Ibantala ang Dalanon sang Dios Padulong sa Paghidait kag Kalig-unan
1 Ang mga tawo naghimo sing madamong panugda para sa paghidait kag kalig-unan, apang wala sing isa sini ang nagahatag sang mga kinahanglanon sang katawhan sa bug-os kalibutan. Bisan pa nga ang mga pagdumot sa relihion, rasa, kag pungsod daw amo ang daku nga sablag sa isa ka malig-on kag mahidaiton nga kalibutan, ang matuod nga mga Cristiano nakahibalo nga ang tunay nga mga sablag amo si Satanas nga Yawa kag ang indi pagpasakop sang tawo kay Jehova nga Dios.—Sal. 127:1; Jer. 8:9; 1 Juan 5:19.
2 Sa Abril, manikasog kita nga buligan nga mahangpan sang aton mga isigkatawo nga ang dalanon sang Dios padulong sa paghidait kag kalig-unan amo ang lamang nga paagi kag nga si Jehova amo ang may katapusan nga solusyon sa tanan nga mga problema sang katawhan.
3 Gamita ang Bag-ong mga Tract: Mapaambit naton ining makapalig-on nga mensahe paagi sa paggamit sa bag-ong mga tract nga ginpakilala sa aton “Mga Manugdala sing Kapawa” nga Distrito nga Kombension. Ginpakita sang isa ka simple nga pasundayag kon paano gamiton ang Tract Num. 19, Ini Bala nga Kalibutan Makalampuwas?, sa pagsugod sing isa ka paghambalanay kag nagadul-ong sa pagtuon sa Biblia. Ang talalupangdon nga katumanan sang tagna ni Jesus nahanungod sa katapusan sining kalibutan dapat magganyat sa igtalupangod sang madamo.
4 Minilyon nga tawo karon ang napung-awan, kag nahidlaw sila sa tion sang pag-ayo kag sang matuod nga paghidait kag kalig-unan. Ang Paglipay Para sa Napung-awan (Tract Num. 20) mahimo nga makahatag sing pagpalig-on sa madamo.
5 Ang Tract Num. 21, Magkalipay sa Pagkabuhi Subong Pamilya, nagahatag sing praktikal nga laygay kon ano ang himuon agod mapauswag ang pagkabuhi sang pamilya bisan sa karon samtang nagahulat sing isa ka makalilipay nga palaabuton sa bag-ong kalibutan sang Dios.
6 Ang Tract Num. 22 nagasabat sing prangka sang pamangkot nga Sin-o Gid ang Nagagahom sa Kalibutan? Nagapaathag ini kon ngaa gingamit sang mga tawo ang pinakamapintas nga paagi sa pagpaantos kag pagpatay sa isa kag isa walay sapayan sang handum sang kalabanan nga mga tawo para sa mahidaiton kag malig-on nga kabuhi. May malauton nga espirituhanon nga mga puwersa sa langitnon nga mga duog, kag ang pinakamalimbungon nga daya ni Satanas amo ang pagsulay sa madamo sa pagpati nga sia kag ang iya mga demonyo wala gid nagaluntad.
7 Magsugod sing mga Pagtuon sa Biblia: Ang isa ka pagtuon sa Biblia mahimo sugdan paagi sa tract, brosyur, magasin, ukon libro. Kon ang tagbalay may yara na sang isa sang aton mga publikasyon, ipasundayag kon paano ini magamit sa pagtuon sa Biblia. Ang bag-ong mga tract kag ang bag-ong brosyur nga Nagaulikid Gid Bala ang Dios sa Aton? maayo nga mga instrumento nga gamiton sa pagsugod sing mga pagtuon sa Biblia.
8 Ang matuod nga kalig-unan nagahalin lamang sa Manunuga, si Jehova nga Dios. Kabay nga gamiton naton sing maayo ang aton mga bulig sa pagtudlo sa pagbantala sang dalanon sang Dios padulong sa paghidait kag kalig-unan.—Isa. 2:3, 4.