Mga Tulumanon Para sa Bag-o kag Eksperiensiado nga Ministro
1 Ang salmista namangkot: “O Jehova, sin-o bala ang magadayon sa imo kayangkayang? Sin-o bala ang magapuyo sa imo balaan nga bukid?” Si David nagsabat: “Sia nga nagagawi sing matarong kag nagahikot sing pagkamatarong kag nagapamulong sing kamatuoran.” (Sal. 15:1, 2) Yadtong mga tulumanon wala magbalhin. Ang tanan karon nga nagakari sa pagsimba sa Cristianong kongregasyon dapat magbiya sang imoral nga mga buhat kag mga pagpahubog. Sa tunga sang katawhan ni Jehova wala sing duog para sa mga tawo nga maawayon, maakigon, ukon madayaon. Bag-o ukon eksperiensiado man nga mga ministro, dapat naton huptan sing matutom ang mataas nga mga talaksan nga nabalay sa Pulong sang Dios.—Gal. 5:19-21.
2 Madamong mga bag-uhan ang nagapakig-upod sa organisasyon ni Jehova. Ginbag-o nila ang ila panghunahuna agod ipahisanto ang ila pagkabuhi sa mga tulumanon gikan sa Dios. Isa ka bata nga lalaki sa South America ang nagdaku nga wala sing panuytoy sang mga ginikanan kag may malubha sia nga mga problema sa personalidad. Sang 18 anyos sia, nagiyan sia sa mga droga kag nakaagi na bilanggo bangod sang pagpangawat agod masupurtahan ang bisyo nga pagdroga. Paagi sa pagtuon sa Biblia, gin-untat niya ang pagpakig-upod sa iya anay mga kaupdanan, nakakita sing bag-ong mga abyan sa tunga sang mga Saksi ni Jehova, kag sang ulihi gindedikar ang iya kabuhi sa Dios.
3 Sa kaanggid, dapat kita mangin determinado nga pahamut-an ang Dios sa aton tanan nga paggawi, “sa matuod nga pagkamatarong kag pagkamaunungon.” (Efe. 4:24) Obligasyon naton nga ‘ubahon ang daan nga personalidad upod ang mga buhat sini’ kag ‘isul-ob [sa aton kaugalingon] ang bag-ong personalidad, nga ginapabag-o paagi sa sibu nga ihibalo’ agod makapabilin kita sa kaangay sang bukid nga organisasyon sang Dios.—Col. 3:9, 10.
4 Pulong sang Dios, Isa ka Makusog nga Impluwensia: Ang personalidad ni Jehova subong sang ginpakita sa aton paagi sa Biblia mahimo nga makaapektar sing daku sa aton panghunahuna kag sa aton mga buhat sa positibo nga paagi. (Roma 12:2) Ang iya Pulong may gahom sa pagbag-o sa mga hunahuna kag sa pag-usisa sa mga tagipusuon. (Heb. 4:12) Ang Biblia nagatudlo sa aton nga ang kabubut-on ni Jehova nagakinahanglan nga magkabuhi kita nga matadlong sa moral, makigbahin sing bug-os sa publiko nga ministeryo, kag indi magpatumbaya sang Cristianong mga miting.
5 Sa sining ital-ital nga mga tion ang dugang nga mga pag-ipit nagahaylo sa Cristiano nga lapason ang mga sugo sang Dios. Kon ang personal nga pagtuon, pamilya nga pagtuon, mga miting sa kongregasyon, ukon ang ministeryo ginapatumbayaan, bisan ang anay malig-on nga Cristiano mahimo madaldal palayo sa pagtuo, ayhan mahulog sa sayop nga paggawi. Amo ina kon ngaa ginsulatan ni Pablo si Timoteo: “Andami pirme ang imo kaugalingon kag ang imo pagpanudlo” kag, “Panumduma pirme ang akon ginapamulong.”—1 Tim. 4:16; 2 Tim. 2:7.
6 Dapat naton tanan huptan nga maathag ang mga tulumanon gikan sa Dios, mangin timbang sing bug-os sa ministeryo, kag huptan ang aton paglaum nga mabakod agod maamligan ang aton kabuhi. (1 Ped. 1:13-16) Ang adlaw-adlaw nga pagtuman sa matarong nga mga tulumanon gikan sa Dios kinahanglanon gid.
7 Mangin determinado nga magtubo sa pagtuo kag mag-uswag sa pagkamapatubason sa ministeryo sa latagon. (Roma 1:12) Hupti ang imo panghunahuna sa husto nga mga butang paagi sa pagkatayuyon sa personal nga pagtuon, pamilya nga pagtuon, kag pagtambong sa mga miting. (Filip. 4:8) Ang imo mga panikasog nga pahamut-an ang Dios paagi sa pagtuman sang iya mga tulumanon indi magaligad nga dimatalupangdan.—Col. 3:23, 24.