Nagapangatarungan Ka Bala Gikan sa Kasulatan?
1 Ang isa ka eksperiensiado nga soldado nga magakadto sa inaway bug-os nga armado. Ang lantip nga manugpangabudlay nga nagahanda para sa isa ka proyekto sa pagtukod magadala sing mga kagamitan nga ginakinahanglan niya sa pagtapos sa hilikuton. Ang alagad ni Jehova nga nagapakigbahin sa ministeryo sa latagon magauyat sang iya “espada” kag magagamit sini sing malantipon. (Efe. 6:17) Personal bala nga matuod ini sa imo? Ginatugutan mo bala ang Pulong sang Dios sa paghambal agod matandog sang balaan nga espiritu ang tagipusuon sang imo mga tagpalamati?—Hulu. 8:1, 6.
2 Ang pagbantala indi pirme mahapos. Ang mga masugilanon naton masunson nga masako, nagahatag sing diutay nga kahigayunan para sa mga paghinun-anon sa Biblia. Sanglit ang Biblia amo ang aton pangunang libro nga ginatun-an, paano naton ini magamit sing labi sa pag-alagad?
3 Sa Tanan nga Kahigayunan: Sa tagsa ka ganhaan, luyag naton gamiton ang Biblia sa pagpahulag sa tagbalay. Dapat kita mangin handa nga himuon ini bisan ano man nga publikasyon ang ginatanyag. Kon ang tawo masako kag wala sing tion sa pagbukas sing Biblia, mahimo mo bala mabalikwat ang isa ka kasulatan antes itanyag ang literatura? Ina lamang mahimo nga magapadulog sa iya kag magapamati.—Heb. 4:12.
4 Halimbawa, kon ginagamit mo ang Disiembre 8, 1993 nga Awake! tuhoy sa “A World Without Disease,” sa tapos mapakita ang laragway sa panghapin, magbangon sing pamangkot, “Nagapati ka bala nga madula gid ang balatian, nga ang tanan magaagom sing maayong panglawas?” Ano man ang sabat, mahimo mo mabasa ukon maparaprase ang isa ka kasulatan, subong sang Isaias 33:24 ukon Bugna 21:4. Sa sining paagi ginatugutan mo ang Pulong sang Dios nga amo ang magahambal.
5 Sa mga Pagduaw Liwat: Dapat kita maghanda antes magduaw liwat. Apang, sa masami, ang mga tema nga wala naton mahandai nagautwas. Diri sini nga ang Reasoning From the Scriptures mahimo mangin hamili nga gamit. Ang pagbalikwat ukon pagbasa naton sing mga kasulatan gikan sa Reasoning nga libro magabulig sa mga tawo sa paghangop nga kita mga ministro sang Dios kag indi mga manuglibod sang Pulong.—2 Cor. 2:17.
6 Kon nagaduaw liwat diin wala sing espesipiko nga tema ang ginhambalan, mahimo mo mabuksan ang Reasoning nga libro sa isa ka nagakaigo nga tema, subong sang “Jesus Christ,” “Last Days,” ukon “Resurrection,” kag magamit ang isa sang mga subtitulo sa pagsugod sing paghambalanay. Ang mga tagbalay mahimo agdahon sa pagbasa sang pila ka kasulatan gikan sa ila mismo Biblia. Sa sinang paagi ang Biblia mangin buhi sa ila, kag ang balaan nga espiritu ni Jehova magailig kon sila matarong sing panimuot.
7 Ang aton salabton nga ibantala ang maayong balita kag paandaman ang mga malauton isa ka butang nga serioso. Mensahe ini ni Jehova, indi aton. Tuguti ang iya Pulong, ang espada sang espiritu, sa pagbulig sa imo.