Dayawa Ninyo ang Panganay ni Jehova!
1 Sang Domingo, Nisan 9, 33 C.E., gindayaw sang isa ka dakung kadam-an nga may mga paklang sa ila mga kamot ang panganay nga Anak ni Jehova, subong ang “Isa nga nagakari subong Hari sa ngalan ni Jehova!” (Luc. 19:38; Heb. 1:6) Sang Lunes kag Martes, Nisan 10 kag 11, masako gid katama si Jesus sa iya publiko nga ministeryo, naghimo sadtong ulihi nga mga adlaw nga amo ang pinakamasako nga bahin sang iya dutan-on nga pagkabuhi.
2 Karon, isa ka daku pa nga kadam-an nga may malaragwayon nga mga paklang ang nagasinggit: “Ang kaluwasan iya sang aton Dios, nga nagalingkod sa trono, kag sang Kordero.” (Bug. 7:9, 10) Sa Marso 26, magatipon kita agod saulugon ang Memoryal sang kamatayon ni Cristo. Samtang nagahinampot ina nga petsa, mahimo bala naton madugangan ang aton mga panikasog sa ministeryo kag sa amo nagabuylog sa sining tugob-globo nga singgit sang pagdayaw?
3 Pauswaga ang Hilikuton sa Latagon: Madamong manugbantala ang nagpalista na subong mga auxiliary payunir sa Marso. Luyag mo bala sila buylugan? Kon amo, ihatag sa gilayon ang imo aplikasyon.
4 Makaauxiliary payunir ka man ukon indi, ayhan luyag mo makigbahin sing lubos sa ministeryo sa Marso. Ayhan ang kongregasyon magahimos sing grupo nga pagpanaksi kada adlaw sa sina nga bulan.
5 Ang tanan nga kongregasyon dapat maghimos sing pinasahi nga miting antes magguwa sa latagon sa Sabado, Marso 26. Bisan pa nga madamo sing hilimuon sa paghanda para sa Memoryal, ginapanugda nga ang tanan mahimo nga makigbahin sa ministeryo sa latagon sa Sabado sang aga. Dugang sa pamalaybalay nga hilikuton, pat-ura ninyo nga ang mga gin-agda ninyo sa Memoryal may yara transportasyon kag nga nahibaluan nila ang oras kag duog sang miting.
6 Agdaha kag Palig-una ang Iban: Si Jesus nagsugo sa iya mga sumulunod: “Padayon nga himua ini sa handumanan nakon.” (1 Cor. 11:24) Samtang ginatuman sang hinaplas nga mga sumulunod sang tikang ni Jesus ina nga sugo, ang tagsa ka alagad ni Jehova ginaagda sa pagtambong kag sa pagsaulog sang Memoryal. Lakip sa iban pa, dapat ninyo agdahon ang mga estudyante sa Biblia, mga kaparyentehan, ditumuluo nga mga tiayon, kag mga kaupdanan sa trabaho. Maghimo sing listahan agod wala sing isa nga malipatan.
7 May yara dugang pa nga mga kahigayunan nga mapalig-on ang mga interesado sa Memoryal mismo. Pat-ura nga mag-abot sing temprano agod matamyaw ninyo ang mga bag-uhan nga magatambong sa nahauna nga tion. Kon ang pila sang imo mga estudyante sang Biblia magatambong, ayhan praktikal nga may isa ka manugbantala nga magalingkod upod sa ila sa tion sang miting. Agdaha ang mga bag-uhan sa pagbalik sa Domingo, Marso 27, para sa regular nga Miting Publiko sang kongregasyon.
8 Pagkatapos sang pagsaulog sang Memoryal, samtang ginabuylog naton ang aton mga tingog sa pag-amba sang ambahanon 105, “Hail Jehovah’s Firstborn!,” kabay nga mabalikid naton nga may kaayawan ang isa ka makugi nga bulan sang teokratikong hilikuton sa kadayawan ni Jehova!