MGA PAMANGKOT GIKAN SA MGA BUMALASA

Ano ang pamatuod nga wala nagdugay ang paglikop sa dumaan nga siudad sang Jerico antes ini ginsakop?

Suno sa Josue 6:10-15, 20, ang mga soldado sang Israel naglibot sa Jerico sing makaisa kada adlaw sa sulod sang anom ka adlaw. Sa ikapito nga adlaw, naglibot sila sa siudad sing pito ka beses, dayon ginrumpag sang Dios ang mabakod nga mga pader sang Jerico. Gani nakasulod ang mga Israelinhon sa Jerico kag nasakop ini. Nagahisantuanay bala ang nasapwan sang arkeolohiya kag ang ginasiling sang Biblia parte sa malip-ot nga paglikop sa Jerico?

Sang una, kinaandan na nga ginalikupan sang mga kaaway ang siudad nga may mabakod nga depensa. Bisan ano pa kadugay nga likupan ang siudad asta masakop ini, ginakuha sang mga nagdaug ang manggad sang siudad lakip na ang nabilin nga mga pagkaon. Pero ang mga arkeologo may nasapwan nga tuman kadamo nga suplay sang pagkaon sa kagulub-an sang Jerico. Parte sa sini, ang Biblical Archaeology Review nagsiling: “Magluwas sa nasapwan nga tuman kadamo nga gamit nga human sa daga, tuman man kadamo ang uyas sa kagulub-an. . . . Indi ini kinaandan sa rekord sang kasaysayan sang arkeolohiya sa Palestina. Posible nga may makita nga isa ukon duha ka banga sang uyas, pero ang amo sini kadamo tumalagsahon gid.”

Suno sa rekord sang Kasulatan, may rason gid ang mga Israelinhon nga indi pagkuhaon ang mga uyas sa Jerico. Gindumilian sila ni Jehova nga himuon ini. (Jos. 6:17, 18) Nagsalakay ang mga Israelinhon sang tigpamulak, gani bag-o lang natapos ang tig-alani kag bugana ang suplay sang uyas. (Jos. 3:15-17; 5:10) Ang tuman kadamo nga nabilin nga uyas sa Jerico nagapakita nga malip-ot lang ang paglikop sang mga Israelinhon, subong sang ginalaragway sang Biblia.