Gamita sa Pinakamaayo nga Paagi ang Aton mga Magasin
1 Kon magpalapit ka sa isa ka newsstand, ano ang imo makita? Mga magasin. Sa isa ka tindahan sa bangga, ano ang nagaganyat sa imo? Mga magasin. Busa, ano ang ginabasa sang madamo nga tawo? Mga magasin. Ginapakita sang mga surbe nga 9 sa 10 ka tawo ang nagabasa sing indi magkubos isa ka magasin kada bulan. Ang kalibutan mahunahunaon sa mga magasin.
2 Mabuligan bala naton ang mga bunayag sing tagipusuon nga mangin mahunahunaon sa Lalantawan kag Magmata! Huo, kon KITA mahunahunaon sa Lalantawan kag Magmata! Ano ang makabulig sa aton? Binagbinaga ining mga panugda:
◼ Basaha ang mga Magasin: Ang isa ka nagalakbay nga manugtatap nagreport nga, sa promedyo, 1 lamang sa 3 ka manugbantala sa iya sirkito ang nagabasa sang kada guwa sang bug-os nga Ang Lalantawan kag Magmata! Ikaw bala? Samtang ginabasa mo ang kada artikulo, pamangkuta ang imo kaugalingon, ‘Sin-o ang magaapresyar sining impormasyon—isa bala ka iloy, negosyante, pamatan-on?’ Nian hunahunaa kon paano mo mapukaw ang interes sa topiko sa isa ukon duha lamang ka dinalan.
◼ Magtigayon sing Pat-od nga Order sang Magasin: Mag-order sa utod nga nagauyat sang magasin sing isa ka pat-od nga kadamuon nga kopya kada guwa. Sa sining paagi, kamo sang inyo pamilya may regular nga suplay sang mga magasin.
◼ Mag-iskedyul sing Regular nga Adlaw sang Magasin: Masakdag mo bala ang Adlaw sang Magasin sang Kongregasyon? Kon indi, tinguhai nga makahinguyang sing pila ka tion agod mapanagtag sing personal ang mga magasin, ayhan sa pagpanaksi sa dalan ukon sa pamalaybalay kag sa mga ruta sa magasin.
◼ Mangin Mahunahunaon sa “Lalantawan” kag “Magmata!”: Magdala sing mga kopya sang magasin kon nagalakbay ukon nagapamalaklon. Itanyag ini kon nagapakigsugilanon ka sa mga kaupdanan sa trabaho, sa mga kaingod, sa mga kabutho, ukon sa mga manunudlo. Ang isa ka mag-asawa nga masunson nagalakbay paagi sa eroplano nagagamit sang isa ka punto sa bag-ong mga magasin sa pag-umpisa sang pagpakigsugilanon sa katupad nila nga pasahero. Nakatigayon sila sing madamong makalilipay nga mga eksperiensia. Ang pila ka pamatan-on regular nga nagadala sa eskwelahan sang mga artikulo nga sa banta nila magawili sa ila mga manunudlo ukon mga masigkaestudyante. Magdala sing kopya kon nagapamalaklon, kag itanyag ini sa mga manugbaligya kon matapos na ang inyo transaksion. Madamo sa aton ang regular nga nagapagasolina; ngaa indi itanyag ang mga magasin sa mga nagatrabaho sa gasolinahan? Ihanda ini kon nagaduaw ang mga himata, kon nagasakay ka sa pangpubliko nga transportasyon, ukon kon nagahulat ka para sa isa ka appointment. Makahunahuna ka bala sang iban pa nagakaigo nga mga okasyon?
◼ Maghanda sing Malip-ot nga Presentasyon sa Magasin: Magplano sa paghambal sing diutay lamang, apang himua ini sing maathag. Mangin mapagsik. Buyuka ang tagipusuon. Mangin espesipiko. Magpili sing isa ka ideya gikan sa artikulo, ipabutyag ini sa pila ka tinaga, kag itanyag ang mga magasin. Ang pinakamaayo nga paagi amo ang pagbangon sing pamangkot sa isa ka makawiwili nga topiko kag nian ipakita ang isa ka artikulo nga nagahatag sing Makasulatanhon nga sabat. Binagbinaga ang pila ka halimbawa kon paano ini himuon:
3 Kon ginapatalupangod mo ang isa ka artikulo tuhoy sa nagadamo nga krimen, mahimo ka mamangkot:
◼ “Ano ang ginakinahanglan agod makatulog kita sa gab-i nga wala nagakahadlok sa krimen?” Ang tagbalay mahimo nga mangin negatibo tuhoy sa pag-ayo pa sang mga kahimtangan. Mahimo ka makasabat nga amo man sina ang ginabatyag sang madamo nga tawo kag makadugang nga may pila ikaw ka impormasyon nga ginapatihan mo nga magawili sa iya. Nian patuhuyi ang isa ka nagakaigo nga punto sa artikulo.
4 Kon nagatanyag sing artikulo tuhoy sa pagkabuhi sang pamilya, mahimo ka makasiling:
◼ “Nasapwan sang madamo nga tawo nga isa gid ka hangkat ang mangabuhi kag magsagod sing isa ka pamilya sa sining mga adlaw. May makadtuan bala kita agod makuhaan sing masaligan nga panuytoy?” Nian itudlo ang espesipiko nga komento sa magasin nga nagapakita sang kaalam nga masapwan sa Biblia.
5 Mahimo nimo gamiton ini nga pagpalapit kon nagatanyag sing artikulo tuhoy sa problema sa katilingban:
◼ “Ang kalabanan nga mga tawo ginaipit sa karon. Wala gintuyo sang Dios nga magakabuhi kita sa sining paagi.” Nian ipakita kon paano ang materyal sa artikulo makabulig sa aton sa paglandas sang mga problema sa kabuhi karon kag makahatag sing matuod nga paglaum para sa palaabuton.
6 Ang Pagpanaksi sa Dalan Epektibo: Sadto anay sa Enero 1940 nga guwa sang Informant (Ang Aton Ministeryo sa Ginharian) nga ang mga manugbantala ginpalig-on sa nahaunang tion nga mag-iskedyul sing isa ka pinasahi nga adlaw kada semana para sa pagpanaksi sa dalan nga nagagamit sang mga magasin. Nagapanaksi ka bala sa dalan sa pulupanag-on? Kon huo, epektibo gid bala ang ginagamit mo nga paagi? Napanilagan na nga ang pila ka manugbantala nagatindog sa isa ka masako nga hilit sang dalan, nga nagasugilanunay samtang madamo nga tawo ang nagalabay nga wala matalupangdan. Sa baylo nga magtindog nga nagatinuparay nga nagauyat sing mga magasin, mas epektibo nga maglayuay kag magpalapit sa mga tawo. Ang mga estranghero mahimo nga magadulog kag magapamati sa makadali kon ginapalapitan sila sang isa lamang ka tawo, apang pila lamang ang magapalapit sa isa ka grupo nga maukod nga nagasugilanunay. Sanglit nagaganyat kita sing daku nga igtalupangod sa dalan, kinahanglanon ilabi na nga magpamustora kita sing maayo kag magpanapot sing maugdang subong nga nagakabagay sa mga ministro sang Dios.—1 Tim. 2:9, 10.
7 Mga Ruta sa Magasin: Madamo sadtong may ruta sa magasin ang nakapahamtang sing madamo nga magasin bisan pa nga ang mga teritoryo ginatuptupan sing regular. Ang mga ruta sa magasin amo ang isa ka labing maayo nga ginahalinan sang posible nga mga estudyante sang Biblia.
8 Kon nagaduaw ka liwat sa pagdul-ong sing mga magasin, masapwan mo nga ang pag-abyanay ninyo sang tagbalay nagatubo. Sa inyo labi nga pagkilal-anay, labi nga nagahapos ang pagpakigsugilanon sa mga topiko sa Kasulatan. Mahimo ini magdul-ong sa pagsugod sing isa ka pagtuon sa Biblia. Kag dumduma, kada magduaw ka sa tagbalay sarang mo ini mareport nga isa ka pagduaw liwat.
9 Ang isa ka sister tayuyon nga nagadala sing magasin sa isa ka babayi nga pirme sini nagabaton apang nagasiling: “Wala ako nagapati sa ginasiling mo sa akon.” Sa isa ka pagduaw, naabtan sang sister ang bana sa balay. Pagkatapos sang mainabyanon nga paghambalanay, ginhimo ang kahimusan sa pagsugod sing isa ka pagtuon sa Biblia. Gin-abyan sang sister ang tatlo ka anak nga lalaki nga nagbuylog sa pagtuon. Sang ulihi, gindedikar sang iloy kag sang iya mga anak nga lalaki ang ila kabuhi kay Jehova kag ginbawtismuhan. Sa karon, 35 ka katapo sang pamilya ang nagbaton sang kamatuoran. Ini tanan bangod gintatap sang sister ang iya ruta sa magasin!
10 Madamo sing paagi sa pagsugod sing isa ka ruta sa magasin. Irekord lamang ang imo mga napahamtangan kag balikan ini kada duha ka semana nga dala ang pinakaulihi nga guwa. Ang isa ka paagi amo ang paggamit sang impormasyon sa ubos sang tig-ulo “Sa Amon Masunod nga Guwa.” Sa imo pagbalik, sugiri ang tagbalay nga dala mo ang artikulo nga ginsambit mo sang nagligad. Ukon, sa pagduaw liwat, mahimo ka makasiling: “Sang nabasa ko ining artikulo, nahunahuna ko nga mangin interesado ka sa sini . . . ” Pagkatapos sang imo pagduaw, isulat ang lima ka simple nga butang sa imo house-to-house record: (1) ngalan sang tagbalay, (2) direksion, (3) petsa sang pagduaw, (4) mga guwa nga napahamtang, kag (5) artikulo nga gingamit. Ang pila ka manugbantala nakatipon sing tubtob sa 40 ukon kapin pa ka tawo sa ila ruta sa magasin!
11 Teritoryo nga May Negosyo: Madamong magasin ang napahamtang sang mga manugbantala nga nagpangabudlay sa teritoryo nga may negosyo. Natilawan mo na bala ang magbantala sa mga balaligyaan? Sa primero, ang iban nagapang-alag-ag sa pagduaw sa mga negosyante, apang pagkatapos nila ini matilawan sa pila ka beses, nasapwan nila nga makalilipay ini kag makapaladya. Ngaa indi magpabulig sa isa ka eksperiensiado nga manugbantala ukon payunir agod makasugod ka?
12 May pila ka bentaha ang pagbantala sa mga balaligyaan. Diutay lamang ang not-at-home (wala sa balay), sa dimagkubos sa tion sang trabaho! Ang mga negosyante masunson nga matinahuron, bisan pa nga ayhan indi gid sila interesado sa Biblia. Magsugod sing maaga; mahimo ka nga pagaabiabihon sing maayo. Sa tapos mapakilala ang imo kaugalingon, mahimo ka makasiling nga talagsa mo lang masugilanon ang mga negosyante sa puluy-an, gani ginaduaw mo sila para sa pila lamang ka higayon sa ila ulubrahan sa pagtanyag sang pinakaulihi nga mga guwa sang Ang Lalantawan kag Magmata! Ipakita nga ginaapresyar sang madamong negosyante ang aton mga magasin bangod dapat sila mangin suno sa tion sa mga hitabo sa kalibutan apang diutay lamang ang ila tion sa pagbasa. Ang ruta sa magasin mahimo matigayon upod sa mga interesado nga masapwan sa teritoryo nga may negosyo.
13 Maghanda Subong Isa ka Pamilya: Mahimo painon ang pila ka tion sa inyo pangpamilya nga pagtuon sa Biblia agod hambalan kon diin nga mga artikulo sa pinakaulihi nga mga magasin ang mahimo nagakabagay nga gamiton sa inyo teritoryo. Ang mga katapo sang pamilya—lakip na ang mga kabataan—mahimo nga magbinuslanay sa pag-ensayo sang mga presentasyon kag sa pag-atubang sa kinaandan nga mga pagpamatok nga ginapautwas, subong sang: “Masako ako,” “May kaugalingon na kami nga relihion,” ukon “Indi ako interesado.” Makabulig ini agod ang bug-os nga pamilya may regular nga bahin sa pagpanagtag sing magasin.
14 Makabulig ang mga Konduktor sa Pagtinuon sa Libro: Kon mahimo, iskedyulon ang mga miting sa pag-alagad sa Adlaw sang Magasin sa mga lugar nga ginahiwatan sing pagtinuon sa libro sa baylo nga magtipon ang bug-os nga kongregasyon sa Kingdom Hall. Dapat nga nahandaan sing maayo sang mga nagapanguna ang espesipiko nga mga panugda para sa grupo. Ang mga miting antes magguwa sa latagon—lakip na ang pag-organisar sa grupo—dapat malip-ot, nagalawig sing 10 tubtob 15 minutos lamang. Dapat pat-uron sang mga konduktor sa pagtinuon nga may bastante nga teritoryo agod huptan ang grupo nga masako para sa bug-os nga panag-on sang pag-alagad sa latagon.
15 Ipakita ang Apresasyon Para sa mga Magasin: Ang artikulo nga “Paggamit sing Maayo sang Ang Lalantawan kag Magmata!” nga ginbalhag sa Agosto 1993 nga guwa sang Ang Aton Ministeryo sa Ginharian naghatag sining importante nga punto: “Ang Lalantawan kag Magmata! wala nagakadulaan sing balor, bisan pa nga indi tanan mapahamtang sa sulod sang isa ukon duha ka bulan sang ila petsa sang guwa. Ang pagkaimportante sang impormasyon nga ginaunod sini wala nagabuhin sa pagligad sang tion . . . Ang pagtugot nga magtumpok ang daan nga mga magasin kag ang indi gid paggamit sini isa ka pagpakita sing kakulang sing apresasyon para sa sining bilidhon nga mga instrumento. . . . Sa baylo nga ihal-id ang daan nga mga guwa kag kalimtan ini, indi bala mas maayo nga panikasugan sing pinasahi nga ipahamtang ini sa mga kamot sang mga interesado?”
16 Madamong bunayag sing tagipusuon nga mga tawo ang nagapangita karon sing kamatuoran. Ang impormasyon nga ginaunod sang isa ka magasin mahimo nga amo gid ang ginakinahanglan nila sa pagtuytoy sa ila sa kamatuoran! Mangin mas mahunahunaon ka bala sa pagpanagtag sing magasin sa palaabuton? Iaplikar mo bala ang pila sining mga panugda sa sini gid nga talipuspusan sang semana? Bugana gid kamo nga pakamaayuhon kon himuon ninyo ini.
Praktikal nga mga Panugda:
◼ Basaha ang mga magasin sing abanse, kag hibalua sing maayo ang mga artikulo.
◼ Pilia ang artikulo nga nagahinun-anon sang pila ka butang nga makawiwili sa inyo komunidad.
◼ Maghanda sing presentasyon nga nagakabagay sa nanuhaytuhay nga tawo, subong sang mga lalaki, mga babayi, ukon mga pamatan-on. Ipakita kon paano ang magasin nagahilabot sa mga tagbalay kag kon paano ini maluyagan sang bug-os nga pamilya.
◼ Planuha ang inyo pag-alagad sa latagon sa tion nga ang kalabanan nga tawo yara sa balay. Ang pila ka kongregasyon nagahimos sing pagpanaksi sa gab-i dala ang mga magasin.
◼ Hupti ang inyo presentasyon nga malip-ot kag direkta sa punto.
◼ Indi maghambal sing madasig. Kon ang nagapamati sa imo indi interesado, ang paghambal sing madasig indi makabulig. Tinguhai nga magrelaks, kag hatagi ang tagbalay sing kahigayunan nga makasabat.
Pagtanyag sing mga Magasin sa Pamalaybalay:
◼ Magyuhum sing mainabyanon kag maghambal sing malulo.
◼ Mangin interesado sa magasin.
◼ Maghambal sing malagday kag maathag.
◼ Magpamulong sa isa lamang ka topiko; pukawa sing malip-ot ang interes, kag ipakita ang balor sini sa tagbalay.
◼ Ipadaku ang isa lamang ka artikulo.
◼ Gamita ang isa lamang ka magasin, nagatanyag sang isa pa subong kaupod.
◼ Idaho ang mga magasin sa tagbalay.
◼ Sugiri ang tagbalay sang plano mo nga magbalik.
◼ Hinakpi sing mainabyanon kag sing positibo kon wala ginabaton ang magasin.
◼ Isulat sa house-to-house record ang tanan nga interes kag napahamtangan.
Mga Kahigayunan Agod Mapahamtang ang mga Magasin
◼ Pamalaybalay nga pagpanaksi
◼ Pagpanaksi sa dalan
◼ Pagbantala sa mga tindahan
◼ Mga pagduaw liwat sa ruta sa magasin
◼ Pagpanaksi sa gab-i
◼ Kon nagaduaw liwat
◼ Pagduaw sa mga estudyante anay sang Biblia
◼ Kon nagalakbay, nagapamalaklon
◼ Kon nagapakigsugilanon sa mga himata, mga kaupdanan sa trabaho, mga kaingod, mga kabutho, mga manunudlo
◼ Sa pangpubliko nga transportasyon, sa mga hulot-hululatan