Pagtuon sa Ang Pinakabantog nga Tawo nga Nagkabuhi
1 Sa semana sang Pebrero 8-14, sugdan naton ang pagtuon sa Ang Pinakabantog nga Tawo nga Nagkabuhi sa aton Pagtinuon sa Libro sang Kongregasyon. Daw ano ka makalilipay nga repasuhon ang kabuhi kag ministeryo ni Jesucristo! Sanglit ang libro gindesinyo nga daw tuhay gikan sa iban nga mga libro nga natun-an na naton, ang pila ka panuytoy mabuligon.
2 Ang mga pahina sang libro wala sing numero, gani ang iskedyul nga ibalhag sa Ang Aton Ministeryo sa Ginharian sugod sa masunod nga bulan magalista sang mga kapitulo nga pagatun-an, sing masami tatlo ukon apat kada semana. Ang kapitulo 35, 111, kag 116 mas malaba kag pagatungaon sa duha ka pagtuon ang tagsa. Pagkatapos mapabasa sa isa ka sangkol nga utod nga lalaki ang bug-os nga kapitulo (ukon ang bug-os nga subtitulo, subong sang sa kapitulo 35, 111, kag 116), ang konduktor sa pagtinuon magapamangkot sang mga pamangkot sa katapusan sang kapitulo nga nagahisanto sa kapitulo ukon sa bahin nga bag-o lang mabasa. Ang mga sabat indi pirme pasunod sa kapitulo. Ang malip-ot kag direkta nga mga komento dapat ipasad sa materyal nga ginatun-an.
3 Pagkatapos sina, kon ginatugot sang tion, ang tanan nga kasulatan nga ginsitar sa katapusan sang kapitulo dapat basahon. Ang mas malaba nga mga kasulatan mahimo tungaon sa mas malip-ot nga mga bahin agod makapakigbahin ang lainlain nga mga manugbantala sa pagbasa, kag nian mahatag ang mga komento sa ginbasa. Ang nagakaigo nga mga pamangkot nga ginhanda sang konduktor magabulig sa pagtigayon sing makahulugan nga mga komento nga nagapakita kon paano ang mga kasulatan nga ginbasa may kahilabtanan sa ginapadaku sang libro. Ang tanan nga mga pamangkot kag mga komento dapat magbulig sa mga nagatambong sa paghugod sing igtalupangod kay Jesucristo, sa iya pagkabuhi, kag sa iya mga panudlo.
4 Ang Pinakabantog nga Tawo nga libro nagabinagbinag sang kabuhi ni Jesus sing pasunod. Ang paghanduraw sa mga hitabo kag ang pagkonsentrar sa hunahuna kon diin ini natabo makabulig sing daku sa pagtanda sini. Busa, pat-ura nga binagbinagon ang maduagon nga mga ilustrasyon kag ipakita pirme ang mapa sa pamuno sang libro, pagkatapos sang introduksion.
5 Ang introduksion sang libro pagabinagbinagon sa una nga semana. Pagkatapos mabasa ang tanan nga parapo sa ubos sang subtitulo, ang konduktor magapamangkot sing nagakaigo nga mga pamangkot nga ginhanda niya. Ining una nga pagbinagbinag magahanda sa tanan para sa pagtinuon nga magasunod sa masunod nga tuig. Ang kadakuon sang kadalag-an sa pagtuptop sang materyal magadepende sa kadakuon sang paghanda sang tanan nga nagatambong. Ang konduktor labi na nga dapat maghanda sing maayo kada semana agod buligan ang grupo nga makilala sing maayo ang pinakabantog nga tawo nga nagkabuhi, ang aton Ginuo kag Manluluwas, si Jesucristo.