Sin-o ang Nagahimo sang Kabubut-on ni Jehova Subong?
1. San-o tun-an ang Sin-o ang Nagahimo sang Kabubut-on ni Jehova Subong? kag ano ang mabenepisyo naton sa sini?
1 Sugod sa semana sang Oktubre 28, ang bag-ong brosyur nga Sin-o ang Nagahimo sang Kabubut-on ni Jehova Subong?, nga ginpagua sa “Bantayi ang Imo Tagipusuon!” Distrito nga Kombension, pagatun-an sa Pagtinuon sang Kongregasyon sa Biblia. Gindesinyo ini agod giyahan ang mga estudyante sa Biblia padulong sa organisasyon. Paagi sa pagbinagbinag sa sini nga publikasyon, maapresyar pa gid naton nga bahin kita sang organisasyon ni Jehova kag mangin pamilyar man kita sa sining mapuslanon nga galamiton sa ministeryo.—Sal. 48:13.
2. Paano tun-an ini nga brosyur sa kongregasyon?
2 Kon Paano Ini Tun-an: Bahinbahinon sang konduktor ang iya tion agod alalangay nga matuptupan ang tagsa ka leksion. Sugdan niya ang kada leksion paagi sa pagbasa sang tig-ulo. Dayon, pangabayon niya ang manugbasa nga basahon ang nagabukas nga parapo. Masunod, ipautwas sang konduktor sa tumalambong ang pamangkot nga ginhanda niya para sa nagabukas nga parapo. Dayon, isaisa nga basahon kag hinun-anunan ang mga seksion nga nagasugod sa madukot nga dinalan. Agdahon sang konduktor ang tumalambong nga komentuhan kon paano ginasabat sang seksion ang tig-ulo sang leksion. Ang brosyur may madamo man nga laragway nga mahimo komentuhan. Ang yabi nga mga teksto dapat basahon kon ginatugot sang tion. Antes magliton sa masunod nga leksion, gamiton sang konduktor ang mga pamangkot sa idalom nga bahin sang pahina bilang repaso. Kon may kahon nga “Ang Puede Mo Pa Himuon,” ipabasa niya ini, dayon pakomentuhon ang tumalambong kon paano ang estudyante sa Biblia makabenepisyo sa mga panugda. Kon may tion pa, mahimo gamiton sang konduktor ang tig-ulo sang mga leksion subong repaso nga mga pamangkot sa konklusion sang pagtinuon. Indi kinahanglan nga ilugon ini nga pamaagi sa pagdumala sing pagtuon sa Biblia sa puluy-an.
3. Paano kita makabenepisyo sing bug-os sa pagtuon sini nga brosyur?
3 Para makabenepisyo sing bug-os, maghanda sing maayo antes magtambong sa miting. Tinguhai nga magkomento. Sa tion sang paghinun-anon, pamensari kon paano ini makabulig sa imo estudyante sa Biblia. Kabay nga ang pagbinagbinag naton sa sining bag-o nga brosyur magasangkap sa aton sa pagbulig sa iban nga himuon ang kabubut-on sang Dios agod matigayon man nila ang paglaum nga mabuhi sing dayon.—1 Juan 2:17.