Pabatyaga Sila nga Ginaabiabi sa Memoryal
1 Sang nagligad nga pila ka tuig, 1 lamang sa 3 ka tawo nga nagtambong sa Memoryal ang manugbantala sang maayong balita. Mahimo nga amo man sini nga tuig. Ayhan magatambong ang iban bangod sang pangagda sang isa ka paryente ukon abyan, samtang ang iban mahimo nga gin-agda sang lokal nga mga manugbantala. Ang iban pa nga magatambong, bisan bawtismado, indi na aktibo sa ministeryo. Hanuot naton nga ginaabiabi ang tanan nga nagapakita sing pagtahod sa sugo ni Jesus: “Padayon nga himua ini sa handumanan nakon.”—1 Cor. 11:24; Roma 15:7.
2 Ang gintangdo nga mga attendant dapat mangin alisto sa pag-abiabi sa tanan pag-abot nila sa Kingdom Hall. Apang, mahimo naton tanan masunod ang dalanon sang pagkamaabiabihon sa Memoryal. (Roma 12:13) Paano naton ini himuon?
3 Sa sina nga gab-i ang iban nga mga manugbantala mangin masako sa pag-aman sing transportasyon para sa mga interesado. Ang iban mahimo nga magaabot sing temprano agod maabiabi nila ang mga bisita nga magakari nga wala sing kaupod. Kon ang isa ka estranghero magasulod sa tilipunan, tamyawa sia sing mapagsik. Pamangkuta sia kon may kilala sia nga utod. Kon may yara, atipana sia tubtob mag-abot ang iya kakilala. (Ipaanggid ang Lucas 10:35.) Kon wala sia sing kilala, ngaa indi sia pag-agdahon nga maglingkod sa tupad mo? Ipaathag kon ngaa pagagamiton ang alak kag ang tinapay. Ayhan nagakinahanglan sia sing bulig sa pagpangita sang mga Kasulatan nga ginbalikwat sang humalambal.
4 Pagkatapos sang pagsaulog sang Memoryal, sugiri sia nga nalipay ka nga nagkari sia. Ayhan may mga pamangkot sia nahanungod sa aton hilikuton nga sarang mo masabat. Ang imo personal nga interes mahimo nga magadul-ong sa isa ka paghinun-anon sa pila ka topiko sa Biblia. Antes sia maghalin sa Kingdom Hall, ipakilala sia sa iban, kag agdaha sia nga magbalik.
5 Daw ano gid ang aton kalipay sa pag-abiabi sa aton hinigugma nga mga kauturan nga wala nagatambong sing regular ukon nangin indi aktibo sa ministeryo sa malawig nga tion! Sa baylo nga pamangkuton sila kon ngaa wala sila nakatambong sa mga miting, ipabutyag lamang ang imo kalipay nga nakatambong sila. Ayhan may mabatian sila sa diskurso sa Memoryal nga magapahulag sa ila nga binagbinagon liwat ang ila dedikado nga kaangtanan kay Jehova. Ang mainit nga pag-abiabi kag kabalaka nga aton ginapakita mahimo nga magatandog sang ila tagipusuon. Sugiri sila nga ginalauman mo nga makita sila liwat.—Roma 1:11, 12.
6 Ang isa ka pinasahi nga pamulongpulong publiko pagaihatag sa Abril 10 nga natig-uluhan “Ang Matuod nga Relihion Nagapaayaw sa mga Kinahanglanon sang Tawhanon nga Katilingban.” Pat-ura nga agdahon ang tanan nga nagatambong sa Memoryal. Ginalauman namon nga yadtong nagatambong sa sining pinasahi nga mga miting magabatyag nga ginaabiabi kag makita ang mainit nga espiritu sang paghiliupod sa tunga sang katawhan ni Jehova.—Sal. 133:1.