Lig-una ang Dayag nga Pagpahayag sang Inyo Pagtuo nga Indi Mationg
1 Ang Pagtinuon sa Lalantawan amo ang pangunang paagi nga ang espirituwal nga “pagkaon sa nagakaigo nga tion” ginaaman sa katawhan sang Dios karon. (Mat. 24:45) Nagatambong kita sa duha ka pangunang tulumuron: Agod mapalig-on sa espirituwal, kag agod mapahayag sing dayag ang aton paglaum sa iban.—Heb. 10:23-25.
2 Pagpanginpulos Naton: Ginabulubanta nga un tersia lamang sang nagatambong sa kalabanan nga mga kongregasyon ang nagatuon sing abanse. Mga amo man nga kadamuon ang nagapakigbahin sa pagkomento. Ang matig-a nga espirituwal nga pagkaon sa Pagtinuon sa Lalantawan indi mahangpan sing bug-os sa tion mismo sang miting. Dapat kamo magpain sing tion nga tun-an sing abanse ang materyal.
3 Kon nagahanda para sa pagtinuon, maayo nga basahon anay ang mga pamangkot sa kahon sa katapusan sang artikulo. Masentro sini ang inyo igtalupangod sa pangunang mga punto nga pagabinagbinagon sa leksion.
4 Sa tion sang pagtinuon pamatii sing maayo kon ano ang ginasiling. Talupangda ang nagabukas nga mga komento sang konduktor. Ayhan magabangon sia sing tatlo ukon apat ka pamangkot nga pagasabton, ukon ayhan repasuhon niya ang talalupangdon nga mga punto gikan sa pagtinuon sang nagligad nga semana. Kon may pila ka pagbalhin sa aton paghangop sa isa ka tagna sang Biblia ukon Makasulatanhon nga prinsipio, pagasambiton niya ini. Sa pagkamatuod, ang mga komento sang konduktor dapat mangin malip-ot, kay ang isa ka katuyuan sang pagtuon amo ang paghatag sa kongregasyon sing kahigayunan nga mapabutyag ang ila paglaum.
5 Ipahayag ang Inyo Paglaum: Regular bala kamo nga nagakomento sa pagtuon? Ginapakamaayo ang malip-ot kag direkta sa punto nga mga komento. (Ipaanggid ang Lucas 21:1-4.) Ang simple nga komento gikan sa tagipusuon ginapasalamatan sang tanan. Sa kinaandan ang nahauna nga komento sa pamangkot dapat mangin malip-ot kag direkta. Nagahatag ini sa iban sing kahigayunan nga masambit ang isa ka kasulatan ukon mapatalupangod ang isa ka detalye sa parapo. Sa sining paagi madamo ang makapahayag sing dayag sang ila paglaum. Ang mga komento dapat pirme mangin positibo kag makapalig-on.
6 Kon bag-o ka pa lang nagatambong ukon kon ginakulbaan ka sa pagkomento, ayhan mahimo ka makapangayo sing bulig sa konduktor. Pangabaya sia nga tuksuon ikaw kon ginabinagbinag ang isa ka parapo. Ayhan makaboluntaryo ka sa pagbasa sing kasulatan kag sa pag-aplikar sang kahulugan sini. Maghimo sing pila ka nota sa marhin sa pagbulig sa imo nga madumduman ang luyag mo isiling. Kon isa ikaw ka bata, dumduma nga ang imo mga komento ginaapresyar.—Mat. 21:16.
7 Importante nga ipabutyag naton ang aton pagtuo, kag ang Pagtinuon sa Lalantawan nagahatag sing maayo nga kahigayunan nga mahimo ini. Ginapabutyag ini sang libro nga Qualified to Be Ministers sa sining paagi: “Ano man ang problema, landasa ini kag tinguhai nga makahatag ka sing dimagkubos isa ka sabat. Makaamot ka sa miting, kag mangin mas maayo ang pamatyag mo bangod sini.” (Pahina 99) Gani ngaa indi planuhon nga maghatag sing dimagkubos isa ka komento sa masunod nga Pagtinuon sa Lalantawan?—Hulu. 15:23.