Kon May Kalamidad
KON nakalampuwas ka sa kalamidad, mahimo naeksperiensiahan mo man ang ginbatyag sang iban nga nakalampuwas: nakibot, indi makapati, nagasalasala, nabalaka, kag nahadlok. Madamo nga nakalampuwas ang nakapoy na kag naluyahan amo nga daw nadulaan na sila sing gana nga magpadayon.
Kon nadula mo ang tanan bangod sa kalamidad, malalain ka gid. Mahimo ka pa gani magbatyag nga wala na sing pulos ang imo kabuhi. Pero, ginapaathag sang Biblia nga may pulos ang imo kabuhi kag may madamo nga rason kon ngaa makasalig ka nga may matahom pa nga palaabuton.
ANG KAMATUORAN SA BIBLIA NAGAHATAG SING PAGLAUM
Ang Manugwali 7:8 nagsiling: “Mas maayo pa ang katapusan sang isa ka butang sangsa pamuno sini.” Kon bag-o ka lang naagyan sing kalamidad, mahimo madulaan ka sing paglaum. Pero kon magtinguha ka, amat-amat nga mangin normal liwat ang imo kabuhi.
Ang Biblia nagpromisa nga sa ulihi “indi na gid mabatian . . . ang tingog sang paghibi ukon ang tingog sang pagtangis.” (Isaias 65:19) Matabo ini kon himuon na ang duta nga paraiso sa idalom sang paggahom sang Ginharian sang Dios. (Salmo 37:11, 29) Wala na sing kalamidad. Ang tanan nga kasakit kag ang mga epekto sini dulaon na sing bug-os, bangod ang Labing Gamhanan nga Dios nagpromisa: “Ang nagligad nga mga butang indi na pagdumdumon, ukon magpabilin sa tagipusuon.”—Isaias 65:17.
Pamensara bala: Ang Manunuga naghimo sing kahimusan nga hatagan ka sing “maayo . . nga palaabuton kag paglaum”—isa ka malinong nga kabuhi sa idalom sang perpekto nga paggahom sang Dios. (Jeremias 29:11) Makabulig gid bala sa imo ini nga ihibalo para makapadayon ka? Si Sally, nga ginsambit sa umpisa nga artikulo, nagsiling, “Kon panumdumon mo ang tanan nga manami nga butang nga himuon sang Ginharian sang Dios para sa aton sa palaabuton, makabulig ini nga malipatan ang mga malain nga natabo sa aton kabuhi kag padayon nga makabatas subong.”
Ngaa indi mo tilawan nga tun-an pa gid ang parte sa himuon sa ulihi sang Ginharian sang Dios para sa mga tawo? Kon himuon mo ini, makabulig ini sa imo nga magpadayon bisan pa sa mga kalamidad nga ginaantos mo subong. Samtang ginahulat mo ang tion nga wala na sing kalamidad, ang Biblia makahatag sa imo sing praktikal nga bulig para mabatas mo ang epekto sang kalamidad. Binagbinaga ang pila ka halimbawa.