Itanyag ang Labing Maayo nga mga Magasin sa Kalibutan
1 Ang ginhatag nga katuyuan sang Ang Lalantawan amo ang “pagbayaw kay Jehova nga Dios subong ang Soberanong Ginuo sang uniberso.” Ang Magmata! amo ang “para sa kasanagan sang bug-os nga pamilya. . . . Ini nga magasin nagapalig-on sing pagsalig sa saad sang Manunuga tuhoy sa isa ka malinong kag may kalig-unan nga bag-ong kalibutan.”
2 Gamiton naton ining mga magasin sa aton ministeryo sa Abril kag Mayo. Agod mangin epektibo, dapat naton basahon ang tagsa ka guwa, nagatalupangod sang mga punto nga sarang naton magamit kon ginatanyag ini. Tinguhai nga maghunahuna sing butang nga mahimo mo masiling nga magatandog sa tagipusuon sang tawo kag magapahulag sa ila sa pagtuon sing dugang.
3 Pagpatalupangod sa Abril 1 nga Guwa: Ang kalabanan nga mga tawo nahidlaw sa isa ka mas maayo nga kalibutan, isa nga wala sang madamong mga problema nga nagakuha karon sa ila sang ila kalipay.
Sa tapos mapakilala ang aton kaugalingon, mahimo kita makasiling:
◼ “Luyag ko ipakita sa imo ang isa ka komento sa sining artikulo nga ‘Isa ka Mas Maayo nga Kalibutan—Damgo Lamang Bala?’ Ini nagasiling: ‘Ining kalibutan, ang aton kalibutan, indi isa ka modelo nga duog. . . . Daw walay katapusan ang listahan sang mga kailo karon.’ Apang, ipakita ko sa imo ang ginasiling sang Salmo 37:11 nahanungod sa palaabuton.” Kon ang tagbalay nagapamati, magliton sa artikulo nga “Isa ka Mas Maayo nga Kalibutan—Malapit Na!,” pahina 4, kag magsiling: “Pila ka mga teksto sa kasulatan ang ginsitar, lakip ang isa nga bag-o lang naton mabasa sa Salmo 37:11. Nagapati ako nga malipay ka sa pagbasa sini nga mga artikulo. Nalipay ako nga mabilin ini sa imo.” Kon nagakaigo, sambita ang suskripsion agod mabaton nila ang subong sina nga mga artikulo sing tayuyon.
4 Pagpatalupangod sang Abril 15 nga Guwa: Ang artikulo sa pahina 4 nagapamangkot: “Sa Diin Ikaw Makasapo sing Masaligan nga Panuytoy?”
Sa tapos mapakilala ang imo kaugalingon, makasiling ka:
◼ “Madamo gid ang mga problema sa kalibutan karon, subong sang [maghinambit sing butang nga ginakabalak-an sa komunidad ukon isa ka ulong-dinalan sa balita]. Ginapaligban naton kon bala may makita pa kita nga solusyon sa sining mga problema. Sing makalilipay, ang 2 Timoteo 3:16, 17 nagapasalig sa aton nga ang Biblia isa ka giya sa malig-on nga dalanon sang kabuhi. Paagi sa pagsuskribe sa Ang Lalantawan mabaton mo ini nga panuytoy sing tayuyon.”
5 Kon ginapakamaayo naton nga gamiton ang Magmata!, ayhan magamit mo ang Mayo 8 nga guwa kag ang artikulo nga “Tunay nga Paglaum Para sa Kabataan?” Ang kalabanan nga mga ginikanan nagakatandog sa mga kinahanglanon sang kabataan kag maluyag nga mahibaluan kon ano ang sarang mahimo agod mabuligan sila.
6 Kon mapagsik kita sa aton mga magasin, ang labing maayo nga magasin sa kalibutan, mangin mahunahunaon kita nga mapahamtang ini sa iban agod mabayaw man nila si Jehova subong ang Soberanong Ginuo sa uniberso.—Sal. 83:18.