Maalagad Mo Bala si Jehova Subong Isa ka Payunir?

¹ Sa isa sa “Mga Manugdala sing Kapawa” nga Distrito nga mga Kombension, ang humalambal namangkot: “Makapayunir ka bala? Magapayunir ka bala?” Nagsiling sia nga nagakaigo gid ining mga pamangkot bangod tuman na kalapit ang Armagedon, kag nagahimo ini sang pagbantala nga hilikuton nga kapin kadagmit sangsa nagligad.​—1 Cor. 7:29a.

² Indi maduhaduhaan nga ang pagpayunir isa ka lakas nga pagpangabudlay. Nagakinahanglan ini sing disiplina sa kaugalingon kag maayo nga organisasyon. Apang, ang aton pagpangabudlay sa ministeryo “indi walay pulos.” (1 Cor. 15:58) Masiling man bala ini sa iban nga mga hilikuton nga nagaubos sang aton tion kag enerhiya? Ang gugma kay Jehova nagatiklod sa mga Cristiano nga mangin makugi sa iya pag-alagad, kag nagdul-ong ini sa madamo nga magpayunir.​—1 Juan 5:3; Bug. 4:11.

³ Madamong lamharon nga mga alagad ni Jehova nga manugtapos pa lang sa hayskul ang nagahunahuna sing serioso nahanungod sa pagpayunir. Nagakaigo gid ina. Ano ang iban pa nga karera nga kapin ka importante sangsa bug-os tion nga ministeryo?​—Mat. 6:33; 24:14.

⁴ Ginapalig-on bala ninyo nga mga ginikanan sa inyo kabataan ang bug-os tion nga pag-alagad? Nahangpan gid bala sing maathag sang inyo kabataan nga luyag ninyo nga gamiton nila ang ila bug-os nga tagipusuon, kalag, hunahuna, kag kusog sa sining mapuslanon nga hilikuton? (Mar. 12:30) Madamong lamharon nga mga manugbantala ang nagahanda sang ila kaugalingon para sa regular payunir nga hilikuton paagi sa pag-auxiliary payunir sa tanan nga kahigayunan samtang sila nagaeskwela pa. Pat-od gid nga ina nga debosyon kay Jehova nagapahalipay sang iya tagipusuon!​—Hulu. 27:11.

⁵ Matuod, indi tanan may mga sirkunstansia nga nagatugot sa ila sa pagpayunir. Apang, minyo man ukon indi, bata man ukon tigulang sa edad, nabinagbinag mo na bala sing mapangamuyuon ang pag-alagad kay Jehova subong payunir? (Col. 3:23) Madamong lamharon nga mag-asawa ang nagapanikasog nga pasangkaron ang ila ministeryo agod ang isa ukon duha sa ila makapayunir.

⁶ Kon indi ka makaregular payunir sa karon, makaauxiliary payunir ka bala? Mahimo gid nga madamo nga manugbantala sa inyo kongregasyon ang nagaplano nga magpayunir sa Abril kag Mayo. Makabuylog ka bala sa ila? Bisan pa nga ang tanan nga matutom nga mga alagad ni Jehova nagabaton sing madamong pagpakamaayo, dugang pa nga mga pagpakamaayo ang nagahulat sa mga nagahinguyang sing madamo pa nga tion sa pag-alagad sa Ginharian sa pagpangita sa mga katulad-karnero.​—Binu. 20:35.