Makaauxiliary Payunir Ka Bala?
1. Ngaa ang panahon sang Memoryal isa ka maayo nga tion para mapasangkad ang aton ministeryo?
1 Ang panahon sang Memoryal isa ka maayo nga tion para mapasangkad ang aton ministeryo. Amo ini ang tion nga mapamalandungan naton ang daku nga gugma ni Jehova sa paghatag sang iya Anak bilang gawad. (Juan 3:16) Nagapasalamat kita sa ginhimo ni Jehova para sa aton, gani napahulag pa gid kita nga ipakilala sia kag isugid ang iya ginahimo para sa katawhan. (Isa. 12:4, 5; Luc. 6:45) Amo man ini ang tion nga ginaimbitar naton ang aton mga kilala kag mga tawo sa teritoryo nga magtambong sa Memoryal. Dayon, ginapalambo naton ang interes sang mga nagtambong. Mapasangkad mo bala ang imo ministeryo paagi sa pag-auxiliary payunir sa Marso, Abril, ukon Mayo?
2. Ngaa maayo gid mag-auxiliary payunir sa bulan sang Marso?
2 Himua nga Pinasahi nga Bulan ang Marso: Maayo gid mag-auxiliary payunir sa Marso bangod makapili ka sang lalab-uton nga oras, ayhan 30 ukon 50. Kon matuon sa Marso ang pagduaw sang manugtatap sang sirkito, makatambong ang mga auxiliary payunir sa bug-os nga miting para sa mga regular kag espesyal payunir. Ang Memoryal pagahiwaton sa Martes, Marso 26, 2013. Ang pagpanagtag sang imbitasyon magasugod sa Marso 1, mas malawig ini kon ikumparar sang nagliligad nga tinuig. Dugang pa, ang Marso may lima ka Sabado kag Domingo. Gani, binagbinaga sing maayo kon paano mo mahimo ang Marso nga pinasahi nga bulan sang tuig.
3. Ano nga mga pagbag-o ang imo himuon para madugangan ang imo tion sa ministeryo?
3 Magplano Subong: Maayo nga binagbinagon mo subong ang imo iskedyul agod mahibaluan kon ano nga mga pagbag-o ang imo himuon para makapayunir. Kinahanglan gid ang kooperasyon sang pamilya, gani sa tion sang inyo Pangpamilya nga Pagsimba binagbinaga sing maayo ang inyo mga tulumuron kag maghimo sing iskedyul. (Hulu. 15:22) Kon indi ka makaauxiliary payunir, indi lang magkabalaka. Ma-adjust mo bala ang imo iskedyul para madugangan ang imo tion sa ministeryo? Mahimo ka bala maggua sa iban pa nga adlaw?
4. Ano ang mga pagpakamaayo kon dugangan naton ang aton tion sa ministeryo sa Marso, Abril, kag Mayo?
4 Kon dugangan naton ang aton tion sa ministeryo sa Marso, Abril, kag Mayo, madugangan man ang aton kalipay sa pag-alagad kay Jehova kag pagbulig sa iban. (Juan 4:34; Binu. 20:35) Labaw sa tanan, ang aton pagsakripisyo magapahalipay kay Jehova.—Hulu. 27:11.