Buligi ang mga Estudyante sang Biblia sa Paghanda Para sa Ila Pagtuon
1 Ang mga estudyante sang Biblia nga nagahanda para sa ila pagtuon kada semana masami nga mas madasig ang pag-uswag sangsa mga wala nagahanda. Kon kaisa ang estudyante mahimo nga wala nagahanda bangod indi sia makahibalo kon paano maghanda. Ayhan kinahanglan nga tudluan sia kon paano maghanda. Paano ini himuon?
2 Sugod gid sa umpisa, maghinguyang sing pila ka tion agod pat-uron nga nahangpan sang estudyante nga ang paghanda nagakinahanglan sing personal nga pagtuon. Madamo nga tawo ang wala matudluan kon paano magtuon. Ang pahina 33-43 sang Theocratic Ministry School Guidebook nagahatag sing mabuligon nga mga panugda nga mahimo mo mapaalinton sa estudyante kon kinahanglanon.
3 Ipakita sa Estudyante ang Kabilihanan sang Pagtuon: Ipakita sa estudyante ang imo libro kag kon paano mo ginkuritan ang pangunang mga tinaga. Ipakita sa iya kon paano ining namarkahan nga mga punto mahimo nga magapahanumdom sa iya sang mga punto nga sarang niya mapabutyag sa iya kaugalingon nga mga tinaga. Busa indi sia masulay sa pagbasa gikan sa libro kon nagasabat. Ang nagakaigo nga paghanas magabulig sa iya sa paghatag sing maayong mga komento sa ulihi sa mga miting. Ang iya mga komento magapabanaag sing apresasyon para sa materyal kag magapakita sang kadalom sang iya paghangop.
4 Tudlui Sia sa Paggamit sang Biblia: Dapat matun-an sang estudyante ang pagpangita sang mga kasulatan sa materyal nga ginatun-an. Kon mahimo niya ini sing maayo, maapresyar niya sing labi pa nga sia isa gid ka estudyante sang Biblia. Bisan pa nga sa primero ayhan kinahanglan niya gamiton ang listahan sang mga tulun-an sang Biblia sa nahaunang bahin sang Biblia, ang estudyante dapat palig-unon nga hibaluon ang pagkasunodsunod sang 66 ka tulun-an sang Biblia. Kon nagabasa sing isa ka teksto sang kasulatan, buligi sia sa pagkilala sa bahin nga nagasakdag sa punto nga ginapakita sa parapo kag indi matublag sang mga bahin nga wala sing direkta nga labot sa ginatun-an.
5 Samtang nagauswag ang estudyante, palig-una sia nga basahon ang Biblia halin sa pamuno tubtob sa katapusan. Ipadaku nga ang bug-os nga Biblia amo ang inspirado nga Pulong sang Dios kag nga ang matuod nga mga Cristiano dapat sakdagon sini sa espirituwal.—Mat. 4:4; 2 Tim. 3:16, 17.
6 Ipakilala ang Iban Pa nga Teokratikong mga Reperensya: Kon ang estudyante nag-uswag sing nagakaigo, sarang niya masugdan nga gamiton ang iban pa nga teokratikong mga reperensya. Palig-una sia sa pagkuha sing dugang pa nga impormasyon sa mga publikasyon sang Sosiedad nga mahibaluan niya samtang nagatambong sia sa mga miting sa kongregasyon. Tudlui sia kon paano gamiton ang pinasahi nga mga bahin sang New World Translation, subong sang “Bible Words Indexed.” Samtang nagahimo sia sang iya kaugalingon nga teokratikong librarya, ipakita sa iya kon paano gamiton ang Comprehensive Concordance, Reasoning From the Scriptures, ang Index, kag ang mga tomo sang Insight.
7 Kon ginatudluan naton ang mga estudyante sang Biblia kon paano maghanda para sa ila pagtuon sa Biblia, ginasangkapan naton sila nga magpadayon sa pag-uswag sa kamatuoran bisan nga natapos na ang ila personal nga pagtuon sang Biblia sa puluy-an.