Pagtambong sa mga Miting—Isa ka Serioso nga Responsabilidad
1 Daw ano mo ka serioso ginatamod ang pagtambong sa mga miting? Ginatugutan bala sang iban sa aton ang sekular nga palamugnan, kakapoy, homework, malain nga pamatyag, ukon indi tanto kalain nga paniempo nga mag-upang sa aton obligasyon nga magtambong sa mga miting sing tayuyon?—Deut. 31:12.
2 Ang pila sa aton mga kauturan nagalakat sing inoras kag nagatabok sa makatalagam nga mga suba agod makatambong sa mga miting. Sa inyo kongregasyon, ayhan may yara matutom nga mga kauturan nga “wala gid nagapalya” walay sapayan sang balatian, pisikal nga mga sablag, ukon mabudlay nga mga asaynment sa trabaho ukon sa eskwelahan. (Luc. 2:37) Ngaa nagapanikasog sila nga makatambong? Bangod nahibaluan nila nga indi nila masarangan ang mga pag-ipit sa kalibutan sa ila kaugalingon nga kusog. Kinahanglan nila ang kusog nga ginahatag sang Dios.—2 Cor. 12:9, 10.
3 Daw ano ka serioso nga ginatamod sang imo pamilya ang pagtambong sa mga miting? Subong bala ini ka importante sa pagkaon ukon sekular nga palamugnan para sa imo? Sa mga gab-i nga may mga miting, nagapakigbais ka pa bala sa imo kaugalingon kon bala matambong ka ukon indi, ukon ang tayuyon nga pagpakig-upod sa imo mga kauturan butang bala nga obligado sa inyo panimalay?
4 Subong isa ka pamilya, ngaa indi binagbinagon sing mapinangamuyuon ang inyo pagtambong sa mga miting? Nian maghimo sing kinahanglanon nga mga pagbalhin sa inyo iskedyul. Ang tayuyon nga pagtambong sa mga miting isa ka kinahanglanon nga bahin sang aton teokratikong pagtuon kag dapat gid kabigon sing tuman ka serioso.