Mga Manugdala sing Kapawa sa Kasilingan
1 Pagkatapos makatambong sa distrito nga kombension sini nga tuig, labi pa gid kita nga alisto sa kinahanglanon nga mangin mga manugdala sing kapawa sa aton mga isigkatawo. (Mat. 5:14) Samtang ginadumdom naton ang tanan nga impormasyon nga ginhatag sa programa kag ginapanikasugan nga iaplikar ini sa aton adlaw-adlaw nga pagkabuhi, ginabuligan kita nga magsuod pa gid kay Jehova sa matuod nga pagsimba kag buligan ang iban pa nga makatuon nahanungod sa mga saad ni Jehova.
2 Ang aton mga kahigayunan sa pagdala sing kapawa nagdugang sang, sa katapusan sang Biernes sang aga nga sesyon, ginpaguwa ang bag-ong tract nga natig-uluhan Makalampuwas Bala Ining Kalibutan? Ang mga pasundayag sang Sabado sang aga nakabulig sa pagpakita kon paano mahimo gamiton ining tract. Kaupod sini, ginpahibalo nga matigayon man ang tatlo pa ka tract. Ini amo ang Paglipay Para sa Napung-awan, Magkalipay sa Pagkabuhi Subong Pamilya, kag Sin-o Gid ang Nagagahom sa Kalibutan? Ginpalig-on nga magdala kita sini agod magamit kon may kahigayunan.
3 Sa katapusan sang pamulongpulong nga “Kaluwasan sa Pagpahayag ni Jesucristo” sang Sabado sang hapon, isa ka matahom nga bag-ong brosyur nga natig-uluhan Nagaulikid Gid Bala ang Dios sa Aton? ang ginpaguwa. Ining may matahom sing mga laragway nga brosyur magasabat sang madamong pamangkot sang mga tawo, subong sang: Ngaa ginatugutan sang Dios ang pag-antos? Matapos gid bala ang pag-antos? Paano naton nahibaluan nga yari na kita sa katapusan nga mga adlaw? Paano naton matigayon ang kabuhi nga walay katapusan sa bag-ong kalibutan sang Dios? Ini nga brosyur isa ka maayong instrumento sa pagsugod sing bag-ong mga pagtuon.
4 Daku gid ang aton pagpasalamat sa buganang espirituwal nga pagkaon nga nabaton sa “Mga Manugdala sing Kapawa” nga Distrito nga Kombension! Kabay nga kita, subong mga manugdala sing espirituwal nga kapawa sang Dios, mamat-od nga iaplikar ang aton natun-an kag makugi nga gamiton ining matahom nga bag-ong mga release agod buligan ang mga tawo nga makilala kag maalagad si Jehova.