa akon kag sa akon asawa nga si Oly. Pareho kay Pablo, natun-an namon “ang sekreto” paagi sa pagsalig sing bug-os kay Jehova samtang ginaalagad namon Sia sa Madagascar.

Sang gintun-an sang mga Saksi ni Jehova sa Biblia ang iloy ni Oly sang 1982, naganobyahanay na kami ni Oly. Nagtuon man ako sa Biblia, kag sang ulihi nag-upod man si Oly. Nagpakasal kami sang 1983, nabawtismuhan sang 1985, dayon nag-auxiliary payunir. Sang Hulyo 1986, nangin regular payunir kami.

Sang Septiembre 1987, nag-alagad kami bilang espesyal payunir. Gin-asayn kami sa gamay nga banwa sa aminhan-katundan sang Madagascar diin wala sing kongregasyon. Ang Madagascar may mga 18 ka etniko nga grupo, madamo nga tribo, kag lainlain nga kustombre kag tradisyon. Malagasy ang opisyal nga lenguahe diri, pero madamo sing dialekto. Gani gintun-an namon ang dialekto sa amon bag-o nga asaynment, amo nga labi kami nga ginbaton sa sini komunidad.

Nagapamulongpulong ako kada Domingo pero si Oly lang ang nagapalakpak kay duha lang kami ang nagatambong. Nagahiwat man kami sing Teokratikong Eskwelahan Para sa Ministeryo, kag ginaimadyin lang ni Oly nga may householder sia. Maayo lang kay sang nagduaw ang manugtatap sang sirkito, ginpanugyan niya nga bag-uhon namon ang pamaagi sa paghiwat sang mga miting.

Bangod indi regular ang pag-abot sang mga sulat, indi namon mabaton sing regular ang amon allowance kada bulan. Gani naagyan namon nga ginakulang kami. Isa ka bes, kulang ang amon inugplete para makatambong sa sirkito nga asembleya, nga mga 130 kilometros ang kalayuon. Nadumduman namon ang laygay sang isa man ka Saksi: “Isugid kay Jehova ang inyo mga problema. Kay ti, iya hilikuton ang inyo ginahimo.” Gani nangamuyo kami kag nagdesisyon nga lakton na lang namon. Pero antes kami maghalin, ginbisitahan kami sang isa ka utod kag ginhatagan sing kuarta nga insaktuhan gid sa amon inugplete!

HILIKUTON SA SIRKITO

Sang Pebrero 1991, gintangdo ako bilang manugtatap sang sirkito. Sina nga tion, may 9 na ka manugbantala ang amon gamay nga grupo, 3 sa sini ang bawtismado, kag mga 50 na ang nagatambong sa mga miting. Pagkatapos ako mahanas, nag-alagad kami sa sirkito sa kapital nga siudad nga Antananarivo. Sang 1993, gin-asayn kami sa nasidlangan nga bahin sang pungsod. Lain gid ang pagkabuhi didto sangsa siudad.

Para malab-ot ang mga kongregasyon kag naligwin nga mga grupo, nagalakat kami kon kaisa sing mga 145 kilometros sa mga kagulangan sa kabukiran. Diutay lang ang amon ginadala. Pero nagadamo ini kon kinahanglan sa pamulongpulong ang slide presentation, nga pirme ginahimo sadto. Si Oly ang nagadala sang projector, kag ako naman ang nagadala sang 12 boltahe nga baterya sang salakyan.

Sa masami, mga 40 kilometros kada adlaw ang amon malakat para makalab-ot sa masunod nga kongregasyon. Nagataklad kami sa kabukiran, nagatabok sa mga suba, kag nagatarag sa lunang. Kon kaisa, nagatulog kami sa higad sang dalan, pero sa masami nagapangita gid kami sing madayunan kon gab-i. Nagadayon pa gani kami bisan sa indi namon kilala. Kon makakita kami sing dalayunan, nagadigamo kami dayon. Nagahulam si Oly sing lulutuan kag nagakadto sa suba ukon linaw para magsag-ob. Nagahulam man ako sing wasay para magbi-al sing galatungon. Nagauyang ini sang amon tiempo. Kon kaisa, nagabakal kami sing manok nga amon dayon ginaihaw.

Pagkatapos namon kaon, nagasag-ob kami sang amon inugpaligo. May tion man nga nagatulog kami sa kusina. Kon mag-ulan, nagasandig na lang kami sa dingding para indi mabasa sa nagatulo nga atop.

Ginapanaksihan namon pirme ang tag-iya sang dalayunan. Pag-abot namon sa amon kaladtuan, mabatyagan gid namon ang kaayo kag pag-abiabi sang mga kauturan. Bangod sa ila apresasyon sa amon pagbisita, balewala na lang ang amon mga kabudlayan.

Kon magdayon kami sa balay sang mga kauturan, ginabuligan namon sila sa mga ulubrahon sa balay. Gani, makaupod sila sa amon sa pagministeryo. Wala kami nagapangita sing kasulhayan ukon espesyal nga mga pagkaon nga indi masarangan sang mga kauturan.

PAGBISITA SA NALIGWIN NGA MGA GRUPO

Nalipay kami magbisita sa naligwin nga mga grupo. Didto, puno gid ang amon iskedyul amo nga daw indi na kami ‘makapahuwayhuway.’ (Mar. 6:31) Sa isa ka lugar, gin-agda sang Saksi nga mag-asawa sa ila balay ang ila 40 ka ginatun-an sa Biblia para makaupod kami sa ila pagtuon. Si Oly kag ang asawa ang nagdumala sa mga 20 ka estudyante, kag kami sang bana ang nagdumala sa nabilin nga 20. Pagkatapos tun-an ang isa ka estudyante, masunod dayon ang isa. Sang hapon, naghiwat kami anay sing miting kag pagkatapos ginpadayon namon ang pagtuon asta sa mga alas otso sang gab-i!

Sang nagbisita kami sa isa pa ka grupo, tanan kami nagkadto sa isa ka baryo sang mga alas otso sang aga. Daan nga bayo ang amon ginsuksok. Pagkatapos sang malawig nga paglatas sa kagulangan, udto na kami nakalab-ot sa teritoryo. Nag-ilis kami sing matinlo nga bayo kag nagwali dayon sa mga balay. Malaka lang ang pamalay pero kadamo sang mga manugbantala. Gani nakobrehan namon ang teritoryo sa sulod lang sang mga 30 minutos. Dayon nagdiretso kami sa masunod nga baryo. Pagkatapos makabantala didto, naglakbay naman kami sing malawig pauli. Sang primero, daw naluyahan kami kay kalawig sang amon ginlakat pero mga isa lang ka oras ang amon pagbantala. Pero ang mga Saksi didto wala gid nagreklamo. Positibo sila gihapon.

Ang isa ka naligwin nga grupo sa Taviranambo ara nayon sa putukputukan sang bukid. Nakilala namon didto ang isa ka pamilya nga Saksi nga nagaistar sa balay nga may isa lang ka kuarto. Sa tupad sang balay may isa ka gamay nga tinukod nga ginahiwatan sang miting. Wala madugay, ang tagbalay nagsinggit, “Mga kauturan!” Sa pihak sang bukid, may nagsabat, “Ano!” Nagsinggit liwat ang tagbalay, “Ari na ang aton C.O!” Dayon may nagsabat, “A gali!” Ini nga mensahe ginpalab-ot sa iban pa nga nagaistar sa malayo. Sang ulihi, sobra 100 ang nag-abot agod magtambong sa miting.

MGA KABUDLAYAN SA PAGLAKBAY

Sang 1996, gin-asayn kami malapit sa Antananarivo, sa nabukid nga bahin. Pinasahi man ang amon naagyan sa sini nga sirkito. Wala sing regular nga biyahe pakadto sa mga kaumhan. Nakaiskedyul kami nga magbisita sa isa ka grupo sa Beankàna (Besakay), nga mga 240 kilometros halin sa Antananarivo. Pagkatapos maistorya ang drayber, nagsakay kami sa isa ka gamay nga trak. Kaupod namon ang mga 30 ka pasahero nga ang iban ara sa atop kag ang iban naman nagakinabit.

Subong sang pirme nagakatabo, naaberiya ang amon trak, gani naglakat na lang kami. Pagligad sang pila ka oras, may nag-agi nga daku nga trak. Ginpadulog ini sang drayber bisan pa puno na ini sang pasahero kag kargamento. Nagsakay kami pero nagatindog lang. Pagsampot namon sa suba, ginakay-o pa ang taytay. Gani naglakat kami liwat kag nakalab-ot sa gamay nga baryo, diin nagaistar ang pila ka espesyal payunir. Bisan indi pa tion sang pagbisita didto, nagbantala kami anay upod sa ila asta makay-o ang taytay kag may mag-agi nga salakyan.

Isa pa ka semana antes naglabay ang salakyan kag ginpadayon namon ang amon paglakbay. Batsihon ang dalan. Pirme kami nagabulig sa pagtulod sa salakyan sa tagatuhod nga tubig, kag sa masami nagakadasma kami kag nagakatumba. Kaagahon na kami nag-abot sa gamay nga baryo, kag diri kami nagpanaug. Naglakat kami dayon sa mga talamnan kag nag-ubog sa tagahawak nga lutakon nga tubig pakadto sa amon kaladtuan.

Ini ang amon una nga pagbisita sa sini nga lugar, gani ginpanaksihan namon ang pila ka mangunguma kag ginpamangkot kon diin ang balay sang mga Saksi didto. Nalipay gid kami kay yadto nga mga mangunguma mga kauturan gali!

PAGPALIG-ON SA IBAN NGA MAGSULOD SA BUG-OS TION NGA MINISTERYO

Sa sulod sang mga tinuig, nalipay gid kami nga makita ang mga resulta sa pagpalig-on sa iban nga magsulod sa bug-os tion nga ministeryo. Sang nagbisita kami sa isa ka kongregasyon nga may siam ka regular payunir, ginpalig-on namon ang tagsa ka payunir nga maghimo sing tulumuron nga buligan ang isa ka manugbantala nga magpayunir. Sang nagbisita kami liwat pagligad sang anom ka bulan, 22 na ang ila regular payunir. Ginpalig-on sang duha ka payunir nga sister ang ila amay nga mga gulang nga magregular payunir. Ginpalig-on man sining duha ka gulang ang isa pa ka gulang nga mag-upod sa ila. Sang ulihi, ini nga gulang nangin espesyal payunir. Dayon nag-alagad sia sa sirkito upod sa iya asawa. Kamusta naman yadtong duha ka gulang? Ang isa nangin manugtatap sang sirkito, kag ang isa naman nangin boluntaryo sa pagtukod sang Kingdom Hall.

Ginapasalamatan namon si Jehova kada adlaw bangod sa iya bulig kay indi namon ini tanan masarangan paagi lamang sa amon kusog. Matuod, ginakapoy man kami kag nagamasakit, pero nalipay kami kon dumdumon namon ang mga resulta sang amon ministeryo. Ginapauswag ni Jehova ang iya hilikuton. Sa karon, nalipay kami nga makapakigbahin sa sini subong mga espesyal payunir. Huo, natun-an namon “ang sekreto” paagi sa pagsalig kay Jehova, “nga nagapabakod” sa amon.

[Blurb sa pahina 6]

Natun-an namon “ang sekreto” paagi sa pagsalig kay Jehova

[Mapa/Mga Retrato sa pahina 4]

Ang Madagascar, nga ginatawag Big Red Island, amo ang ikap-at nga pinakadaku nga isla sa kalibutan. Pula ang duta diri, kag may lainlain nga espesyi sang sapat

[Retrato sa pahina 5]

Ang paglakbay isa sa pinakamabudlay namon nga naagyan

[Mga Retrato sa pahina 5]

Nalipay kami sa pagdumala sing mga pagtuon sa Biblia